Build Antap Long Theme

OLKETA speaker wea garem savve, savve hem important for garem theme. Taem olketa preparem wanfala tok, theme hem helpem olketa for iusim nomoa information wea fitim and for ting raonem. Diswan minim winim wei for lelebet storyim planti point, olketa savve storyim datfala information long wei wea bae barava helpem audience. Taem each main point hem barava join gud witim theme and hem build antap long hem, audience kasem help tu for rememberim olketa point and luksavve hao olketa important.

Nomata theme hem subject wea iu tok abaotem, bae iu luksavve hao olketa tok bilong iu bae kamap moabeta sapos iu ting long theme olsem wanfala saed bilong datfala subject. Kingdom, Bible, and resurrection nao samfala subject. Iu savve build antap long planti difren theme wea kam from olketa subject hia. Samfala example nao: “Kingdom, Wanfala Really Gavman,” “Kingdom Bilong God Bae Mekem Earth Wanfala Paradaes,” “Bible Hem Kam From God,” “Bible Fit for Leadim Iumi Distaem,” “Resurrection Givim Hope for Olketa wea Sorre,” and “Resurrection Hope Helpem Iumi Stand Strong Long Persecution.” Evri theme hia needim barava difren wei for build antap long hem.

Olsem main theme bilong Bible, preaching waka wea Jesus Christ duim long ministry bilong hem long earth hem mekhae long theme: “Kingdom bilong heven hem klosap kam nao.” (Matt. 4:​17) Hao nao Jesus build antap long datfala theme? Fofala Gospel story abaotem datfala Kingdom winim 110 taem. Bat Jesus duim moa samting winim wei for iusim datfala word “kingdom” evritaem. Long teaching bilong hem and olketa mirakol wea hem duim, Jesus showimaot klia hao hem, datwan wea stap long there, hem nao Son bilong God, datfala Messiah, datwan wea Jehovah bae givim Kingdom long hem. Jesus showim tu hao thru long hem wei hem open for olketa narawan share insaed datfala Kingdom. Hem talem klia olketa fasin wea olketa wea bae kasem datfala privilege mas garem. Thru long olketa teaching and mirakol bilong hem, hem showimaot klia hao Kingdom bilong God bae affectim living bilong pipol and hem talem hao wei wea hem iusim spirit bilong God for raosem olketa demon pruvim hao ‘kingdom bilong God hem barava kasem’ olketa wea lisin long hem. (Luke 11:20) Jesus givim assignment for olketa follower bilong hem for givim witness abaotem datfala Kingdom.​—⁠Matt. 10:7; 24:⁠14.

Iusim Wanfala Theme wea Fitim. Iu no need for build antap long wanfala theme long sem wei wea Bible hem duim, bat nomata olsem, hem barava important for garem wanfala theme wea fitim.

Sapos iu bae chusim theme for tok bilong iu, tingim firstaem goal bilong datfala tok. Then taem iu chusim olketa main point for aotlaen bilong iu, mek sure olketa point hia barava saportim theme wea iu chusim.

Sapos iu kasem tok assignment wea garem theme finis, ting raonem gud wanem nao datwan showimaot abaotem wei wea iu shud storyim datfala information. Maet iu need for waka hard lelebet for luksavve long gud samting bilong datfala theme. Sapos iu nao chusim information for build antap long theme wea olketa assignim long iu, chusim gud, mekem theme hem showaot klia. Long narasaed, sapos iu kasem tok and information for iusim, iu bae still need for lukluk gud long hao for storyim followim theme. Iu bae need for tingim tu why nao datfala information hem important for audience and goal wea iu shud garem taem iu givim datfala tok. Diswan bae helpem iu for disaed wanem for strongim insaed tok bilong iu.

Hao for Mekhae Long Theme. For mekhae long theme, iu mas putim faondeson taem iu chusim and redyim information bilong iu. Sapos iu iusim nomoa information wea saportim theme bilong iu and iu followim olketa stretfala wei for mekem gudfala aotlaen, bae iu mekhae long theme.

Wei for talem moa savve strongim theme. Wanfala leaf long wanfala plant garem pattern wea mekem iumi luksavve hem bilong datfala plant. Bat, no eni leaf long wanfala plant hem semsem evribit witim narawan. Main pattern hem semsem, bat olketa leaf savve luk difren from each other. Hem semsem tu witim theme bilong wanfala tok. For talem moa olketa main word bilong theme hem olsem pattern bilong olketa leaf wea mekem iumi luksavve wanem plant nao olketa leaf hia kam from. For talem olketa word wea garem sem mining or for talem datfala theme long difren wei hem nara wei nomoa for storyim datfala sem theme. For duim olsem bae mekem theme hem main samting wea audience rememberim.

Olketa instruction hia fitim olketa tok long platform and tu olketa story long field ministry. Pipol savve rememberim shortfala story sapos theme hem showaot klia. Instruction long wanfala Bible study bae moa isi for student rememberim sapos conductor strongim theme. Sapos iu waka hard for chusim and iusim theme wea fitim, datwan bae helpem iu for kamap wanfala gudfala speaker and teacher bilong Word bilong God.