Talem Samting wea Tru

WHY nao maet wanfala Christian talem samting wea no tru? Maet hem talem samting wea hem herem, and no chek firstaem for mek sure hem tru. Or maet hem extram samting hem storyim bikos hem readim rong datfala information. Taem iumi careful for talem samting wea tru, nomata hem smol samting, olketa wea lisin bae luksavve olketa fit for trustim olketa samting wea moa important saed long message bilong iumi.

Long Field Ministry. Planti niu wan feel fraet for join insaed field ministry bikos olketa luksavve olketa garem staka samting for lanem yet. Nomata olsem, olketa kwiktaem kamap fit for givim gudfala witness, nomata olketa garem lelebet savve abaotem truth. Hao nao olsem? Main important samting hem for prepare firstaem.

Bifor iu go long field service, savve gud long subject wea iu laek storyim. Trae for tingim firstaem kaen kwestin wea pipol maet askem. Lukaotem olketa gudfala ansa from Bible. For duim olsem bae mekem iu feel relax and redy for givim olketa stretfala ansa. Waswe, bae iu conductim wanfala Bible study? Reviewim gud information for datfala study. Mek sure iu minim hao olketa ansa for olketa kwestin hem garem faondeson long Bible.

Waswe sapos wanfala haosholder or wakfren hem askem iu kwestin wea iu no savve ansarem? Sapos iu no sure long stretfala ansa, stap klia long wei for talem tingting bilong iuseleva. “Heart bilong raeteous wan hem ting raonem hao for ansa.” (Prov. 15:28) Maet iu faendem help wea iu needim insaed datfala buk Reasoning From the Scriptures or long “Olketa Bible Subject for Storyim” sapos olketa stap long languis bilong iu. Sapos iu no holem eni buk hia, talem hem iu willing for duim samfala research and kam bak. Sapos man wea askem kwestin barava laek kasem ansa, bae hem willing for weitim iu for kam bak witim stretfala ansa. And tu, maet hem tinghae long hambol fasin bilong iu.

For waka long field ministry witim olketa pablisa wea garem savve bae helpem iu lane for iusim Word bilong God long stretfala wei. Lukim wanem scripture olketa iusim and wei wea olketa storyim. Sapos olketa givim samfala idea or stretem iu, hambol for acceptim. Datfala strongfala disaepol Apollos hem kasem gud samting from help bilong nara pipol. Luke storyim Apollos olsem hem “savve tumas hao for toktok,” “savve gud long olketa scripture,” and “shaen witim spirit,” wanfala man wea “tok abaotem and teachim long stretfala wei olketa samting abaotem Jesus.” Nomata olsem, hem no savve gud long samfala samting. Taem Priscilla and Aquila luksavve long diswan, olketa “tekem hem for stap witim tufala and minim gud moa wei bilong God long hem.”—Acts 18:24-28.

“Hol Strong Long Faithful Word.” Olketa tok wea iumi givim long olketa meeting shud showaot iumi tinghae long waka bilong kongregeson olsem “wanfala post and saport bilong truth.” (1 Tim. 3:15) For saportim truth hem important for iumi minim gud olketa scripture wea iumi plan for iusim long tok bilong iumi. Iumi mas tingim olketa verse wea stap raonem and purpose bilong olketa.

Samwan maet talem moa samting wea iu talem finis long wanfala kongregeson meeting. Hem tru, “iumi evriwan mistek planti taem.” (Jas. 3:2) Bat bae iu kasem gud samting sapos iu mekem hem olsem fasin bilong iu for story long wei wea stret evribit. Planti brata wea joinim Theocratic Ministry Skul bae gogo kamap olketa elder. Pipol expectim “moa samting” from olketa wea garem responsibility olsem. (Luke 12:48) Sapos wanfala elder no careful and hem givim advaes wea rong and datwan mekem serious problem kamap for olketa member bilong kongregeson, maet God no hapi long datfala elder. (Matt. 12:36, 37) So, wanfala brata wea kasem mark olsem elder mas man wea pipol savve long hem olsem man wea “hol strong long faithful word long wei wea hem teach.”—Titus 1:9.

Iu mas careful taem iu story raonem samting for mek sure hem agree witim “datfala plan bilong healthy toktok” wea hem showaot klia long full sekson bilong truth long Scripture. (2 Tim. 1:13) Iu shud no fraet long diswan. Maet iu no readim full Bible yet. Go ahed for waka long hem. Bat long semtaem, lukim hao olketa idea hia savve helpem iu for ting raonem information wea iu ting for iusim taem iu teach.

First samting, askem iuseleva: ‘Waswe, disfala information hem agree witim samting wea mi lanem finis from Bible? Waswe, bae hem pullim olketa wea lisin kam long Jehovah, or hem apim wisdom bilong disfala world and encouragem pipol for followim datwan?’ Jesus hem sei: “Word bilong iu nao truth.” (John 17:17; Deut. 13:1-5; 1 Cor. 1:19-21) Next samting, iusim gud olketa tul for study wea faithful and wise slave provaedem. Olketa tul hia bae helpem iu for minim olketa scripture long stretfala wei and tu for iusim long balance wei. Sapos faondeson bilong olketa tok bilong iu hem “datfala plan bilong healthy toktok” and iu depend long samting wea Jehovah provaedem taem iu minim and storyim olketa scripture, toktok bilong iu bae stretfala.

Chekem Information for Mek Sure Hem Tru. Iu savve iusim gud olketa samting wea kamap long nius, toktok bilong samwan, and olketa experience for showimaot and storyim samfala point. Hao nao iu savve mek sure samting hem tru? Wanfala wei hem for mek sure iu tekem information from samting wea iu savve trustim. No forget for mek sure datfala information hem no old. Research wea showimaot namba bilong samting and samting wea science faendem savve kamap old; and taem man hem savve moa abaotem history and olketa oldfala languis, savve wea olketa garem hem change tu. Iu mas barava careful sapos iu ting for iusim information from olketa niuspepa, television, radio, or Internet. Proverbs 14:15 kaonselem iumi: “Eniwan wea no garem savve hem bilivim evri toktok, bat man wea wise hem ting raonem gogo bilong hem.” Askem iuseleva: ‘Waswe, ples wea mi tekem diswan from hem evritaem talem tru samting? Waswe, eni nara wei stap for mi savve chekim sapos hem tru?’ Sapos iu daotem sapos datfala information hem tru, no iusim.

Witim wei for chekim information for mek sure hem tru, tingting gud abaotem wei wea iu plan for iusim. Mek sure wei wea iu iusim datfala research hem join witim datfala full information wea iu tekem from. Taem iu trae for strongim point bilong iu, iu mas careful nogud iu sei “klosap evriwan” for “samfala pipol,” “evriwan” for “planti pipol,” and “evritaem” for “samfala taem.” Pipol bae daotem honest fasin bilong iu sapos iu extram olketa report wea storyim namba, hao big or hao important nao samting.

Sapos iu evritaem talem samting wea tru, pipol bae savve long iu olsem man wea respectim truth. Diswan mekem pipol tinghae long iumi olketa Jehovah’s Witness. Moa important, hem honorim “Jehovah God bilong truth.”—Ps. 31:5.