Waswe, Iu Kasem Hapi wea Kam From Wei for Give?
WANFALA sista wea strong for duim Christian waka for klosap 50 year finis hem laek tumas for visitim niu Kingdom Hall bilong olketa, nomata hem olo and body bilong hem wik. Wanfala Christian brata helpem hem for wakabaot go insaed long hall and hem isisi wakabaot go long contribution box. Taem hem kasem, hem putim lelebet selen wea hem keepim for disfala niu hall. Nomata hem no fit for help for buildim datfala hall, hem laek givim help.
Datfala Christian woman maet mekem iu tingim nara faithful woman—hem nao “poor widow woman” wea Jesus lukim wea putim tufala smol coin insaed long contribution box bilong temple. Iumi no savve wanem kaen living nao hem garem, bat long datfala taem eni woman wea no garem hasband savve garem hard taem saed long selen. From hem barava minim hard taem wea woman hia kasem, Jesus feel sorre tumas long hem. Taem Jesus storyim long olketa disaepol bilong hem smol present wea datfala woman givim, hem sei woman hia “putim evri samting wea hem garem, full living bilong hem.”—Mark 12:41-44.
Why nao wanfala poor widow woman olsem willing for duim datwan? Hem bikos hem garem deep love for Jehovah God, wea main ples for worshipim hem nao long temple long Jerusalem. Nomata hem no savve duim staka samting, hem laek for sapotim holy service. And hem kasem trufala hapi taem hem givim wanem hem fit for givim.
Givim Samting for Sapotim Waka Bilong Jehovah
Wei for givim selen and nara samting hem important part bilong klin worship from taem bifor kam, and evritaem hem mekem man kasem bigfala hapi. (1 Chronicles 29:9) Long Israel bifor, olketa iusim olketa contribution for mekem temple luk naes and tu for mekem evri samting saed long worship bilong Jehovah hem gohed. Law talem hao olketa son bilong Israel mas givim mek-ten part long evriting olketa plantim for sapotim olketa Levite, wea duim waka long temple. Bat olketa Levite tu mas givim long Jehovah mek-ten part from olketa samting wea olketa kasem.—Numbers 18:21-29.
Nomata olketa Christian kamap free from wei for keepim olketa rul bilong datfala Law covenant, principle abaotem wei wea olketa servant bilong God givim samting for sapotim tru worship hem semsem. (Galatians 5:1) And tu, olketa Christian long first century hapi tumas for givim wanem olketa brata bilong olketa needim. (Acts 2:45, 46) Aposol Paul hem talem moa long olketa Christian hao long sem wei wea God kaen tumas for givim olketa gud samting, olketa shud willing for give long nara pipol tu. Hem sei olsem: “Givim order long olketa wea rich long disfala system for no praod, and for putim hope bilong olketa, no long riches wea bae finis, bat long God, wea givim iumi evri samting for mekem iumi hapi; for duim gudfala samting, for kamap rich long olketa gudfala waka, for no hol bak, redi for share, and for olketa mekem for olketa seleva gudfala faondeson for future wea sef, mekem olketa savve hol strong long datfala really laef.” (1 Timothy 6:17-19; 2 Corinthians 9:11) Tru nao, from samting wea Paul seleva kasem, hem agree witim disfala toktok bilong Jesus: “Moa hapi kamaot from wei for givim samting winim wei for kasem samting.”—Acts 20:35.
Wei wea Olketa Christian Give Distaem
Distaem, olketa servant bilong Jehovah gohed for iusim samting wea olketa garem for helpem each other and for sapotim waka bilong God. Nomata olketa wea no garem staka samting tu givim wanem olketa fit for givim. “Faithful and wise slave” luksavve olketa garem responsibility front long Jehovah for iusim evri contribution hia long best wei. (Matthew 24:45) Olketa iusim selen hia for olketa branch office, transleitim olketa Bible and Bible pablikeson, arrangem olketa bigfala Christian hipap, trainim and sendem aot olketa traveling overseer and missionary, givim help long taem bilong disaster, and tu for staka nara important need. Bae iumi storyim wanfala need hia—help saed long wei for buildim olketa ples for worship.
Olketa Jehovah’s Witness hipap tu-thri taem insaed week long Kingdom Hall bilong olketa. Diswan hem for kasem gud samting from spiritual education and wei for hipap witim olketa nara Christian. Bat long staka kantri, saed long selen mekem hem hard for olketa Witness buildim olketa Kingdom Hall sapos olketa no kasem help. So, long 1999, Olketa Jehovah’s Witness startim wanfala program for iusim selen wea kam from olketa wea stap long rich kantri for help for buildim olketa Kingdom Hall bilong olketa wea stap long poor kantri. And tu, staka thousand volunteer givim taem and savve bilong olketa for duim diswan, wea staka taem diswan minim olketa mas waka long olketa bush area long olketa kantri hia. Taem building waka gohed, olketa Witness bilong datfala ples lane for buildim and keepim hall, and Kingdom Hall Fund hem mekem olketa fit for peim olketa tul and material. Olketa Witness wea iusim olketa niu hall hia distaem thankiu tumas from olketa brata bilong olketa givim taem and selen for help. Evri month olketa givim lelebet help saed long kost bilong construction and for keepim niu Kingdom Hall tu, and diswan help for buildim samfala moa Kingdom Hall.
Olketa buildim olketa Kingdom Hall followim wei for build and olketa material bilong each ples. Nomata olketa hall hia no stael tumas, olketa luk naes and fitim. Taem building program hia hem start long 1999, samting olsem 40 kantri wea poor nao join insaed diswan. Kam kasem distaem, construction program hem kamap long 116 kantri. Winim haf long evri kongregeson bilong Olketa Jehovah’s Witness long world insaed long disfala program. Long faevfala year wea go pas, thru long disfala arrangement olketa buildim winim 9,000 Kingdom Hall, wea minim insaed wanday olketa buildim winim 5-fala niu hall! Nomata olsem, insaed 116 kantri hia, need hem stap yet for buildim 14,500 niu Kingdom Hall. From blessing wea Jehovah givim and willing and kaenfala fasin bilong olketa Witness raonem world, iumi hope inaf selen stap wea bae mekem iumi fit for buildim olketa hall hia.—Psalm 127:1.
Olketa Kingdom Hall Mekem Moa Pipol Kam
Long olketa ples wea disfala building waka kamap, hao nao datwan affectim olketa Witness long there and waka for preachim Kingdom? Long staka ples, moa pipol attendim olketa meeting bihaen olketa buildim wanfala niu Kingdom Hall. Wanfala example nao disfala report from Burundi: “Taem Kingdom Hall hem finis, hem fulap nao. Olketa buildim wanfala Kingdom Hall for kongregeson wea samting olsem 100 pipol attendim olketa meeting. Long niu Kingdom Hall bilong olketa, 150 pipol nao savve sidaon insaed. Taem hall hem finis, 250 pipol nao gohed for attendim olketa meeting.”
Why nao kaen wei for grow olsem hem happen? Wanfala reason hem bikos pipol savve garem kwestin long mind abaotem olketa Kingdom pablisa wea no garem ples for meeting, bat hipap andanit wanfala tree or long wanfala open ples. Long wanfala kantri, taem pipol tingim olketa sismol religion, olketa tingim olketa olsem sekson wea faetem each other. Law long there sei evri meeting bilong religion mas kamap insaed haos for worship.
Taem olketa garem hall bilong olketa seleva, diswan helpem Olketa Jehovah’s Witness for showimaot long community hao olketa no disaepol bilong eni pastor. Branch office bilong Olketa Jehovah’s Witness long Zimbabwe raet olsem: “Long bifor, olketa brata long disfala area savve hipap long haos bilong wanfala brata, and pipol long area sei datfala kongregeson hem bilong man wea ownim datfala haos. Olketa savve sei datfala church hem bilong Man olsem. Evriting hia change distaem taem pipol lukim olketa saen long evri hall wea sei ‘Kingdom Hall bilong Olketa Jehovah’s Witness.’ ”
Olketa wea Hapi for Give
Aposol Paul hem raet olsem: “God lovem man wea hapi for give.” (2 Corinthians 9:7) Hem tru, bigfala contribution hem barava help. Bat, klosap evri contribution for waka bilong Olketa Jehovah’s Witness hem kam from olketa contribution box long Kingdom Hall. Nomata hem big or smol, evri contribution important tumas. Tingim taem Jesus lukim poor widow woman wea givim tufala smol coin bilong hem. Olketa angel and Jehovah lukim hem tu. Iumi no savve long nem bilong datfala widow woman, bat Jehovah mek sure olketa recordim wei wea hem willing for give insaed long Bible.
Olketa contribution bilong iumi sapotim wei for buildim olketa Kingdom Hall and tu, evri nara important waka bilong Kingdom. Wei for waka tugeta olsem hem mekem iumi garem reason for hapi and kamap “rich long wei for sei thankiu long God.” (2 Corinthians 9:12) Olketa Christian brata bilong iumi long Benin sei olsem: “Evriday staka prea bilong thankiu go long Jehovah for help saed long selen wea mifala kasem from olketa brata raonem full world.” Long semtaem, iumi evriwan wea share for sapotim Kingdom waka saed long selen kasem hapi wea kamaot from Christian wei for give!
[Box/Piksa long page 22, 23]
Olketa Wei wea Samfala Chus for Give
CONTRIBUTION FOR WAKA RAONEM WORLD
Planti markem haomas olketa bae putim insaed contribution box wea garem toktok “Contribution for Waka Raonem World—Matthew 24:14.”
Each month, olketa kongregeson sendem selen hia long office bilong Jehovah’s Witness long datfala kantri. Man savve sendem donation stret go long Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, or long branch office long kantri bilong iu. Raetem olketa cheque long nem bilong “Watch Tower.” Man savve donatem tu olketa expensive nekles, ring or olketa nara samting wea garem hae price. Man mas raetem wanfala shortfala leta wea talem hao diswan hem wanfala present and sendem witim contribution hia.
CONDITIONAL-DONATION TRUST ARRANGEMENT
Man savve putim selen olsem wanfala trust account for helpem Watch Tower. Bat sapos taem hem askem hem savve kasem bak selen bilong hem. For moa information, plis raet long Office of the Secretary and Treasurer long address antap.
CHARITABLE PLANNING
Witim olketa present olsem selen, samfala wei moa hem stap for givim samting for helpem Kingdom service evriwea long world. Samfala wei hem olsem:
Insurance: Man savve putim nem bilong Watch Tower olsem wan wea bae kasem laef insurance policy or retirement/pension plan.
Bank Account: Man savve putim bank account, certificate bilong deposit, or retirement account bilong hem long trust for or givim go long Watch Tower taem man hem dae, fitim arrangement bilong bank long area bilong hem.
Stocks and Bonds: Man savve givim stocks and bonds long Watch Tower olsem present.
Real Estate: Man savve donatem real estate long wei for givim olsem present or, sapos hem wanfala haos, for keepim olsem laef estate long man wea givim, wea hem savve gohed for stap insaed taem hem laef yet. Story witim branch office long kantri bilong iu bifor iu disaed for givim eni real estate.
Gift Annuity: Wanfala gift annuity hem wanfala arrangement wea man hem givim selen or securities long Watchtower corporation. Then man wea givim datwan or samwan wea hem markem, kasem wanfala annuity payment evri year for full laef bilong hem. Datfala man bae kasem wanfala income-tax deduction long year wea datfala gift annuity hem start.
Wills and Trusts: Man savve leavim property or selen long nem bilong Watch Tower thru long wanfala legal will, or hem savve putim nem bilong Watch Tower olsem datwan wea bae kasem wanfala trust agreement. Wanfala trust for helpem wanfala organization long saed bilong religion savve garem gudfala samting long saed bilong tax.
Olsem disfala toktok “charitable planning” hem showimaot, diskaen wei for give hem minim man wea give mas planim. For helpem olketa man wanwan wea want for helpem waka bilong Olketa Jehovah’s Witness evriwea long world witim wei bilong charitable planning, wanfala brochure hem stap long English and Spanish languis wea garem title Charitable Planning to Benefit Kingdom Service Worldwide. Olketa raetem disfala brochure for givim information long olketa difren wei wea man savve givim wanfala present distaem or bihaen hem dae. Bihaen olketa readim disfala brochure and followim olketa legal or tax advaes, planti fit for sapotim Olketa Jehovah’s Witness evriwea long world and long semtaem, no need for peim bigfala tax taem olketa duim datwan. Iu savve kasem disfala brochure long wei for askem stret Charitable Planning Office.
Sapos iu laekem moa information, iu savve contactim Charitable Planning Office, long wei for raet or telephone, long address long daon or long office bilong Olketa Jehovah’s Witness long kantri bilong iu.
Charitable Planning Office
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Telephone: (845) 306-0707
[Olketa Piksa long page 20, 21]
Olketa old and niu ples wea Olketa Jehovah’s Witness hipap
Zambia
Central African Republic