“Blessing Bilong Jehovah—Hem Nao Mekem Man Rich”
IUMI evriwan want for kasem blessing. The American Heritage College Dictionary sei olketa blessing apim “hapi living and gudfala living.” From Jehovah nao hem Man Wea Givim “evri gudfala present and evri perfect present,” evri really blessing for olowe hem start kam from loving Creator bilong iumi. (James 1:17) Hem givim planti blessing long evri man, nomata long olketa wea no savve long hem. Jesus sei olsem abaotem Dadi bilong hem: “Hem mekem sun bilong hem shaen long wicked pipol and long gudfala pipol, and hem mekem rain foldaon long pipol wea raeteous and wea no raeteous.” (Matthew 5:45) Bat Jehovah showimaot spesol interest long olketa wea lovem hem.—Deuteronomy 28:1-14; Job 1:1; 42:12.
Man wea raetem psalm hem sei: “Jehovah seleva bae no holem bak gudfala samting from olketa wea wakabaot long stretfala fasin.” (Psalm 84:11) Tru nao, olketa wea servem Jehovah garem richfala laef wea garem mining. Olketa savve hao “blessing bilong Jehovah—hem nao mekem man rich, and hem no addim eni pain witim datwan.” Bible hem sei tu: “Olketa wea [Jehovah] blessim olketa seleva bae kasem earth.” (Proverbs 10:22; Psalm 37:22, 29) Hem bae nambawan blessing!
Hao nao iumi savve kasem blessing bilong Jehovah? Wan samting, iumi need for mekem grow olketa fasin wea hem hapi long hem. (Deuteronomy 30:16, 19, 20; Micah 6:8) Iumi lukim diswan long example bilong thrifala servant bilong Jehovah bifor.
Jehovah Blessim Olketa Servant Bilong Hem
Noah hem barava spesol servant bilong God. Long Genesis 6:8, iumi readim: “Noah mekem Jehovah hapi.” Why? Bikos Noah hem obey. Datfala story hem sei: “Noah hem wakabaot witim tru God.” Noah followim olketa raeteous principle bilong Jehovah and obeyim olketa komand bilong hem. Long datfala taem wea world kamap raf tumas and nogud tumas, Noah go ahed “for duim evri samting wea God komandim hem. Hem barava duim olsem.” (Genesis 6:9, 22) From diswan, Jehovah talem hem for buildim “wanfala ark for sevem famili bilong [Noah].” (Hebrews 11:7) Long disfala wei, Noah and famili bilong hem—and thru olketa, famili bilong olketa man—stap laef taem genereson bilong datfala taem finis evribit. And Noah dae witim hope bilong resurrection for stap olowe long wanfala paradaes earth. Barava bigfala blessing nao hem kasem!
Abraham tu garem olketa fasin wea Jehovah hapi long hem. Main wan nao hem faith. (Hebrews 11:8-10) Abraham lusim isi living long Ur and bihaen long Haran bikos hem garem faith long promis bilong Jehovah hao olketa pikinini bilong hem bae kamap planti and kamap wanfala blessing for evri nation. (Genesis 12:2, 3) Nomata hem kasem test for planti year, faith bilong hem kasem reward taem son bilong hem Isaac hem born. Thru long hem, Abraham kamap laen dadi bilong nation wea God chusim, Israel, and gogo hem kamap laen dadi bilong Messiah. (Romans 4:19-21) And tu, hem kamap “dadi bilong evriwan wea garem faith,” and gogo olketa kolem hem “fren bilong Jehovah.” (Romans 4:11; James 2:23; Galatians 3:7, 29) Hem iusim laef bilong hem long wei wea garem mining, and hem barava kasem bigfala blessing!
Tingim tu datfala faithful man Moses. Barava spesol fasin bilong hem nao wei wea hem tinghae long olketa spiritual samting. Moses rejectim evri rich samting bilong Egypt and “go ahed for stand strong olsem hem lukim Datwan wea iumi no savve lukim.” (Hebrews 11:27) Bihaen 40-year long Midian, hem go bak long Egypt olsem wanfala olo man and hem no fraet for standap front long barava strong ruler bilong datfala taem, Pharaoh, for ask for olketa brata bilong hem kamap free. (Exodus 7:1-7) Hem lukim tenfala trabol, wei wea Red Sea hem divaed, and wei wea olketa army bilong Pharaoh finis evribit. Jehovah iusim hem for givim Law long Israel and hem kamap olsem mediator bilong covenant bilong Hem witim datfala nation. For 40-year, Moses leadim nation bilong Israel long wilderness. Laef bilong hem garem really purpose, and hem enjoyim olketa barava nambawan assignment long service.
Olketa Blessing Distaem
Olketa story hia showimaot hao laef bilong olketa wea servem God really garem mining. Taem pipol bilong Jehovah mekem grow olketa fasin olsem wei for obey, faith, and wei for tinghae long olketa spiritual samting, olketa kasem bigfala blessing.
Iumi kasem blessing long wanem wei? Well, nomata planti million pipol insaed Christendom hangre long spiritual wei, iumi savve “shaen braet long gudfala fasin bilong Jehovah.” (Jeremiah 31:12) Thru long Jesus Christ and “datfala faithful and wise slave,” Jehovah givim kam planti spiritual kaikai wea helpem iumi for stap long ‘road wea lead go long laef.’ (Matthew 7:13, 14; 24:45; John 17:3) Wei for kaban witim bigfala Christian famili bilong iumi hem narafala rich blessing. Long olketa meeting and long narafala taem tu, wei for stap witim olketa nara worshiper wea showimaot love and barava waka hard for werem “niufala fasin” hem givim bigfala hapi. (Colossians 3:8-10; Psalm 133:1) Bat, nambawan blessing bilong iumi hem datfala spesol privilege for fren witim Jehovah God and for followim olketa step bilong Son bilong hem, Christ Jesus.—Romans 5:1, 8; Philippians 3:8.
Taem iumi ting raonem olketa blessing olsem, iumi luksavve hao service bilong iumi long God hem barava spesol. Maet iumi tingim olketa parabol bilong Jesus abaotem bisnisman wea go long olketa difren ples for lukaotem olketa nambawan pearl. Jesus sei olsem abaotem disfala man: “Taem hem faendem wanfala pearl wea garem hae price, hem go and kwiktaem sellim evri samting wea hem garem and baem datwan.” (Matthew 13:46) Hem nao hao iumi barava feel abaotem wei wea iumi fren witim God, privilege wea iumi garem for servem hem, Christian wei for kaban wea iumi garem, Christian hope bilong iumi, and evri nara blessing wea join witim faith bilong iumi. No eni samting long laef bilong iumi hem spesol winim diswan.
Givim Bak Samting Long Jehovah
Bikos iumi luksavve long Jehovah olsem Man Wea Givim kam evrikaen gudfala present, heart bilong iumi muvim iumi for showimaot wei for tinghae long olketa blessing wea iumi kasem. Hao nao iumi savve duim datwan? Wanfala wei hem for helpem nara pipol for enjoyim olketa sem blessing hia. (Matthew 28:19) Insaed winim 230 kantri, Olketa Jehovah’s Witness barava busy for visitim neiba bilong olketa for duim datwan. Taem olketa duim olsem, olketa iusim lelebet samting wea olketa garem—taem, strong, and material samting bilong olketa—for helpem nara pipol for “kasem stretfala savve bilong truth.”—1 Timothy 2:4.
Tingim olketa pioneer wea stap long Glendale, California, U.S.A. Evri Saturday morning, olketa travel for samting olsem 100 kilometer for go and kam for visitim wanfala prison. Nomata olketa savve spendem tu-thri hour nomoa each taem olketa visitim olketa prisoner, olketa nating wikdaon. Wanfala long olketa sei: “Hem nambawan samting for serve long spesol territory olsem. Mifala duim witim bigfala hapi. Mifala garem planti pipol wea interest so hem hard for kasem evriwan. Distaem, mifala study witim faevfala pipol, and fofala narawan ask for studyim Bible.”
Olketa strong Christian minister hapi for offerim olketa seleva free for duim disfala waka for sevem laef. Olketa followim fasin bilong Jesus wea sei: “Iufala kasem free, givim free.” (Matthew 10:8) Planti million pipol raonem world busy for duim sem waka, and samting wea kamaot from diswan, bigfala sekson bilong pipol wea garem honest heart acceptim and kamap olketa disaepol. Insaed faevfala year wea just go pas nomoa, klosap 1.7 million dedicatem laef bilong olketa long Jehovah. For lukaftarem olketa need wea go ahed for kamap moa big, need hem stap for wakem staka Bible, Bible pablikeson and buildim olketa niu Kingdom Hall and olketa nara ples for meeting. Wea nao selen for provaedem olketa need hia kam from? Hem kam from olketa donation nomoa.
From samfala part long world kasem hard taem saed long selen, planti pipol stragol for provaedem need bilong famili bilong olketa. Olsem New Scientist magasin talem, wan billion pipol spendem 70 percent long wages bilong olketa long kaikai nomoa. Planti long olketa Christian brata and sista bilong iumi garem datfala problem. Olketa bae no savve kasem olketa samting olsem olketa Christian buk or olketa Kingdom Hall wea fitim sapos olketa no kasem help from olketa wea garem sem biliv.
Bat datwan no minim olketa acceptim wei for letem nara pipol karem hevi bilong olketa. Bat olketa needim help. Taem Moses encouragem olketa Israelite for givim material contribution olsem wei for showimaot thankiu long Jehovah for blessing bilong olketa, hem sei: “Datfala present long hand bilong each wan mas fitim wei wea Jehovah givim iu blessing.” (Deuteronomy 16:17) Dastawe, taem Jesus lukim wanfala widow givim “tufala smolfala selen wea nating garem hae price” long temple, hem praisem hem long olketa disaepol bilong hem. Hem duim samting wea hem fit for duim. (Luke 21:2, 3) Long sem wei, olketa Christian wea garem living wea moa poor duim samting wea olketa savve duim. And sapos olketa short long samting, olketa savve kasem help thru long contribution wea kam from olketa nara Christian wea no poor tumas long material wei.—2 Corinthians 8:13-15.
Taem iumi givim bak samting long God long wei olsem, hem important for letem stretfala tingting nao muvim iumi. (2 Corinthians 8:12) Paul sei: “Letem each wan duim wanem hem disaedem long heart bilong hem, no from eniwan pushim or forcem hem, from God lovem man wea hapi for give.” (2 Corinthians 9:7) Taem iumi give free from heart, iumi saportim wei wea organization bilong God hem grow distaem and mekem hapi bilong iumi kamap moa big.—Acts 20:35.
Wei for share long preaching waka and givim contribution hem tufala wei wea iumi savve givim samting bak long Jehovah for olketa blessing wea hem givim long iumi. And hem encouragem iumi for savve hao Jehovah want for givim blessing bilong hem long planti moa honest pipol, wea maet no savve long hem distaem! (2 Peter 3:9) So, iumi mas go ahed for iusim olketa samting wea iumi garem long service bilong God for faendem pipol wea garem honest heart and helpem olketa mekem grow olketa fasin olsem wei for obey, faith, and wei for tinghae. Long datfala wei, iumi bae kasem hapi for helpem olketa for “teistim and lukim hao Jehovah hem gud.”—Psalm 34:8.
[Box long page 28, 29]
Olketa Wei wea Samfala Chus for Give
CONTRIBUTION FOR WAKA RAONEM WORLD
Planti markem, or mekem budget, for haomas selen olketa putim insaed contribution box wea garem toktok “Contribution for Waka Raonem World.—Matthew 24:14.”
Each month olketa kongregeson sendem selen hia long world headquarters bilong Olketa Jehovah’s Witness long Brooklyn, New York, or long branch office klosap long olketa. Iu savve sendem donation stret long Treasurer’s Office tu, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, or long branch office wea lukaftarem kantri bilong iu. Man savve donatem tu jewelry or olketa nara samting wea garem hae price. Man mas raetem wanfala short leta wea talem hao diswan hem wanfala present and sendem witim contribution hia.
CONDITIONAL-DONATION ARRANGEMENT
Man savve donatem selen followim wanfala spesol arrangement wea hem savve tekem bak selen bilong hem bihaen sapos hem garem need. For samfala moa information, plis raet long Treasurer’s Office long address antap.
CHARITABLE PLANNING
Witim olketa present olsem selen and conditional donation bilong selen, samfala wei moa hem stap for givim samting for helpem Kingdom service evriwea long world. Samfala wei hem olsem:
Insurance: Man savve putim nem bilong Watch Tower Society olsem man wea bae kasem laef insurance policy or wanfala retirement/pension plan.
Bank Account: Man savve putim bank account, certificate bilong deposit, or retirement account bilong hem long trust for or for peim taem man hem dae long Watch Tower Society, fitim arrangement bilong bank long area bilong hem.
Stock and Bond: Man savve givim stock and bond long Watch Tower Society olsem present.
Real Estate: Man savve donatem real estate go long Watch Tower Society long wei for givim olsem present or for keepim olsem laef estate long man wea givim, wea savve go ahed for stap insaed taem hem laef yet. Contactim branch office long kantri bilong iu bifor iu disaed for givim eni real estate.
Will and Trust: Man savve leavim property or selen long nem bilong Watch Tower Society thru long wanfala legal will, or hem savve putim nem bilong Watch Tower Society olsem datwan wea bae kasem wanfala trust agreement. Wanfala trust for helpem wanfala organization long saed long religion savve garem gudfala samting long saed bilong tax.
Olsem disfala toktok “charitable planning” hem showimaot, diskaen wei for give hem minim man wea give mas planim. For helpem olketa man wanwan wea want for helpem waka bilong Olketa Jehovah’s Witness evriwea long world thru samkaen wei bilong charitable planning, wanfala brochure hem stap long English and Spanish languis wea garem title Charitable Planning to Benefit Kingdom Service Worldwide. Olketa raetem disfala brochure for ansarem planti kwestin abaotem olketa present, will, and trust. Hem garem tu gudfala information saed long estate , selen, and tax planning. And olketa wakem diswan for helpem man wanwan long United States wea plan for givim wanfala spesol present distaem or bihaen olketa dae for chusim best wei for fitim famili and living bilong olketa. Iu savve ask for kasem wanfala copy bilong disfala brochure stret from Charitable Planning Office.
Bihaen olketa readim disfala brochure and story tugeta witim Charitable Planning Office, planti fit for saportim Olketa Jehovah’s Witness evriwea long world and long semtaem, no need for peim bigfala tax taem olketa duim datwan. Man shud letem Charitable Planning Office for savve and kasem wanfala copy bilong eni document wea fitim eniwan long olketa arrangement hia. Sapos iu interest long eni wan long olketa charitable planning arrangement hia, iu shud contactim Charitable Planning Office, long wei for raet or telephone, long address long daon or long office bilong Olketa Jehovah’s Witness wea lukaftarem kantri bilong iu.
CHARITABLE PLANNING OFFICE
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Telephone: (845) 306-0707