Kwestin From Reader
Why nao Jehovah no killim dae David and Bath-sheba taem tufala duim adultery, bat baby bilong tufala nao dae?
Law bilong Moses hem sei: “Sapos olketa faendem wanfala man hem sleep witim wanfala woman wea marit finis, tufala evriwan mas dae, datfala man wea sleep witim datfala woman and datfala woman tu. Long wei olsem, iufala mas aotem nogud samting from Israel.” (Deuteronomy 22:22) Sapos Jehovah God letem olketa man for judgem datfala judicial case bilong David and Bath-sheba followim Law, tufala hia wea duim adultery mas dae. From man no savve wanem insaed heart bilong nara man, hem judgem man wea duim rong followim samting wea man hia hem duim. Law sei man wea duim adultery mas dae. Olketa man wea judge long Israel no garem paoa for forgivim datfala sin.
Long narasaed, trufala God hem savve lukim wanem insaed heart and hem savve forgivim olketa sin sapos hem lukim reason stap for duim olsem. From David, man wea Jehovah mekem Kingdom covenant witim hem nao duim disfala sin, Jehovah chus for deal witim diswan seleva. (2 Samuel 7:12-16) “Judge bilong full earth” garem right for duim olsem.—Genesis 18:25.
Wanem nao Jehovah lukim taem hem lukluk insaed heart bilong David? Olketa raeting wea stap bifor Psalm 51 hem sei disfala psalm hem storyim feeling bilong David “taem profet Nathan kam lukim hem bihaen hem durong witim Bath-sheba.” Psalm 51:1-4 hem sei: “Showimaot kaenfala fasin long mi, O God, fitim loving-kaeness bilong iu. From iu garem bigfala mercy, aotem olketa sin bilong mi. Wasim mi evribit from rong bilong mi, and klinim mi from sin bilong mi. From mi savve long olketa rong bilong mi, and sin bilong mi stap front long mi evritaem. Mi barava sin againstim iu nao, and samting wea mi duim hem nogud long eye bilong iu.” Disfala toktok bilong bigfala sorre masbi barava pruvim long Jehovah hao David showimaot trufala wei for repent, and from datfala reason Jehovah disaed for showimaot mercy long tufala wea duim rong. And nara samting tu, David hem man wea showimaot mercy, dastawe Jehovah showimaot mercy long hem. (1 Samuel 24:4-7; Matthew 5:7; James 2:13) From diswan, taem David talemaot sin bilong hem, Nathan sei olsem: “From iu talem datwan, Jehovah forgivim iu. Bae iu no dae.”—2 Samuel 12:13.
David and Bath-sheba bae no free from evri samting wea kamaot from sin bilong tufala. Nathan talem David: “From iu duim disfala samting wea barava no showimaot respect long Jehovah, disfala son bilong iu wea just born bae hem dae.” Nomata David sorre and no kaikai for sevenfala day, baby bilong tufala wea sik hem dae.—2 Samuel 12:14-18.
Hem hard for samfala minim why datfala baby hem dae, bikos Deuteronomy 24:16 hem sei: “Mas no killim dae pikinini bikos long dadi.” Bat remember, sapos olketa man nao judgem datfala case, baby wea no born yet and mami and dadi evriwan bae dae. Wei wea datfala son hem dae, maet hem helpem David lukim klia hao Jehovah no hapi long sin wea hem duim witim Bath-sheba. Iumi barava sure Jehovah deal witim datfala samting followim justice, from “wei bilong hem perfect.”—2 Samuel 22:31.
[Piksa long page 31]
David showimaot trufala wei for repent