Waswe, Eni Hope For Salvation Stap?
Olketa kolem mek-20 century olsem century wea barava fulap witim wei for killkill winim eni narataem. Criminal fasin, olketa war, raoa midolwan difren tribe, wei for iusim nogud drug, no honest, and raf fasin barava big tumas insaed olketa year wea go pas. Witim olketa samting hia hem pain and safa wea kamaot from sik, old age, and dae. Hu nao bae no laek for kamap free from olketa big problem wea stap long world distaem? Taem iumi luk go long future, waswe, eni hope for salvation stap?
TINGIM datfala vision wea aposol John kasem samting olsem 2,000 year bifor. Hem raet: “Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. And hem bae aotem evri wata from eye bilong olketa, and dae bae nomoa, sorre and krae and pain bae nomoa tu. Evri samting bifor hem finis nao.” (Revelation 21:3, 4) Profet Isaiah tu talem profesi olsem: “Hem bae finisim dae for olowe, and Sovereign Lord Jehovah bae aotem krae from evri feis. And hem bae aotem shame from pipol bilong hem evriwea long earth, from Jehovah seleva hem talem diswan.”—Isaiah 25:8.
Tingim samting wea bae kamaot from wei wea promis bilong God hem fulfill! Olketa man bae sev from hardfala living and raf fasin, from olketa samting wea kosim trabol and wei for safa. Tru nao, nomata sik, wei for olo, and dae bae no spoelem iumi! Word bilong God, Bible, promisim laef olowe witim perfect living long earth. (Luke 23:43; John 17:3) And hem stap for evriwan wea laekem diswan. “Will bilong [God] nao for evri difren kaen man mas sev and kasem stretfala savve bilong truth.”—1 Timothy 2:3, 4.
Bat, for kasem gud samting from olketa promis bilong God, iumi mas luksavve long part wea Jesus Christ duim for sevem iumi and showimaot faith long hem. Jesus seleva sei: “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) Taem hem point go long important part wea Jesus Christ duim long disfala samting, aposol Peter sei: “Salvation no kam thru long eni narawan, from no eni nem moa anda long heven bae iumi kasem for mekem wei for iumi sev.” (Acts 4:12) Aposol Paul and fren bilong hem Silas encouragem wanfala honest man wea laek for savve: “Biliv long Lord Jesus and iu bae sev, iu and famili bilong iu.”—Acts 16:30, 31.
Tru nao, Jesus Christ hem “Nambawan Man bilong laef,” and man fit for kasem salvation thru long hem nomoa. (Acts 3:15) Bat hao nao wanfala man savve kamap main man for sevem iumi? Wei for minim gud waka bilong hem long disfala samting shud strongim hope bilong iumi for salvation.
[Olketa Piksa Credit Line long page 2]
Page 3: Aeroplane for faet: USAF photo; hangre pikinini: UNITED NATIONS/J. FRAND; war ship wea bone: U.S. Navy photo ▸