Samfala Ask Olsem
Waswe, Olketa Jehovah’s Witness Bilivim Hao God Bae Sevem Olketa Nomoa?
Olketa Jehovah’s Witness bilivim hao religion bilong olketa nao tru. Sapos nomoa, olketa bae go followim nara religion. Olketa Jehovah’s Witness garem hope hao God bae sevem olketa, olsem pipol long nara religion tu hope olsem. Bat olketa savve hem no waka bilong olketa for judgem man for hem laef or dae. God nomoa hem judgem man for hem laef or dae.—Isaiah 33:22.
Bible showimaot hao olketa man wea laekem God for sevem olketa mas waka witim hem tu. Tingim disfala tokpiksa: Wanfala man go wakabaot long bush bat gogo hem lus and hem no savve faendem road for kam bak nao. Hem barava laek kasem bak ples bilong hem. Waswe, bae hem dae nao long bush, or bae hem laef? Gogo nara man lukim hem. Hem talem disfala man wea lus long bush hao hem savve long road for go bak. Waswe, disfala man wea lus bae followim disfala man or bae hem les? Sapos hem praod, bae hem les, bat sapos hem hambol, bae hem followim datfala man and kasem bak ples bilong hem.
Long sem wei tu, sapos iumi no laek dae, iumi mas waka witim Man wea sevem iumi, Jehovah God. Laef olowe hem wanfala present wea God laek givim long man, bat no evriwan bae kasem datwan. Son bilong God, Jesus, hem sei: “No evriwan wea sei long mi, ‘Lord, Lord,’ bae go insaed long kingdom bilong God bat man wea duim wanem Dadi bilong mi long heven laekem nao, bae go insaed.”—Matthew 7:21.
Olketa Jehovah’s Witness bilivim hao God bae sevem nomoa pipol wea garem faith long Jesus, wea givim laef bilong hem for sevem pipol, and wea barava followim olketa teaching bilong Jesus. (Acts 4:10-12) Tingim thrifala samting wea Bible storyim wea man mas duim sapos hem laekem God for sevem hem.
(1) Jesus talem olketa disaepol: “Evriwan bae luksavve iufala nao olketa disaepol bilong mi sapos iufala lovem narawan.” (John 13:35) Jesus tu barava showimaot hem lovem pipol bikos hem givim laef bilong hem nao for olketa. Olketa wea laekem God for sevem olketa mas lovem pipol tu.
(2) Jesus prea olsem long Dadi bilong hem: “Mi talemaot nem bilong iu long olketa.” (John 17:26) Jesus savve hem big samting long Dadi bilong hem for pipol iusim nem bilong hem, Jehovah. Jesus prea for nem bilong Dadi bilong hem “stap holy.” (Matthew 6:9) So iumi mas savve long datfala nem and tingim nem hia hem important and holy. Olsem Jesus duim, olketa wea laekem God for sevem olketa mas iusim nem bilong God. Olketa mas lanem pipol tu abaotem nem bilong God and olketa wei bilong hem. (Matthew 28:19, 20) For tok stret, pipol wea iusim nem bilong God nomoa bae kasem laef olowe.—Romans 10:13.
(3) Jesus sei olsem long Pontius Pilate: “Kingdom bilong mi hem no part bilong disfala world.” (John 18:36) No staka pipol distaem saedem Kingdom bilong God, wea hem gavman bilong God wea Jesus nao King long hem. Bat olketa saedem olketa gavman long world. Bat God bae sevem nomoa olketa wea sapotim Kingdom bilong Hem and wea talem pipol hao datfala Kingdom bae mekem olketa wea faithful for kasem nambawan living.—Matthew 4:17.
Bihaen olketa disaepol bilong Jesus luksavve wanem nao man mas duim mekem hem kasem laef, olketa sei: ‘Waswe, eniwan savve kasem laef tu?’ Jesus hem sei: “No eni samting wea man seleva duim savve mekem hem for kasem laef, bat God savve mekem man kasem laef bikos God savve duim eni samting.” (Luke 18:18-30) Olketa Jehovah’s Witness trae hard for duim olketa samting hia mekem olketa kasem laef. Olketa waka hard tu for helpem olketa narawan for kasem laef.