Famili Bilong Jesus​—Hu Nao Olketa?

LONG planti ples long world, long December iu savve lukim olketa piksa bilong baby Jesus long kea bilong mami bilong hem Mary, and dadi wea adoptim hem, Joseph. Olketa piksa olsem savve mekem nomata pipol wea no Christian for interest. From Jesus nao main wan long olketa piksa hia, wanem nao Bible talem iumi abaotem famili bilong Jesus long earth?

Jesus garem wanfala barava interesting famili. Hem born kam from wanfala virgin girl wea nem bilong hem Mary, and from datwan hem kamap member bilong famili bilong olketa man. Olsem Bible storyim, laef bilong hem go long bele bilong Mary thru long holy spirit. (Luke 1:30-35) Bifor disfala mirakol wei wea Jesus kamap insaed bele, Mary engage finis long wanfala man wea nem bilong hem Joseph, wea hem nao kamap dadi wea adoptim Jesus.

Bihaen Jesus born, Joseph and Mary garem olketa nara pikinini, olketa haf brata and sista bilong Jesus. Datwan hem klia from kwestin wea pipol long Nazareth askem abaotem Jesus bihaen: “Waswe, diswan nao son bilong carpenter? Waswe, nem bilong mami bilong hem Mary, and olketa brata bilong hem James and Joseph and Simon and Judas? And olketa sista bilong hem, waswe, olketa stap witim iumi?” (Matthew 1:25; 13:55, 56; Mark 6:3) Iumi savve lukim from diswan hao insaed famili bilong Jesus hem parents, fofala brata and maet tufala sista.

Bat, samfala distaem no biliv olketa brata and sista bilong Jesus olketa really pikinini bilong Joseph and Mary. Why nao olsem? New Catholic Encyclopedia sei: “From taem bifor kam, Church hem teachim hao Mary stap olsem virgin girl olowe. So, from diswan, iumi no savve daotem hao Mary nating garem eni nara pikinini.” Sem buk hia sei olketa toktok “brata” and “sista” savve minim “eniwan wea joinim wanfala religion or nara samting” or savve minim olketa relative, maet kasin.

Waswe, diswan hem stret? Nomata samfala savveman long Catholic, wea no agree witim samting wea disfala Church teachim, olketa saportim tingting hao Jesus garem olketa brata and sista. John P. Meier, president bifor bilong Catholic Bible Association of America, raet olsem: “Long N[iu] T[estament] disfala Greek toktok for “brata” taem olketa iusim no long tokpiksa wei bat for physical or legal samting hem minim really brata or haf brata, and no eniting moa.”a Tru nao, Bible showimaot hao Jesus garem olketa brata and sista wea born long Joseph and Mary.

Olketa Gospel storyim olketa nara relative bilong Jesus, bat distaem letem iumi lukluk long famili bilong Jesus and lukim wanem nao iumi savve lanem from olketa.

[Olketa Footnote]