Wanem Nao Bae Happen Long World?
WAN MIND LONG WORLD. Datwan here naes tumas. For sure, evriwan laekem datwan! Tru nao, staka story kamap abaotem diswan. Long olketa meeting bilong olketa world leader olketa evritaem story abaotem diswan. Long August 2000, winim 1,000 bigman bilong olketa religion hipap long United Nations long New York for datfala Millennium World Peace Summit. Olketa storyim wei for stretem olketa raoa wea gohed long world. Bat nomata datfala meeting tu no gohed long peaceful wei bikos long olketa raoa wea gohed long world. Wanfala savveman long Muslim law nating willing for attend bikos wanfala bigman bilong olketa Jew hem stap. Olketa narawan feel nogud from Dalai Lama no kasem invitation for attend long first tufala day, nogud datwan mekem China feel nogud.
Long October 2003, long datfala Asia-Pacific Economic Cooperation (APEC) meeting long Thailand, olketa nation raonem Pacific Ocean storyim hao for mekem world moa sef. Twenti-wan nation wea hipap promis for finisim olketa terrorist grup and agree long olketa difren wei for mekem world kamap moa sef. Nomata olsem, taem datfala meeting gohed, samfala komplen abaotem toktok bilong wanfala prime minister, and sei toktok bilong hem showimaot hem heitim and againstim olketa Jew.
Why Nao World No Garem Wan Mind?
Nomata plande toktok gohed abaotem wei for mekem world garem wan mind, iumi no lukim diswan kamap. Nomata plande pipol barava trae hard, why nao hem hard tumas kam kasem mek-21 century?
Part bilong ansa for diswan hem showaot long toktok bilong wanfala prime minister wea attendim datfala APEC meeting. Hem sei, “Pipol tinghae tumas long kantri bilong olketa seleva.” Tru nao, fasin for mekhae long kantri hem barava affectim feeling bilong olketa man. Evri nation and tribe laekem tumas for independent and rulim olketa seleva. Wei wea each kantri garem sovereign rul, witim fasin for laek winim narawan and greedy fasin, hem nao mekem bigfala problem kamap. Evritaem samting wea olketa ting bae helpem nation hem kam fastaem long samting wea bae helpem full world.
Man wea raetem psalm barava talem tru samting taem hem kolem wei for mekhae long kantri wanfala “sik wea mekem [pipol] safa.” (Psalm 91:3) Hem olsem wanfala nogud sik wea spoelem olketa man and mekem olketa barava safa. For plande handred year disfala wei for mekhae long kantri mekem pipol heitim pipol long nara kantri. Distaem, diswan gohed for divaedem pipol, and olketa ruler no savve stopem.
Plande bigman luksavve hao wei for mekhae long kantri and wei wea olketa kantri interest nomoa long olketa seleva hem samting wea kosim olketa problem bilong disfala world. Olsem example, U Thant, wea hem Secretary-General bilong United Nations bifor, hem sei: “Staka problem wea iumi feisim distaem hem from pipol garem olketa rong tingting . . . Wanfala nao hem wei for sei, ‘Nomata wanem, kantri bilong mi nao best wan.’” Nomata olsem, olketa nation distaem barava interest long olketa seleva nomoa and for rulim olketa seleva. Olketa wea garem paoa nating willing for lusim nomata lelebet long datwan. Olsem example, datfala International Herald Tribune niuspepa hem sei olsem abaotem European Union: “Hem wei bilong politik long olketa kantri long Europe for no trustim narawan or for trae winim narawan. Staka kantri insaed long EU nating acceptim olketa nara kantri for garem moa paoa or for lead.”
Word bilong God, Bible, hem stret taem hem storyim samting wea kamaot from rul bilong olketa man taem hem sei: “Taem man rulim narawan hem spoelem hem.” (Ecclesiastes 8:9) From olketa man divaedem world long olketa separate nation, olketa man wanwan and olketa sekson experiencem samting wea disfala Bible principle storyim: “Man wea stap seleva bae tingim nomoa samting wea hemseleva laekem; samting hem duim bae againstim evri gudfala wisdom.”—Proverbs 18:1.
Hem no plan bilong Creator wea savve long best samting for iumi, for olketa man garem olketa gavman and rulim olketa seleva. From olketa man duim diswan olketa showimaot olketa nating tingim plan bilong God and wei wea Jehovah ownim evri samting. Psalm 95:3-5 hem sei: “Jehovah hem wanfala nambawan God and wanfala nambawan King ovarem evri nara god, olketa deep ples long earth stap long hand bilong hem and top bilong olketa maunten olketa bilong hem; hem ownim tu sea and drae land wea hem wakem witim hand bilong hem.” God nao garem right for rulim olketa man and olketa man shud luksavve long datwan. Taem olketa nation aftarem wei for rulim olketa seleva, olketa againstim will bilong hem.—Psalm 2:2.
Wanem Nao World Needim?
Only wei wea world savve kamap wan mind hem for garem wanfala world paoa nomoa wea barava interest long need bilong evriwan. Plande pipol wea ting raonem diswan luksavve hao diswan nao samting iumi needim. Nomata olsem, plande long olketa putim hope long rong samting. Olsem example, plande pipol wea lukluk long diswan, and olketa bigman bilong religion tu, encouragem pipol for putim hope bilong olketa long United Nations for mekem wan mind kamap long world. Bat nomata olketa organization olsem laek for duim, olketa nating fit for stretem olketa problem bilong disfala world. Plande organization hia, olketa tu no garem wan mind, olsem samfala nation.
Bible givim warning for iumi no depend long olketa organization bilong man for stretem olketa problem taem hem sei: “No putim trust bilong iufala long olketa bigman, or son bilong man long earth, wea no savve givim salvation.” (Psalm 146:3) Waswe, diswan minim iumi no garem eni hope nao for wan mind kamap long world? Nomoa. Nara wei hem stap.
Staka pipol no luksavve hao God markem finis wanfala gavman wea fit for mekem world garem wan mind. Bible hem sei olsem abaotem Jehovah God: “Mi nao putim finis king bilong mi long Zion, holy maunten bilong mi. Askem mi, mekem mi givim olketa nation long iu and full earth olsem samting bilong iu.” (Psalm 2:6, 8) Lukim hao datfala scripture talem hao Jehovah God ‘putim finis king bilong hem,’ and long verse 7 hem kolem hem “son bilong mi.” Diswan nao nambawan spirit Son bilong God, Jesus Christ, wea kasem paoa ovarem evri nation.
Hao Wan Mind Long World Bae Kamap
Staka pipol no luksavve long disfala gavman bilong God long heven. Olketa nation barava hol strong long rul bilong olketa seleva wea olketa tingse datwan hem right bilong olketa. Bat God bae no acceptim olketa wea rejectim rul and gavman bilong hem. Psalm 2:9 hem sei olsem abaotem olketa wea nating willing for acceptim disfala arrangement: “Iu [datfala Son, Jesus Christ] bae brekem olketa witim iron stik, olsem clay dish iu bae pisisim olketa.” Nomata olketa nation luksavve or nomoa, samting wea olketa duim and wantem hem lead go long wei for againstim God. Lastfala buk bilong Bible storyim “olketa king bilong full earth” wea hipap for datfala “war bilong bigfala day bilong God Olmaeti.” (Revelation 16:14) Olketa nation and wei wea olketa divaed olobaot bae finis for olowe. Diswan bae openem wei for gavman bilong God duim waka bilong hem and no eni samting bae stopem.
From Jehovah God hem Sovereign Bilong Universe, hem bae iusim paoa long wisefala wei for mekem disfala world kamap wan mind thru long Son bilong hem. Gavman bilong God bae mekem trufala wan mind kamap and bae blessim evriwan wea lovem raeteous fasin. Hao sapos iu readim Psalm 72 long Bible bilong iu distaem? Datfala scripture storyim samting wea rul bilong God anda long Son bilong hem bae duim for olketa man. Pipol bae kasem trufala wan mind long world, and evri problem bilong olketa—nogud wei for rul, raf fasin, poor living, and kaen samting olsem—bae no stap nao.
Long world distaem wea divaed olobaot, plande pipol ting hem no fitim for man garem hope olsem. Bat hem barava fitim. Olketa promis bilong God nating fail bifor and bae no fail for kamap tru long future tu. (Isaiah 55:10, 11) Waswe, iu laek for lukim datwan kamap? Iu savve lukim. Nomata distaem, staka pipol redim olketa seleva for datwan. Olketa stap long evri difren nation, bat winim wei for faet, olketa wan mind anda long sovereign rul bilong God. (Isaiah 2:2-4) Hu nao olketa hia? Olketa nao Olketa Jehovah’s Witness. Hao sapos iu acceptim invitation for go long meeting bilong olketa? For sure bae iu hapi for kaban tugeta witim pipol wea savve helpem iu for stap anda long sovereign rul bilong God and enjoyim wan mind wea bae gohed for olowe.
[Olketa Piksa long page 7]
Pipol from evri nation redim olketa seleva for laef long world wea garem wan mind
[Piksa Credit Line long page 4]
Saeed Khan/AFP/Getty Images
[Olketa Piksa Credit Line long page 5]
Woman grieving: Igor Dutina/AFP/Getty Images; protesters: Said Khatib/AFP/Getty Images; armored cars: Joseph Barrak/AFP/Getty Images