Tru Worship Mekem Pipol Wan Mind
“Bae mi mekem olketa wan mind, olsem olketa sheepsheep insaed fence.”—MIC. 2:12.
1. Hao nao olketa samting wea God wakem showimaot wisdom bilong hem?
WANFALA man wea raetem psalm sei:“Jehovah, iu wakem staka samting tumas! Evri samting wea iu wakem showimaot iu wise tumas. Earth hem fulap witim olketa samting wea iu wakem.” (Ps. 104:24) Wisdom bilong God showaot long staka million difren kaen plant, insect, and animal wea waka tugeta for mekem evri samting gohed laef. Body bilong iumi tu garem staka difren part olsem olketa organ and sismol cell wea waka tugeta for mekem iumi healthy.
2. Olsem piksa long page 13 showimaot, why nao wei wea olketa Christian wan mind hem olsem mirakol?
2 Jehovah wakem olketa man long wei wea olketa needim narawan. Lukluk, wei, and savve bilong pipol hem difren. Jehovah wakem firstfala man and woman tu for showimaot olketa wei bilong hem, mekem olketa savve waka tugeta and helpem narawan. (Gen. 1:27; 2:18) Bat staka pipol long world distaem no fren witim God and no enitaem full world garem wan mind. (1 John 5:19) Dastawe taem iumi tingim hao firstfala Christian kongregeson garem wan mind, datwan olsem mirakol bikos kongregeson hia garem olketa difren pipol olsem olketa slave from Ephesus, olketa woman bilong Greece, olketa Jew man wea skul gud, and olketa wea worshipim idol bifor.—Acts 13:1; 17:4; 1 Thess. 1:9; 1 Tim. 6:1.
3. Hao nao Bible storyim wei wea olketa Christian waka gud tugeta? Wanem nao iumi bae storyim long disfala study?
3 Tru worship mekem pipol waka gud tugeta olsem olketa difren part long body bilong iumi. (Readim 1 Corinthians 12:12, 13.) Long disfala study, bae iumi storyim: Hao nao tru worship mekem pipol wan mind? Why nao Jehovah nomoa savve mekem pipol from evri difren kantri for wan mind? Wanem nao olketa samting wea Jehovah helpem iumi for winim wea savve spoelem wei for wan mind? And hao nao wei wea olketa tru Christian wan mind hem difren from olketa wea sei olketa Christian?
Hao Nao Tru Worship Mekem Pipol Wan Mind?
4. Hao nao tru worship mekem pipol wan mind?
4 Pipol wea followim tru worship luksavve Jehovah fit for rulim universe bikos hem nao wakem evri samting. (Rev. 4:11) So nomata living bilong olketa tru Christian no semsem and olketa stap long difren ples, evriwan obeyim olketa sem law bilong God and followim sem Bible principle. Olketa kolem Jehovah “Dadi” bilong olketa. (Isa. 64:8; Matt. 6:9) Dastawe evriwan olsem brata and sista and garem wan mind, olsem man wea raetem psalm hem sei: “Hem gud and naes tumas for olketa brata garem wan mind!”—Ps. 133:1.
5. Wanem nao mekem olketa tru Christian wan mind?
5 Nomata olketa tru Christian no perfect, olketa wan mind long worship bikos olketa lovem narawan. Jehovah nomoa lanem olketa for lovem narawan. (Readim 1 John 4:7, 8.) Bible sei: “Iufala mas sorre long narawan, kaen long olketa, hambol, no raf, and patient. Taem eniwan long iufala hem feel nogud long narawan, iufala no kros bat iufala mas forgivim narawan. Iufala mas forgivim narawan free nomoa, olsem Jehovah forgivim iufala. Bat witim evri gudfala wei hia, iufala mas lovem narawan bikos love nao hem nambawan wei wea mekem pipol wan mind.” (Col. 3:12-14) From love nao nambawan wei wea mekem pipol wan mind, datwan mekem pipol luksavve hu nao olketa tru Christian. Waswe, iuseleva lukim olketa tru Christian wan mind and barava difren from nara pipol?—John 13:35.
6. Hao nao Kingdom mekem iumi wan mind?
6 Olketa tru Christian wan mind tu bikos olketa savve Kingdom bilong God nomoa bae mekem gudfala living kamap. Olketa savve klosap nao disfala Kingdom bae finisim olketa gavman bilong man and bae mekem pipol wea obey for garem peace for olowe. (Isa. 11:4-9; Dan. 2:44) Dastawe olketa Christian followim disfala toktok bilong Jesus: “Olketa no olsem pipol long world, olsem mi tu no olsem pipol long world.” (John 17:16) Olketa tru Christian no joinim olketa war bat olketa garem wan mind nomata olketa stap long ples wea war gohed.
Wanfala Arrangement for Teachim Iumi
7, 8. Hao nao wei for followim wanem Bible talem helpem iumi for wan mind?
7 Olketa Christian long first century wan mind bikos Jesus iusim wanfala arrangement for strongim olketa. Olketa luksavve Jesus iusim governing body for teachim and leadim kongregeson. Olketa aposol and elder long Jerusalem nao insaed governing body. Olketa faithful man hia disaedem samting followim Word bilong God and olketa sendem olketa traveling overseer for talemaot datwan long olketa kongregeson. Bible sei olsem abaotem olketa overseer hia: “Taem olketa gogo long olketa taon, olketa storyim long olketa brata samting wea olketa aposol and elder long Jerusalem disaedem for evriwan mas followim.”—Acts 15:6, 19-22; 16:4.
8 Distaem hem semsem tu. Governing Body wea samfala anointed Christian nao insaed diswan, olketa helpem kongregeson raonem world for wan mind. Governing Body printim olketa buk long staka languis for helpem pipol fren gud witim God. Spiritual kaikai hia kam from Bible. So wanem olketa teachim hem no from man bat from Jehovah.—Isa. 54:13.
9. Hao nao waka wea iumi kasem from God helpem iumi for wan mind?
9 Olketa elder tu helpem iumi for wan mind bikos olketa leadim iumi long preaching waka. Taem iumi duim waka bilong God, datwan mekem iumi fren gud tugeta winim pipol long world wea duim hapitaem for fren gud tugeta. Christian kongregeson hem no ples for hapitaem, bat hem ples wea iumi praisem Jehovah and for helpem iumi duim waka for preachim gud nius, teachim pipol for kamap disaepol, and for strongim evriwan long kongregeson. (Rom. 1:11, 12; 1 Thess. 5:11; Heb. 10:24, 25) Dastawe aposol Paul sei: “Iufala stand strong witim wan mind and waka hard tugeta for helpem pipol garem faith long gud nius.”—Phil. 1:27.
10. Wanem nao samfala samting wea mekem pipol bilong God wan mind?
10 Pipol bilong Jehovah wan mind bikos olketa luksavve Jehovah nomoa fit for rul, olketa showimaot love long olketa brata and sista, luksavve Kingdom bilong God nomoa bae mekem gud living kamap, and respectim olketa wea God iusim for leadim olketa. Jehovah helpem iumi for lusim olketa nogud wei bilong iumi wea savve spoelem wan mind wea iumi garem.—Rom. 12:2.
Lusim Wei for Praod and Jealous
11. Why nao wei for praod mekem pipol no stap gud tugeta? Hao nao Jehovah helpem iumi for lusim datwan?
11 Wei for praod mekem pipol no stap gud tugeta. Praod man ting long hemseleva olsem hem gud winim narawan and laek tok praod abaotem hemseleva. Bat datwan savve mekem pipol no wan mind bikos hem savve mekem olketa narawan for jealous. Disaepol James sei: “Evrikaen wei for praod olsem hem nogud tumas.” (Jas. 4:16) Wei for luk daonem narawan no showimaot love. Jehovah nao nambawan example long wei for hambol bikos hem interest long iumi nomata iumi no perfect. David sei: “Hambol wei bilong iu [God] nao mekem mi garem bignem.” (2 Sam. 22:36) Bible teachim iumi for garem gudfala tingting mekem iumi savve lusim wei for praod. Paul sei: “Wanem nao mekem iu gud winim narawan? Evri samting wea iu garem, God nao givim long iu. Sapos olsem, hao nao iu tok praod and sei no eniwan givim iu olketa samting hia?”—1 Cor. 4:7.
12, 13. (a) Why nao iumi savve jealous? (b) Wanem gud samting nao savve kamap sapos iumi garem sem tingting olsem Jehovah abaotem narawan?
12 Wei for jealous tu savve spoelem wei for wan mind. From iumi sin, iumi savve “jealous” samfala taem and nomata iumi Christian for longtaem finis iumi savve jealous abaotem samting wea narawan duim, garem, privilege wea hem kasem, or savve wea hem garem. (Jas. 4:5) Maet wanfala brata wea garem famili jealous long singol brata from hem duim full-taem ministry, bat long semtaem maet singol brata jealous long hem tu bikos hem garem waef and pikinini. Wanem nao iumi mas duim mekem wei for jealous no spoelem wan mind wea iumi garem?
13 For helpem iumi no garem wei for jealous, tingim wanem Bible talem abaotem olketa anointed Christian long kongregeson. Bible storyim olketa olsem olketa difren part long body. (Readim 1 Corinthians 12:14-18.) Pipol savve lukim eye bilong iumi, bat olketa no savve lukim heart bilong iumi. Nomata olsem tufala evriwan important! Long sem wei tu, Jehovah tingim evriwan long kongregeson important nomata samfala duim waka wea narawan lukim or no lukim. So iumi tu mas garem sem tingting olsem Jehovah abaotem olketa brata. Iumi savve kaen and showimaot interest long narawan and no jealous. Taem iumi duim olsem, iumi helpem olketa tru Christian for wan mind wea hem barava difren from olketa wea sei olketa Christian.
Olketa wea Sei Olketa Christian No Wan Mind
14, 15. Wanem nao mekem olketa laea Christian divaed?
14 Olketa tru Christian wan mind, bat olketa wea sei olketa Christian nating wan mind. Long mek-4 century, olketa laea Christian kamap staka and wanfala heathen bigman long Rome start for kontrolem religion bilong olketa. From datwan religion hia kamap long staka ples. Then gogo olketa difren kantri no laek followim religion bilong Rome, so olketa startim church bilong olketa seleva.
15 Bat for staka handred year plande long olketa kantri hia faet againstim each other. Long mek-17 and mek-18 century, pipol long Britain, France, and America mekhae long kantri bilong olketa seleva and datwan kamap olsem religion bilong olketa. Long mek-19 and mek-20 century, wei for mekhae long kantri start for kamap main samting wea pipol tingim. Gogo olketa church divaed and kamap staka and plande long olketa church hia acceptim wei for mekhae long kantri. Nomata pipol go long war and faet againstim nara kantri, olketa faetem tu pipol bilong sem religion. Distaem olketa church divaed bikos olketa garem difren biliv and mekhae long kantri.
16. Wanem nao samfala samting wea mekem olketa church divaed?
16 Long mek-20 century, samfala church wea sei olketa Christian laekem olketa nara church for join tugeta mekem olketa wan mind. Nomata olketa traem datwan for staka year, samfala church nomoa join tugeta. Staka pipol wea go long church no agree yet long olketa kwestin abaotem evolution, wei for killim dae baby insaed bele, wei wea man durong witim man and woman durong witim woman, and wei for mekem olketa woman kamap priest. Long samfala church, olketa bigman trae for mekem pipol from difren church join tugeta moa long wei for talem pipol hao olketa teaching wea olketa no agree long hem bifor hem no important distaem. Bat datwan mekem pipol for no garem strongfala faith and hem nating mekem olketa church wan mind.
Tru Worship No Mekhae Long Kantri
17. Wanem nao profesi talem abaotem tru worship “long olketa last day”?
17 Nomata pipol long world no garem wan mind, olketa tru Christian difren. Profet Micah sei: “Bae [God] mekem olketa wan mind, olsem olketa sheepsheep insaed fence.” (Mic. 2:12) Toktok bilong Micah showimaot tru worship bae kamap hae winim wei for worshipim olketa laea god or for mekhae long kantri. Hem sei: “Long olketa last day, maunten wea haos bilong Jehovah hem stap bae kamap hae winim olketa maunten and no eni samting bae sekem datfala maunten, and bae hem mas hae winim olketa hill and plande pipol bae go long hem. Evri nara pipol bae obeyim god bilong olketa, bat iumi bae obeyim God bilong iumi Jehovah.”—Mic. 4:1, 5.
18. Wanem nao samfala change wea tru worship helpem iumi for mekem?
18 Micah talem tu hao tru worship bae mekem pipol wea enemy bifor for wan mind. Hem sei: “Pipol from staka kantri bae go and sei: ‘Kam, iufala pipol, and iumi go ap long maunten bilong Jehovah and long haos bilong God bilong Jacob, and hem bae teachim iumi long olketa wei bilong hem, and iumi bae followim.’ . . . And olketa bae hammerim naef for faet for kamap hou and spia bilong olketa for kamap naef for katem tree. Pipol long wanfala kantri bae no iusim naef for faetem pipol long narafala kantri, and olketa bae no lanem moa hao for faet.” (Mic. 4:2, 3) Olketa wea lusim wei for worshipim idol and wei for mekhae long kantri hapi bikos olketa worshipim Jehovah and garem wan mind. God hem teachim olketa for showimaot love.
19. Wei wea staka pipol wan mind for worshipim Jehovah showimaot wanem?
19 Wei wea olketa tru Christian wan mind hem spesol and hem showimaot Jehovah gohed for givim holy spirit for leadim pipol bilong hem. Winim enitaem bifor, pipol from staka kantri wan mind. Diswan barava kamap tru olsem wanem Revelation 7:9, 14 storyim, and hem showimaot klosap nao God bae talem olketa angel for let go long “fofala wind” wea bae finisim disfala nogud world. (Readim Revelation 7:1-4, 9, 10, 14.) Hem nambawan privilege for wan mind witim evri brata and sista long full world. Wanem nao iumi wanwan savve duim for mekem wan mind gohed? Bae iumi storyim long study bihaen.
Wanem Nao Ansa Bilong Iu?
• Hao nao tru worship mekem pipol wan mind?
• Wanem nao iumi savve duim mekem wei for jealous no spoelem wei wea iumi wan mind?
• Nomata pipol mekhae long kantri, why nao diswan no spoelem tru worship?
[Piksa long page 13]
Olketa Christian long first century kam from olketa difren ples and garem difren living
[Piksa long page 15]
Taem iu duim waka long Kingdom Hall, hao nao datwan savve mekem evriwan wan mind?