Chapter Wan
Wan Mind Long Worship Long Taem Bilong Iumi—Wanem Nao Hem Minim?
1, 2. (a) Wanem spesol samting nao affectim planti pipol long taem bilong iumi? (b) Wanem nambawan hope nao pipol witim honest heart olketa garem?
WANFALA spesol samting go ahed for happen raonem world—pipol start for garem wan mind long worship. Diswan mekem samfala million pipol from evri nation, tribe, and languis for kam tugeta. Evri year planti moa join kam. Bible kolem olketa hia “olketa witness” bilong Jehovah and “wanfala big crowd.” Olketa givim long God “holy service day and naet.” (Isaiah 43:10-12; Revelation 7:9-15) Why nao olketa duim datwan? Bikos olketa savve long Jehovah olsem datfala only tru God. Diswan muvim olketa for changem living bilong olketa for fitim olketa raeteous wei bilong hem. And tu, olketa lanem hao iumi stap long “olketa last day” bilong disfala wicked world, hao klosap nao God bae distroem world hia, and hao hem bae changem diswan witim paradaes niu world bilong hem.—2 Timothy 3:1-5, 13; 2 Peter 3:10-13.
2 Word bilong God hem promis: “Lelebet taem nomoa, and wicked wan bae finis . . . Bat olketa wea garem kwaet fasin bae kasem earth, and olketa bae hapi tumas long bigfala peace.” (Psalm 37:10, 11) “Olketa raeteous wan seleva bae kasem earth, and olketa bae stap olowe long hem.” (Psalm 37:29) “[God] bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.”—Revelation 21:4.
3. Hao nao wan mind long worship go ahed for kamap?
3 Olketa wea wan mind long trufala worship distaem nao kamap first pipol for stap insaed datfala niu world. Olketa lanem finis will bilong God and go ahed for duim best for followim datwan. For showimaot wei wea diswan hem important tumas, Jesus sei: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.” (John 17:3) Aposol John raet olsem: “World hem redy for finis and evri samting wea hem wantem tu, bat man wea duim will bilong God bae stap olowe.”—1 John 2:17.
Wanem Hem Really Minim
4. (a) Wanem nao wei for hipimap planti pipol for wan mind long worship long taem bilong iumi hem really minim? (b) Hao nao Bible storyim disfala wei for hipimap pipol?
4 Wanem nao wei for hipimap planti pipol for wan mind long worship long taem bilong iumi hem really minim? Diswan showimaot long klia wei hao iumi stap klosap tumas long end bilong disfala wicked world, and tu start bilong niu world bilong God wea kamap stretawe bihaen datwan. Iumi lukim olketa Bible profesi abaotem wei for hipimap pipol hia hem barava fulfill. Wanfala profesi olsem hem sei: “Hem mas happen long lastfala part bilong olketa day [olketa last day distaem] hao maunten bilong haos bilong Jehovah [haefala tru worship bilong hem] bae showimaot strong winim top bilong olketa maunten [winim eni nara wei for worship], . . and planti pipol mas go long diswan. And planti nation bae go and sei: ‘Kam, iufala pipol, and iumi go ap long maunten bilong Jehovah and long haos bilong God bilong Jacob; and hem bae teachim iumi abaotem olketa wei bilong hem, and iumi bae wakabaot long road bilong hem.’”—Micah 4:1, 2; Psalm 37:34.
5, 6. (a) Why nao hem stret for sei olketa nation tan go long Jehovah? (b) Wanem nao olketa kwestin wea iumi shud askem iumiseleva?
5 Nomata evriwan long olketa nation no go long spiritual haos bilong Jehovah for worship, planti million pipol from evri nation go ahed for duim datwan. Taem olketa lanem loving purpose and nambawan fasin bilong Jehovah God, diswan barava muvim heart bilong olketa. Long hambol wei olketa trae for faendaot abaotem wanem God mas kasem from olketa. Prea bilong olketa hem olsem bilong man wea raetem psalm wea sei: “Teachim mi for duim will bilong iu, from iu nao God bilong mi.”—Psalm 143:10.
6 Waswe, iu lukim iuseleva insaed long datfala big sekson bilong pipol wea Jehovah hipimap tugeta for wan mind long worship? Waswe, samting wea iu duim for followim instruction wea iu kasem from Word bilong hem showaot iu barava tinghae long wei wea Jehovah nao Start bilong diswan? Haomas change nao iu willing for duim for “wakabaot” long “road bilong hem”?
Hao for Kasem Diswan
7. (a) Wei for wan mind long worship bae go kasem wea? (b) Why nao hem important tumas for kamap worshiper bilong Jehovah distaem, and hao nao iumi savve helpem nara pipol for duim datwan?
7 Purpose bilong Jehovah hem for evri creation bilong hem wea garem savve for wan mind long trufala worship. Iumi barava luk forward long day wea evriwan wea laef bae worshipim datfala only tru God! (Psalm 103:19-22) Bat bifor datwan savve happen, Jehovah mas aotem evriwan wea no want for duim raeteous will bilong hem. From hem garem mercy, hem talem firstaem samting wea hem bae duim, mekem pipol evriwea garem chance for changem gogo bilong olketa. (Isaiah 55:6, 7) Dastawe, “long evri nation and tribe and languis and pipol,” disfala important toktok hem go aot long taem bilong iumi: “Fraet long God and givim hem glory, from hour bilong judgment bilong hem kam finis nao, and so worshipim Datwan wea mekem heven and earth and sea and evri wata.” (Revelation 14:6, 7) Waswe, iu acceptim finis disfala invitation? Sapos olsem, iu garem privilege for invaetem samfala moa for savve and worshipim trufala God.
8. Bihaen iumi lanem olketa main Bible teaching, iumi shud trae hard for muv ahed long wanem wei?
8 Hem no purpose bilong Jehovah for pipol wea worshipim hem sei olketa biliv long hem bat olketa go ahed for aftarem samting bilong seleva. God laekem pipol for kasem “stretfala savve long will bilong hem” and showimaot datwan insaed living bilong olketa. (Colossians 1:9, 10) So, pipol wea tinghae long olketa main teaching bilong Bible mas muv ahed for kamap mature Christian. Olketa laek for barava savve gud moa long Jehovah, for mekem savve bilong olketa long Word bilong hem kamap moa waed and deep, and for followim long wei wea moa big insaed living bilong olketa. Olketa trae for followim olketa fasin bilong Father bilong iumi long heven and for garem tingting bilong hem long olketa samting. Diswan muvim olketa for luk aotem olketa wei for share insaed disfala waka for sevem laef wea hem organizem long earth distaem. Waswe, iu laek for duim datwan tu?—Mark 13:10; Hebrews 5:12–6:3.
9. Wanem nao olketa wei wea mekem trufala wan mind savve kamap distaem?
9 Bible sei olketa wea servem Jehovah mas garem wan mind. (Ephesians 4:1-3) Disfala wan mind mas stap distaem, nomata iumi insaed long world wea divaed and iumiseleva stragol yet witim wei for no perfect. Jesus prea strong for evri disaepol bilong hem for kamap wan, for garem trufala wan mind. Wanem nao diswan bae minim? First samting, olketa mas garem gudfala wei for fren witim Jehovah and Son bilong hem. Mek-tu, olketa bae wan mind midolwan long olketa seleva. (John 17:20, 21) For kasem datfala goal, Jehovah iusim Christian kongregeson olsem organization for givim instruction long pipol bilong hem.
Wanem Nao Mekem Wan Mind Kamap?
10. (a) Wanem nao iumi mekem grow taem iumi iusim Bible for luksavve long ansa bilong olketa kwestin wea affectim iumi? (b) Lukluk gud long olketa point wea help for mekem olketa Christian garem wan mind taem iumi ansarem olketa kwestin wea stap long disfala paragraf.
10 Sevenfala main samting wea help for mekem wan mind long worship kamap stap long daon. Taem iu ansarem olketa kwestin wea stap andanit long olketa, ting abaotem hao each point affectim wei wea iu fren witim Jehovah and olketa nara Christian. Wei for ting raonem olketa point hia and chekim olketa scripture long Bible bilong iu bae helpem iu for mekem grow wisdom bilong God, wei for tingting, and fasin for luksavve—olketa fasin wea iumi evriwan needim. (Proverbs 5:1, 2; Philippians 1:9-11) Lukluk gud long each point hia.
(1) Iumi acceptim wei wea Jehovah garem raet for markem standard bilong gud and nogud samting. “Trust long Jehovah witim full heart bilong iu and no depend long savve bilong iuseleva. Long evri wei bilong iu, lisin long hem, and hemseleva nao bae stretem gogo bilong iu.”—Proverbs 3:5, 6.
Why nao iumi shud luk aotem kaonsel and instruction bilong Jehovah taem iumi disaedem samting? (Psalm 146:3-5; Isaiah 48:17)
(2) Iumi garem Word bilong God for leadim iumi. “Taem iufala kasem word bilong God, wea iufala herem from mifala, iufala acceptim, no olsem word bilong man, bat, olsem trufala word bilong God, wea waka insaed long iufala wea biliv.”—1 Thessalonians 2:13.
Why nao hem danger for duim nomoa wanem iumi “ting” hem stret? (Proverbs 14:12; Jeremiah 10:23, 24; 17:9)
Sapos iumi no savve long kaonsel wea Bible givim for wanfala point, wanem nao iumi shud duim? (Proverbs 2:3-5; 2 Timothy 3:16, 17)
(3) Iumi evriwan kasem gudfala samting from sem spiritual program. “Evri son bilong iu bae kamap pipol wea Jehovah teachim.” (Isaiah 54:13) “Letem iumi tingim and muvim each other for showimaot love and gudfala waka, no lusim wei for hipap tugeta, olsem fasin bilong samfala, bat encouragem each other, and duim long bigfala wei moa taem iufala lukim datfala day [for distroe] hem kam klosap.”—Hebrews 10:24, 25.
Wanem gudfala samting nao olketa wea mekius evribit long olketa arrangement bilong Jehovah for spiritual kaikai olketa kasem? (Isaiah 65:13, 14)
(4) Jesus Christ, and no eni man nao Leader bilong iumi. “Iufala, no letem eniwan kolem iufala Rabbi, from wanfala nomoa hem teacher bilong iufala, bat iufala evriwan olketa brata. And tu, no kolem eniwan father bilong iufala long earth, from wanfala nomoa hem Father bilong iufala, Datwan long heven. And olketa mas no kolem iufala ‘leader,’ from Leader bilong iufala hem wanfala, hem nao Christ.”—Matthew 23:8-10.
Waswe, eniwan long iumi shud ting iumiseleva moa hae winim narawan? (Romans 3:23, 24; 12:3)
(5) Iumi luk long Kingdom gavman bilong God olsem only hope for olketa man. “Iufala mas prea olsem: ‘Father bilong mifala wea stap long heven, letem nem bilong iu kamap holy. Letem kingdom bilong iu kam. Letem will bilong iu kamap long earth, olsem long heven.’ So, go ahed for luk aotem firstaem kingdom and raeteous fasin bilong hem.”—Matthew 6:9, 10, 33.
Hao nao wei “for luk aotem firstaem kingdom” hem help for protectim wei wea iumi wan mind? (Micah 4:3; 1 John 3:10-12)
(6) Holy spirit mekem olketa worshiper bilong Jehovah garem olketa fasin wea important for wan mind olsem Christian. “Olketa frut bilong spirit hem love, hapi, peace, long-safaring, kaenfala fasin, gudfala fasin, faith, kwaet fasin, fasin for kontrolem seleva.”—Galatians 5:22, 23.
Wanem nao iumi mas duim for spirit bilong God savve mekem frut bilong hem kamap insaed long iumi? (Acts 5:32)
Hao nao wei for garem spirit bilong God hem affectim wei wea iumi fren witim olketa nara Christian? (John 13:35; 1 John 4:8, 20, 21)
(7) Evri trufala worshiper bilong God share long waka for preachim gud nius bilong Kingdom. “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:14.
Wanem nao shud muvim iumi for want for share evribit long disfala preaching waka? (Matthew 22:37-39; Romans 10:10)
11. Taem iumi followim olketa truth bilong Bible insaed living bilong iumi, hao nao diswan affectim iumi?
11 Wei for worshipim Jehovah witim wan mind hem mekem iumi kamap moa klos long hem and mekem iumi fit for enjoyim gudfala wei for kaban witim olketa nara brata. Psalm 133:1 hem sei: “Lukim! Hem gud and naes tumas for olketa brata for stap tugeta witim wan mind!” Iumi kasem strong taem iumi lusim selfish fasin, dirty fasin, and raf fasin bilong world for hipap witim olketa wea barava lovem Jehovah and obeyim olketa law bilong hem!
Stap Klia Long Olketa Samting wea Savve Divaedem Iumi
12. Why nao iumi need for stap klia long feeling for independent?
12 For mekem iumi no spoelem disfala spesol wei for wan mind evriwea long world, iumi mas stap klia long olketa samting wea savve divaedem iumi. Wanfala nao hem feeling for independent from God and olketa law bilong hem. Jehovah helpem iumi for stap klia long datwan taem hem talemaot klia hao man wea startim diswan nao hem Satan datfala Devil. (2 Corinthians 4:4; Revelation 12:9) Satan nao switim Adam and Eve for no followim wanem God talem and for disaedem olketa samting wea againstim will bilong God. Samting wea kamaot from datwan nao trabol for tufala and for iumi. (Genesis 3:1-6, 17-19) Disfala world hem fulap witim feeling for independent from God and olketa law bilong hem. So iumi need for stopem datkaen feeling insaed long iumi.
13. Wanem nao bae showimaot sapos iumi barava prepare gud for living insaed raeteous niu world bilong God?
13 Olsem example, tingim nambawan promis bilong Jehovah for changem wicked world bilong distaem witim niu heven and niu earth wea “raeteous fasin bae stap.” (2 Peter 3:13) Waswe, datwan fit for muvim iumi for prepare for living long datfala taem wea raeteous fasin bae stap? Diswan minim for followim disfala kaonsel bilong Bible: “No lovem world or olketa samting insaed long world. Sapos eniwan lovem world, love bilong Father no stap insaed long hem.” (1 John 2:15) So, iumi barava stap klia from spirit bilong disfala world—independent tingting bilong hem, wei for ova tumas for tingim seleva, dirty and raf fasin bilong hem. Iumi mekem fasin for lisin long Jehovah and for obeyim hem from heart for kamap olsem fasin bilong iumi evritaem, nomata diswan hem againstim samting wea body wea no perfect hem wantem. Full laef bilong iumi shud pruvim hao tingting and samting wea muvim iumi hem will bilong God.—Psalm 40:8.
14. (a) Why nao hem important for kasholem chance distaem for lanem olketa wei bilong Jehovah and followim long living? (b) Hao nao olketa scripture wea stap long disfala paragraf fitim iu?
14 Long taem wea Jehovah markem finis for distroem disfala wicked system and evriwan wea laekem olketa wei bilong hem, Jehovah bae no hol bak. Hem bae no delayim datfala taem or changem olketa standard bilong hem for olketa wea still trae for hol strong long world and long semtaem olketa hafhaf for lanem and followim will bilong God. Distaem hem taem for duim samting! (Luke 13:23, 24; 17:32; 21:34-36) Hem naes tumas for lukim datfala big crowd kasholem disfala spesol chance and luk aotem instruction wea Jehovah provaedem thru long Word and organization bilong hem, and olketa wan mind for wakabaot long road bilong hem for kasem niu world! And taem iumi lanem moa samting abaotem Jehovah, bae iumi lovem and want for servem hem long wei wea moa big.
Review
• Wanem nao purpose bilong Jehovah saed long worship?
• Bihaen iumi lanem olketa main Bible teaching, iumi shud waka hard for muv ahed long wanem wei?
• Wanem nao iumi wanwan savve duim for wan mind witim olketa nara worshiper bilong Jehovah?
[Piksa long page 4]
‘Olketa wea garem kwaet fasin bae kasem earth and bae hapi tumas long bigfala peace’