Olketa Christian Showimaot Glory Bilong Jehovah
“Hapi nao eye bilong iufala bikos hem lukim, and ear bilong iufala bikos hem herem.”—MATTHEW 13:16.
1. Wanem kwestin nao iumi tingim taem iumi herem hao olketa Israelite fraet for go klosap long Moses taem olketa long Maunt Sinai?
OLKETA Israelite wea hipap long Maunt Sinai garem plande reason for laek fren gud witim Jehovah. Jehovah iusim paoa bilong hem for sevem olketa from Egypt. Hem lukaftarem olketa and givim kaikai and wata for olketa taem olketa stap long wilderness. Hem mekem olketa winim army bilong olketa Amalekite tu. (Exodus 14:26-31; 16:2–17:13) Then taem olketa camp long wilderness long botom long Maunt Sinai, olketa herem thunder and lukim laetning wea mekem olketa fraet tumas. Bihaen, olketa lukim Moses kam daon from Maunt Sinai, and feis bilong hem showimaot glory bilong Jehovah. Bat, winim wei for sapraes and tinghae long glory bilong Jehovah, olketa no laek for lukim. “Olketa fraet for kam klosap long [Moses].” (Exodus 19:10-19; 34:30) Jehovah duim staka samting finis for helpem olketa, so why nao olketa fraet for lukim glory bilong hem?
2. Why nao maet olketa Israelite fraet for lukim glory bilong God wea Moses showimaot?
2 Luk olsem main reason why olketa Israelite fraet hem bikos olketa tingim yet samting wea happen taem Jehovah panisim olketa from olketa chus for no obey and wakem datfala gold buluka. (Exodus 32:4, 35) Waswe, olketa tinghae and lanem eni samting from wea wei Jehovah disciplinem olketa? Staka nating duim datwan. Taem Moses hem klosap for dae, hem ting go bak long samting wea happen witim datfala gold buluka and olketa narataem wea olketa Israelite no obeyim Jehovah. Hem sei olsem long olketa: “Iufala bighed for no followim wanem God bilong iufala Jehovah hem talem, and iufala no showimaot faith long hem and nating lisin long voice bilong hem. Start from taem wea mi savve long iufala, iufala showimaot hao iufala bighed againstim Jehovah.”—Deuteronomy 9:15-24.
3. Wanem taem nao Moses kavarem feis bilong hem?
3 Tingim samting wea Moses duim from hem lukim wei wea olketa Israelite fraet. Bible hem sei: “Taem Moses hem finis for story witim olketa, hem kavarem feis bilong hem. Bat taem Moses hem go for story long Jehovah [insaed tabernacle] hem aotem datfala kava from feis bilong hem go kasem taem wea hem go aot. And hem go aot and talem olketa son bilong Israel olketa komand wea hem herem. And olketa son bilong Israel lukim hao skin long feis bilong Moses shaen tumas, and Moses kavarem bak feis bilong hem go kasem taem wea bae hem go story witim [Jehovah].” (Exodus 34:33-35) Why nao Moses kavarem feis bilong hem samfala taem? Wanem nao iumi lanem from diswan? Ansa bilong olketa kwestin hia savve helpem iumi for lukluk gud long wei wea iumi fren witim Jehovah.
Lusim Chance
4. Wanem nao Paul talem abaotem reason why Moses kavarem feis bilong hem?
4 Aposol Paul explainim hao tingting and samting wea stap long heart bilong olketa Israelite nao mekem Moses kavarem feis bilong hem. Hem sei: “Hard for olketa son bilong Israel luk strong long feis bilong Moses bikos feis bilong hem showimaot glory . . . Tingting bilong olketa kamap dark.” (2 Corinthians 3:7, 14) Datwan sorre samting! Olketa Israelite nao pipol wea Jehovah chusim, and hem laekem olketa for fren gud witim hem. (Exodus 19:4-6) Bat, olketa les for luk strong long glory bilong Jehovah wea hem showimaot. Winim wei for lovem Jehovah from heart and mind bilong olketa, samting wea olketa duim showimaot olketa tanawe from hem.
5, 6. (a) Wanem chance nao olketa Jew kasem wea semsem witim olketa Israelite long taem bilong Moses? (b) Long wanem wei nao olketa wea lisin olketa difren from olketa wea no lisin?
5 Long taem bilong olketa aposol sem samting hem happen tu. Kasem taem wea Paul kamap Christian, Jesus, wea hem nao bigfala Moses, hem duim part bilong hem finis for mekem kamap datfala niu covenant wea changem Law covenant. Thru long toktok and samting wea Jesus duim, hem showimaot glory bilong Jehovah long perfect wei. Paul raet olsem abaotem Jesus wea resurrect finis: “Hem showimaot glory bilong [God] and garem evribit olketa fasin bilong hem.” (Hebrews 1:3) Olketa Jew hia garem nambawan chance! Olketa garem chance for lisin long Son bilong God taem hem talem olketa toktok wea savve givim laef olowe! Bat sorre nao, staka wea Jesus preach long olketa, olketa no laek for lisin. Jesus storyim olketa hia taem hem talem disfala toktok from profesi bilong Isaiah: “Heart bilong pipol hia no laek for lisin, and ear bilong olketa herem bat olketa no duim, and olketa satem eye bilong olketa; mekem olketa nating savve lukluk witim eye and herehere witim ear and barava minim gud witim heart bilong olketa and tan kam bak, and mi healim olketa.”—Matthew 13:15; Isaiah 6:9, 10.
6 Olketa Jew hia barava difren from olketa disaepol bilong Jesus. Jesus sei olsem abaotem olketa disaepol: “Hapi nao eye bilong iufala bikos hem lukluk, and ear bilong iufala bikos hem herehere.” (Matthew 13:16) Olketa tru Christian barava laek for savve long Jehovah and servem hem. Olketa hapi for duim will bilong God wea Bible talem. From diswan, olketa anointed Christian showimaot glory bilong Jehovah taem olketa duim ministry bilong datfala niu covenant, and olketa nara sheep duim datwan tu.—2 Corinthians 3:6, 18.
Reason Why Samting Kavarem Gud Nius
7. Why nao iumi no sapraes long wei wea staka pipol rejectim gud nius?
7 Olsem iumi lukim finis, pipol long taem bilong Jesus and long taem bilong Moses, rejectim spesol chance wea olketa kasem. Distaem hem olsem tu. Staka pipol rejectim gud nius wea iumi preach abaotem. Iumi nating sapraes long datwan. Paul hem sei: “Sapos wanfala samting hem kavarem disfala gud nius wea iumi talemaot, wei wea hem haed hem kamap nomoa midolwan long olketa wea bae finis evribit, midolwan long olketa wea no biliv wea god bilong disfala world hem blindim mind bilong olketa.” (2 Corinthians 4:3, 4) Satan hem traem best for haedem disfala gud nius, bat pipol seleva tu kavarem feis bilong olketa bikos olketa no laek for lukim datwan.
8. Hao nao wei for no savve abaotem gud nius hem blindim pipol, and hao nao iumi savve stap klia from kaen wei olsem?
8 Tokpiksa eye bilong staka pipol hem blind bikos olketa no savve gud long God. Bible sei “tingting bilong [pipol bilong olketa nation] stap long darkness, and olketa stap farawe from laef wea God markem for olketa man, bikos olketa no savve.” (Ephesians 4:18) Bifor hem kamap Christian, Paul, wea hem savve tumas long Law, persecutim kongregeson bilong God bikos hem no savve abaotem gud nius. (1 Corinthians 15:9) Bat, Jehovah showimaot truth long hem. Paul hem sei: “Reason why hem showimaot mercy long mi hem bikos, from mi wanfala man wea barava needim diswan, mi kamap olsem example bilong wei wea Christ Jesus showimaot long-safaring long evriwan wea bae garem faith long hem mekem olketa kasem laef olowe.” (1 Timothy 1:16) Plande distaem tu olsem Paul, wea fastaem againstim truth bilong God bat distaem olketa servem Hem. Diswan showimaot hao hem important for iumi gohed for witness long pipol, nomata olketa wea againstim iumi tu. Long semtaem, wei wea iumi studyim Word bilong God evritaem and trae for minim datwan bae mekem iumi savve long wanem nao hem fitim and bae stopem iumi for duim samting wea bae mekem Jehovah feel nogud.
9, 10. (a) Hao nao olketa Jew long taem bilong olketa aposol showimaot olketa no laek lane and olketa strong for followim tingting bilong olketa seleva? (b) Waswe long olketa pipol long olketa church wea sei olketa Christian distaem? Explainim datwan.
9 Nara samting wea mekem plande no minim klia olketa spiritual samting hem wei wea olketa no laek lane and wei wea olketa strong for followim tingting bilong olketa seleva. Plande Jew rejectim Jesus and samting wea hem teachim bikos olketa barava strong for followim Law Bilong Moses. Bat samfala no olsem. Tingim hao bihaen Jesus resurrect, “bigfala sekson bilong olketa priest start for biliv.” (Acts 6:7) Nomata olsem, Paul sei olsem abaotem plande Jew: “Kam kasem distaem, sapos olketa readim olketa toktok bilong Moses, wanfala samting hem kavarem heart bilong olketa.” (2 Corinthians 3:15) Luk olsem Paul savve abaotem samting wea Jesus talem long olketa bigman bilong olketa Jew taem Jesus sei: “Iufala lukluk gud long olketa Scripture, from iufala tingse olketa bae mekem iufala for kasem laef olowe; bat olketa hia nao witness abaotem mi.” (John 5:39) Olketa scripture wea olketa barava lukluk gud long hem shud helpem olketa for luksavve hao Jesus nao Messiah. Bat, olketa Jew followim nomoa tingting bilong olketa seleva, and nomata Jesus tu, wea duim olketa mirakol, no savve helpem olketa.
10 Distaem plande long olketa church wea sei olketa Christian olsem tu. Olsem olketa Jew long taem bilong olketa aposol, ‘olketa garem strong for God; bat no followim stretfala savve.’ (Romans 10:2) Nomata samfala studyim Bible, olketa no laek for bilivim samting wea hem talem. Olketa no laek for acceptim wei wea Jehovah teachim pipol bilong hem thru long datfala faithful and wise slave wea hem nao olketa anointed Christian. (Matthew 24:45) Bat, iumi luksavve hao Jehovah hem teachim pipol bilong hem and hao wei for minim truth bilong God hem samting wea isisi for kamap. (Proverbs 4:18) Taem iumi letem Jehovah teachim iumi, iumi kasem savve abaotem plan and will bilong hem.
11. Hao nao wei for pipol bilivim nomoa samting wea olketa laek for bilivim, hem haedem truth from olketa?
11 Wei for bilivim nomoa samting wea olketa laek bilivim hem blindim plande nara pipol. Bible talem finis hao plande bae mekfani long pipol bilong God and datfala message wea olketa talemaot abaotem wei wea Jesus stap moa. Aposol Peter raet olsem: “Bat from olketa no willing, olketa no savve,” hao God hem mekem wanfala flood kamap long taem bilong Noah. (2 Peter 3:3-6) Long sem wei tu, plande wea sei olketa Christian acceptim hao Jehovah showimaot mercy, kaenfala fasin, and forgiveness; bat olketa no laek luksavve hao hem savve panisim man tu. (Exodus 34:6, 7) Olketa tru Christian trae hard for minim wanem nao Bible really teachim.
12. Hao nao wei wea pipol strong for followim olketa idea bilong church hem blindim olketa?
12 Wei for strong for followim olketa idea bilong church hem blindim staka pipol. Jesus sei olsem long olketa bigman bilong religion long taem bilong hem: “Iufala mekem word bilong God olsem samting nating from kastom bilong iufala.” (Matthew 15:6) Bihaen olketa kamap free from Babylon, olketa Jew strong for mekem tru worship kamap moa, bat olketa priest kamap praod and sei olketa seleva nomoa raeteous. Taem olketa celebratem olketa festival olketa no duim diswan from olketa tinghae long God. (Malachi 1:6-8) Kasem taem bilong Jesus, olketa scribe and Pharisee addim go plande idea bilong olketa seleva long datfala Law Bilong Moses. Jesus showimaot hao olketa man hia hypocrite bikos olketa no luksavve long olketa raeteous principle wea hem faondeson bilong Law. (Matthew 23:23, 24) Olketa tru Christian mas careful for no letem olketa idea bilong church for pullim olketa go difren from tru worship.
“Lukim Datwan wea Iumi No Savve Lukim”
13. Wanem nao tufala wei wea Moses lukim lelebet glory bilong God?
13 Moses ask for lukim glory bilong God long maunten, and Jehovah showim lelebet glory bilong hem wea shaen braet. Taem hem go long tabernacle, hem no kavarem feis bilong hem. Moses hem man wea garem bigfala faith and wea willing tumas for duim samting wea God laekem hem for duim. Nomata hem kasem privilege for lukim lelebet glory bilong Jehovah long vision, really, hem lukim finis God witim eye bilong faith. Bible sei Moses “gohed for stand strong olsem hem lukim Datwan wea iumi no savve lukim.” (Hebrews 11:27; Exodus 34:5-7) And hem showimaot glory bilong God thru long wei wea feis bilong hem shaen and thru long wei wea hem trae for helpem olketa Israelite for savve and servem Jehovah.
14. Long wanem wei nao Jesus lukim glory bilong God, and wanem nao hem hapi for duim?
14 Nomata bifor Jehovah creatim universe, Jesus hem lukim glory bilong God. (Proverbs 8:22, 30) From tufala stap tugeta for longfala taem tumas, Jehovah and Jesus kamap gud fren and barava lovem each other. Jehovah God hem showimaot hao hem barava lovem tumas disfala fasbon bilong evri creation. Jesus hem showimaot tu hao hem barava lovem tumas God wea givim hem laef. (John 14:31; 17:24) Disfala Dadi and Son garem perfect love for each other. Olsem Moses, Jesus hapi for showimaot glory bilong Jehovah thru long olketa samting wea hem teachim.
15. Long wanem wei nao olketa Christian lukluk long glory bilong God?
15 Olsem Moses and Jesus, olketa Witness bilong Jehovah long earth distaem, barava laek for lukluk long glory bilong Jehovah. Olketa no rejectim datfala nambawan gud nius. Aposol Paul raet olsem: “Bat taem man tan go long Jehovah [and duim will bilong hem], datfala samting wea kavarem heart hem aot nao.” (2 Corinthians 3:16) Iumi studyim Bible bikos iumi laek for duim will bilong God. Iumi barava tinghae long glory wea showaot long feis bilong Jesus Christ, datfala Son bilong Jehovah and King wea hem anointim, and iumi followim example bilong hem. Olsem Moses and Jesus, iumi kasem assignment for teachim olketa narawan abaotem nambawan God wea iumi worshipim.
16. Wanem gud samting nao iumi kasem from iumi savve long truth?
16 Jesus hem prea olsem: “Mi praisem iu long pablik, Dadi, . . . bikos iu haedem evri samting hia from olketa man wea garem bigfala savve, and iu showim long olketa baby.” (Matthew 11:25) Jehovah helpem olketa wea garem honest and hambol heart for minim olketa plan and olketa fasin bilong hem. (1 Corinthians 1:26-28) Hem protectim iumi and teachim iumi olketa samting wea bae helpem iumi, wea bae mekem iumi kasem best samting. Hem gud for iumi iusim evribit disfala chance for fren gud witim Jehovah, and tinghae long evri samting wea hem duim for helpem iumi savve gud long hem.
17. Hao nao bae iumi savve gud long olketa fasin bilong Jehovah?
17 Paul raet olsem long olketa anointed Christian: “From iumi, witim feis wea no kava, showimaot glory bilong Jehovah olsem olketa mirror, iumi isisi change go long sem glory olsem hem, and gohed for kasem moa glory.” (2 Corinthians 3:18) Nomata sapos hope bilong iumi hem for heven or earth, taem iumi savve moa samting abaotem olketa fasin bilong Jehovah wea iumi lanem from Bible, iumi bae isisi kamap olsem hem. Sapos iumi lukluk and tinghae long laef, ministry, and teaching bilong Jesus Christ, bae iumi savve showimaot olketa fasin bilong Jehovah long wei wea moabeta. Tru nao, iumi hapi tumas from iumi savve hao iumi givim praise long God bilong iumi, Datwan wea iumi trae for showimaot glory bilong hem!
Waswe, Iu Tingim?
• Why nao olketa Israelite fraet for lukim glory bilong God wea showaot long feis bilong Moses?
• Wanem nao olketa samting wea kavarem gud nius long taem bilong olketa aposol? and long taem bilong iumi?
• Hao nao iumi showimaot glory bilong God?
[Piksa long page 19]
Olketa Israelite fraet for lukluk long feis bilong Moses
[Olketa Piksa long page 21]
Olsem Paul, plande againstim truth bilong God fastaem bat distaem olketa servem Hem
[Olketa Piksa long page 23]
Olketa servant bilong Jehovah hapi for showimaot glory bilong God