“Jehovah Nao Man wea Helpem Mi”

Staka Laek for Worshipim Jehovah

OLKETA profesi bilong Bible abaotem distaem sei pipol from evri nation bae go long tru worship bilong Jehovah. Olsem example, thru long profet Haggai, Jehovah sei: “Mi bae sekem evri nation, and olketa barava spesol samting bilong evri nation mas kam insaed; and mi bae fulimap disfala haos witim glory.” (Haggai 2:7) Isaiah and Micah talem profesi hao distaem, wea hem nao “lastfala part bilong olketa day,” evri nation and olketa pipol bae worshipim Jehovah long wei wea hem appruvim.—Isaiah 2:2-4; Micah 4:1-4.

Waswe, olketa profesi olsem really fulfill distaem? Tingim olketa samting hia wea pruvim datwan. Long tenfala year wea go finis, winim 3,110,000 pipol from winim 230 kantri dedicatem olketa seleva for servem Jehovah. Tru nao, 6-fala long evri 10-fala Witness bilong Jehovah evriwea long world baptaes insaed datfala ten year. Long 2004, wanfala niu wan hem dedicate and kamap member bilong Christian kongregeson evri tufala minute!a

Distaem, olsem long first century, ‘plande pipol biliv and tan go long Lord.’ Nomata hem needim moa samting for pruvim God hem blessim pipol bilong hem winim wei wea namba bilong olketa hem kamap moa big, diswan hem showimaot hao “hand bilong Jehovah” stap witim pipol bilong hem. (Acts 11:21) Wanem nao mekem staka million pipol for kam worshipim Jehovah? And wanem nao feeling bilong iu abaotem diswan?

Pipol wea Garem Gud Heart Interest

Jesus hem tok stret olsem: “No eni man savve kam long mi sapos Father, wea sendem mi, no pullim hem.” (John 6:44) So really, Jehovah nao wan wea pullim kam pipol “wea garem fasin fitim laef olowe.” (Acts 13:48) Spirit bilong Jehovah savve mekem pipol luksavve long spiritual need bilong olketa. (Matthew 5:3) Conscience wea guilty, wei for barava lukaotem eni hope, or wanfala big trabol savve mekem samfala for lukaotem God and lane abaotem plan bilong hem for olketa man.—Mark 7:26-30; Luke 19:2-10.

Staka pipol laek for worshipim Jehovah bikos program bilong Christian kongregeson for teachim Bible helpem olketa for kasem ansa for olketa kwestin wea barava konfiusim olketa.

“Sapos God hem stap, why nao pipol gohed for safa from olketa samting wea no followim justice?” Hem nao kwestin wea Davide, wanfala man long Italy for salem drug tingting tumas abaotem. Hem no mas interest long religion, bat hem askem disfala kwestin for mekem raoa kamap nomoa. Hem sei, “Mi no ting bae mi kasem eni stret ansa wea bae mekem mi biliv. Bat, datfala Witness wea story witim mi hem barava patient and iusim olketa verse from Bible for sapotim wanem hem talem. Datfala story hem barava muvim mi.” Davide hem stretem laef bilong hem and distaem hem servem Jehovah.

Wei wea olketa narawan laek for savve why nao iumi laef, hem leadim olketa go long organization bilong Jehovah. Wanfala doctor for mind wea needim help for deal witim feeling bilong hemseleva, askem help from nara doctor long Zagreb, Croatia, wea staka pipol savve long hem. Hem sapraes taem datfala big doctor givim hem telephone namba bilong branch office bilong Olketa Jehovah Witness long Zagreb and nem bilong wanfala Witness wea hem savve long hem. Hem sei: “Mi tingse olketa pipol hia savve helpem iu. Sapos mi sendem iu go long church bae iu lukim olketa idol nomoa—no eniwan toktok, and tingting and spiritual saed bilong olketa hem dark nao. Long tingting bilong mi, no eniwan bae helpem iu long church. Mi sendem olketa narawan wea garem problem long Olketa Jehovah’s Witness finis, and mi tingse datwan bae best samting for iu tu.” Tufala Witness willing for visitim hem and no longtaem bihaen olketa startim wanfala Bible study witim hem. Tu-thri week bihaen, datfala doctor hapi and sei taem hem savve abaotem plan bilong God hem minim why nao hem laef.—Ecclesiastes 12:13.

Staka faendem hao truth from Bible hem only samting wea savve comfortim man taem problem kamap. Long Greece wanfala boy wea seven year hem dae from hem foldaon from ruf long skul bilong hem. Tu-thri month bihaen, tufala Witness meetim mami bilong hem and story abaotem hope bilong resurrection for comfortim hem. (John 5:28, 29) From datwan, datfala woman hem krae. Tufala sista hia askem hem: “Sapos iu laek for savve moa abaotem Bible, wanem taem nao bae mifala kam visitim iu?” Hem sei: “Distaem nao.” Datfala woman tekem olketa go long haos bilong hem and olketa startim wanfala Bible study. Distaem, full famili bilong woman hia olketa servem Jehovah.

Waswe, Iu Share Long Diswan?

Olketa kaen experience olsem happen evriwea long world. Jehovah hipimap and trainim wanfala big grup bilong pipol from evriwea long world wea worshipim hem. Disfala grup garem chance for sev taem disfala wicked world hem finis, wea datwan hem klosap for happen, and for stap insaed long wanfala raeteous niu world.—2 Peter 3:13.

From blessing bilong Jehovah, disfala spesol waka for hipimap pipol hem muv ahed, and no eni samting savve stopem diswan for win. (Isaiah 55:10, 11; Matthew 24:3, 14) Waswe, iu strong for share insaed disfala Kingdom-preaching waka? Sapos iu wanfala wea olsem, iu savve sure Jehovah bae sapotim iu and iu savve talem olketa toktok hia bilong man wea raetem psalm: “Jehovah nao man wea helpem mi.”—Psalm 121:2.

[Footnote]

[Blurb long page 9]

“No eni man savve kam long mi sapos Father, wea sendem mi, no pullim hem.”—JOHN 6:44

[Box long page 8]

HU NAO MEKEM OLKETA KAMAP STAKA?

“Sapos Jehovah no buildim haos, then hem iusles nomoa for olketa man waka hard for buildim.—Psalm 127:1.

“God gohed for mekem hem grow; dastawe man wea plantim or man wea watarem hem no important, bat God nao mekem grow.”—1 Corinthians 3:6, 7.