Kwestin From Reader

Wanem nao Jesus minim taem hem sei faithful slave bilong hem bae “wise”?

Jesus askem disfala kwestin: “Hu nao datfala faithful and wise slave wea masta bilong hem markem for lukaftarem olketa wakman bilong hem, for givim olketa kaikai long barava taem?” (Matthew 24:45) Datfala “slave” wea givimaot spiritual “kaikai” hem kongregeson bilong olketa anointed Christian wea spirit anointim. Why nao Jesus sei olketa wise?a

Best wei for iumi savve wanem nao Jesus minim taem hem iusim datfala word “wise” hem for iumi lukluk gud long teaching bilong hem. Olsem example, taem wea hem storyim “datfala faithful and wise slave,” Jesus givim tokpiksa abaotem tenfala young gele wea weitim man wea bae marit. Olketa young gele hia mekem iumi for tingim olketa anointed Christian bifor 1914 wea olketa barava weitim Man wea bae marit, wea hem nao Jesus Christ. Faevfala long tenfala gele hia no garem inaf oil taem man wea bae marit hem arrive, and olketa no attendim datfala marit feast. Nara faevfala olketa wise. Olketa garem inaf oil mekem olketa savve gohed for showimaot laet taem man wea bae marit hem arrive and hem letem olketa for attendim datfala feast.​—Matthew 25:10-​12.

Taem Jesus hem kamap King long 1914, plande long olketa anointed Christian tingse bae olketa go long heven long datfala taem. Bat olketa garem waka for duim yet long earth, and samfala no redi or willing for duim datwan. Olsem faevfala young gele wea no wise, olketa no strongim olketa seleva long spiritual wei firstaem, so olketa no redi for gohed showimaot laet. Bat plande long olketa duim samting wea wise and olketa strong long spiritual wei. Taem olketa savve hao plande waka stap yet for duim, olketa hapi for duim datwan. From diswan, hem showaot klia hao olketa nao “datfala faithful and wise slave.”

Tingim tu wei wea Jesus iusim datfala word “wise” long Matthew 7:​24. Jesus hem sei olsem: “Eniwan wea herem toktok bilong mi and duim, hem olsem wanfala wise man, wea buildim haos bilong hem antap long ston.” Man wea wise buildim haos bilong hem long strongfala faondeson, wea barava fitim taem bilong strongfala wind and rain. Bat man wea krangge hem buildim haos bilong hem long sand and bigfala wind and rain spoelem datfala haos. Dastawe, wanfala follower bilong Jesus wea wise bae lukim firstaem olketa nogud samting wea kamaot long wei for followim wisdom bilong man. From hem garem fasin for luksavve and gudfala tingting, faith bilong hem and samting wea hem duim and teachim bae garem strongfala faondeson long teaching bilong Jesus. “Datfala faithful and wise slave” bae duim olsem tu.

And tu, lukim wei wea plande transleison bilong Hebrew Scripture iusim datfala word wea iumi transleitim “wise.” Olsem example, Pharaoh markem Joseph for lukaftarem kaikai bilong olketa long Egypt. Diswan hem part long arrangement bilong Jehovah for givimaot kaikai long pipol bilong hem. Why nao Pharaoh chusim Joseph? Pharaoh hem sei long hem: “No eniwan hem wise olsem iu.” (Genesis 41:33-​39; 45:5) And tu, Bible talem hao Abigail garem “gudfala tingting.” Hem givim kaikai long David, man wea Jehovah nao anointim hem, and olketa man bilong hem. (1 Samuel 25:​3, 11, 18) Hem fitim for Bible sei Joseph and Abigail tufala wise, bikos tufala luksavve long will bilong God and duim datwan witim gudfala tingting and lukim samting wea bae happen.

Dastawe, taem Jesus storyim datfala faithful slave wea wise, hem talem hao olketa wea stand for datfala slave bae showimaot fasin for luksavve, gudfala tingting, and lukim samting wea bae happen. Diswan hem from faith wea olketa garem and samting wea olketa duim and teachim hem garem strongfala faondeson long Word bilong God.

[Footnote]