Fren Gud Witim God
Wanfala Dadi wea Winim Evri Nara Dadi
TAEM iumi herem datfala word “Dadi,” iumi savve garem bigfala feeling long heart bilong iumi. Dadi wea really lovem olketa pikinini bilong hem, helpem olketa for stap gud, hapi, and kasem gud samting. Dastawe plande taem Bible kolem Jehovah God “Dadi.” (Matthew 6:9) Wanem kaen Dadi nao Jehovah? For ansarem datwan, bae iumi lukluk gud long samting wea Jehovah talem long Jesus taem hem baptaes. Tru nao, wei wea dadi hem story long olketa pikinini bilong hem barava showimaot wanem kaen dadi nao hem.
Long samting olsem October 29 C.E., Jesus hem go long Jordan River for baptaes. Bible storyim wanem hem happen. Hem sei: “Bihaen hem baptaes finis Jesus hem kamaot from wata; and semtaem nomoa, skae hem open, and hem lukim spirit bilong God kam daon long hem olsem wanfala kurukuru. And tu, wanfala voice from heven hem sei: ‘Diswan nao Son bilong mi wea mi lovem and wea mi hapi tumas long hem.’ ”a (Matthew 3:16, 17) Jehovah nao talem naesfala toktok hia and datwan helpem iumi for savve wanem kaen Dadi nao hem. Tingim thrifala samting wea Jehovah talem long Son bilong hem.
First samting, taem Jehovah hem sei “diswan nao Son bilong mi,” hem olsem Jehovah hem sei, ‘Mi hapi tumas hao mi nao Dadi bilong iu.’ Dadi wea garem fasin for luksavve bae praisem and showimaot interest long olketa pikinini bilong hem from hem savve olketa barava needim datwan. Olketa narawan long famili need for talem olketa pikinini hao olketa tinghae long olketa. Tingim hao masbi Jesus barava hapi tumas taem Dadi bilong hem praisem hem olsem, nomata hem big finis!
Mek-tu samting, taem Jehovah kolem son bilong hem “datwan wea mi lovem,” hem talemaot long pablik hao hem lovem Jesus. So really, hem olsem Dadi hem sei, ‘Mi lovem iu.’ Gudfala dadi bae talem olketa pikinini hem lovem olketa. Kaen toktok olsem, and tu, wei for showimaot love wea olketa long famili shud garem for each other, hem helpem olketa pikinini stap gud and hapi. Taem Jesus herem Dadi bilong hem sei hem lovem hem, masbi datwan barava encouragem and muvim heart bilong Jesus!
Mek-thri samting, taem Jehovah sei “mi hapi tumas long iu,” hem olsem Jehovah sei, ‘Son bilong mi, mi barava hapi long samting wea iu duim.’ Dadi wea showimaot love hem lukaotem olketa chance for talem long olketa pikinini bilong hem hao hem hapi long olketa gudfala samting wea olketa talem and duim. Taem parents duim olsem, datwan strongim olketa pikinini and helpem olketa for no fraet. For sure Jesus barava kasem encouragement taem hem herem Dadi talem hao hem hapi tumas long hem!
Tru tumas, Jehovah hem wanfala Dadi wea winim evri nara dadi. Waswe, iu barava laek for garem dadi olsem? Sapos olsem, Bible talem hao iu savve fren gud witim Jehovah. Sapos iu garem faith and lane abaotem hem and traem best bilong iu for duim will bilong hem, hem bae laek for fren witim iu. Bible hem sei: “Fren gud witim God, and hem bae fren gud witim [iu].” (James 4:8) No eni samting bae mekem iu feel sef olsem wei for fren gud witim Jehovah God, wea hem best Dadi wea iumi savve garem!
[Footnote]
a Long story abaotem diswan long Gospel bilong Luke, Jehovah talem toktok “iu” taem hem sei: “Iu nao Son bilong mi wea mi lovem; mi hapi tumas long iu.”—Luke 3:22.