Niu Wastaoa Study Magasin
DISFALA magasin wea iu readim hem firstfala Wastaoa study magasin. Mifala laek for explainim olketa niu samting abaotem disfala magasin.
Mifala pablisim disfala study magasin for Olketa Jehovah’s Witness and olketa Bible student wea muv ahed long spiritual wei. Bae mifala pablisim diswan wantaem evri month and bae hem garem foa or maet faevfala study article insaed. Schedule wea talem date wea iumi bae studyim olketa article hia hem long front kava. Each issue long Wastaoa magasin for pablik (pablik magasin) bae garem difren piksa long kava bat disfala study magasin bae no garem datwan, from iumi bae no givimaot diswan long field ministry.
Long page 2 bilong disfala magasin, bae iu lukim shortfala toktok wea storyim goal bilong each study article or olketa study article wea join tugeta, and tu, wanfala list bilong olketa nara article wea insaed disfala magasin. Hem bae barava helpem olketa Wastaoa Study conductor for readim datwan taem olketa prepare for conductim olketa study wea interesting and wea helpem evriwan long olketa kongregeson meeting.
Bae iu lukim hao olketa study article lelebet short winim bifor. Diswan minim bae iumi garem moa taem for storyim olketa main scripture insaed Wastaoa Study. Mifala encouragem iu readim evri scripture long each study. Samfala scripture garem disfala toktok “readim” wea iumi shud readim and storyim long taem bilong Wastaoa Study. Sapos inaf taem hem stap, iumi savve readim olketa nara scripture tu. Long samfala article, samfala scripture bae garem disfala toktok “markem witim.” From olketa scripture hia no barava pruvim olketa main point long paragraf, bae iumi no readim olketa taem meeting bilong kongregeson hem gohed. Nomata olsem, olketa scripture wea garem datfala toktok “markem witim,” garem extra information wea hem interesting, or maet olketa sapotim olketa point wea iumi storyim. Mifala encouragem iu for readim olketa scripture olsem taem iu preparem Wastaoa bilong iu bifor long Wastaoa Study. Maet iu savve storyim olketa scripture hia taem iu givim koment.
Annual report bae no kamap moa insaed long Wastaoa magasin. Start long 2008, datfala report bae kamap olsem wanfala insert long Kingdom Ministry Bilong Iumi and insaed long Yearbook. Bat olsem mifala talem finis, disfala study magasin bae garem olketa nara article tu, no just olketa study article nomoa. Nomata plande long olketa article hia hem no for iumi storyim long olketa meeting bilong kongregeson, mifala encouragem iu for readim gud. Olketa article hia tu garem spiritual kaikai wea kam from “datfala faithful and wise slave.”—Matt. 24:45-47.
Last samting, datfala study magasin and pablik magasin tufala evriwan nao Wastaoa wea Talemaot Kingdom Bilong Jehovah. Page 2 bilong tufala magasin hia, garem wanfala paragraf wea semsem wea explainim goal bilong Wastaoa magasin. Tufala evriwan bae insaed datfala annual bound volume. And information from tufala evriwan bae kamap insaed datfala article “Waswe, Iu Remember?” long study magasin.
Start kam long 1879, nomata long taem bilong war, hard taem saed long selen, and persecution, The Watchtower hem evritaem talemaot truth abaotem Kingdom bilong God. Mifala prea for blessing bilong Jehovah mekem hem gohed olsem. And mifala prea tu for Jehovah blessim iu taem iu iusim gud disfala niu Wastaoa study magasin.