Olketa Barava Spesol Change for The Watchtower!
1 Tu-thri month bifor, olketa kongregeson kasem wanfala spesol announcement: Start long January 2008, The Watchtower bae garem tufala difren edition, wanfala for pablik and narawan for iumi olketa Witness! Maet diswan mekem iu laek for savve: ‘Long wanem wei nao tufala magasin hia bae difren? Why nao hem gud for garem tufala edition olsem? Waswe, eni niu samting bae kamap insaed long tufala niu edition hia?’
2 Difren Long Wanem Wei: Iumi bae kolem magasin wea garem date namba 1 insaed long month, Pablik Edition. Bae evri article insaed disfala magasin hem for helpem pipol long pablik. Iumi bae kolem magasin wea garem date namba 15 insaed long month Study Edition and bae iumi no offerim long field service. Bae hem garem evri study article for wan full month and olketa nara article tu wea bae helpem olketa Christian wea dedicate finis. Iumi olketa Witness bae interest for readim Pablik Edition bilong The Watchtower bat olketa main wan nao bae olketa wea no Witness wea respectim Bible. Bat long narasaed, Awake! bae still garem sem goal, wea hem nao for kasem interest bilong plande difren kaen pipol, insaed diswan hem olketa wea daotem God and Bible and olketa wea sei religion bilong olketa hem no Christian.
3 Why Diswan Hem Gud: Insaed long Study Edition, bae hem no need nao for explainim olketa toktok olsem “pioneer” long wei wea olketa wea no Witness savve minim. Disfala edition savve garem tu olketa information wea barava fitim Olketa Jehovah’s Witness and olketa Bible student wea muv ahed long spiritual wei. Waswe long Pablik Edition? From olketa topic wea olketa chusim and hao olketa raetem bae hem barava fitim pablik, man wea hem no Witness shud enjoyim wei for readim full magasin. Nomata olsem, evri Witness bilong Jehovah bae kasem gud samting taem olketa readim tu. From iumi bae offerim nomoa wanfala Watchtower witim wanfala Awake! each month long field ministry, bae iumi garem full month for ting raonem gudfala wei for offerim tufala magasin hia.
4 Olketa Niufala Samting Insaed: Olketa planim olketa niu kaen article for Pablik Edition bilong The Watchtower. Wanfala bae storyim olketa main Bible teaching long barava simpol wei. Narawan bae showimaot hao Bible savve helpem olketa famili. Magasin hia bae garem olketa study project for young pipol. Each magasin bae hem garem olketa article wea storyim olketa Bible verse wea teachim iumi abaotem olketa fasin bilong Jehovah.
5 Mifala prea hao Jehovah bae hem blessim disfala niu arrangement for The Watchtower. Iumi laekem for disfala magasin, and Awake! tu, for kasem plande moa pipol wea fit for herem datfala gud nius.—Matt. 10:11.