Samfala Niu Samting Long Study Magasin!
Mifala mekem samfala change long study magasin mekem hem luk naes and helpem iu taem iu studyim olketa nambawan samting long Bible.—Ps. 1:2; 119:97.
Start long 2008, iumi garem tufala Wastaoa magasin. Wanfala magasin hem for pablik and narawan hem for iumi Olketa Jehovah’s Witness and for olketa Bible study wea gohed gud.
Wanfala brata wea worshipim Jehovah for longtaem finis hem sei: “Mi laekem tumas firstfala Wastaoa study magasin and samting wea mi lanem barava helpem mi. Mi barava tinghae long wei wea study magasin helpem mi for minim olketa important samting long Bible. Thankiu tumas for disfala niu Wastaoa study magasin.” Nara brata sei: “Mi laekem tumas for studyim disfala niu study magasin and iusim Reference Bible.” Mifala savve iufala tu ting olsem.
Wei wea organization bilong Jehovah gohed for pablisim Wastaoa start long 1879 kam kasem distaem, showimaot Jehovah iusim holy spirit for leadim datfala waka. (Zech. 4:6) Long 133 year wea go pas, olketa changem kava bilong Wastaoa magasin samfala taem. Start long 2012, kava bilong study magasin bae garem naes piksa wea olketa drawim abaotem preaching waka. Datwan bae helpem iumi for tingim waka wea Jehovah talem iumi for duim for barava storyim gud Kingdom bilong God. (Acts 28:23) Long page 2, hem garem really foto bilong piksa wea olketa putim long front kava. Hem garem lelebet toktok tu abaotem wanem nao happen long datfala piksa and ples wea datwan hem happen. Olketa piksa hia bae helpem iumi for tingim wei wea pipol bilong Jehovah gohed for preachim gud nius “long evri ples long world.”—Matt. 24:14.
Wanem nao samfala nara change wea kamap long study magasin? Review box bae stap long first page bilong study article. Diswan bae helpem iu for luksavve long olketa main point taem iu readim and studyim datfala article. Brata wea conductim Wastaoa Study bae askem olketa kwestin long review box long end bilong study. Wastaoa bae garem moa spes long saed and hem bae isi for lukim namba long page and paragraf.
Long page 31 hem storyim niu article wea bae stap long Wastaoa wea hem nao “History Bilong Iumi.” Hem bae storyim samfala important samting wea happen long history bilong Olketa Jehovah’s Witness. Samfala taem tu, Wastaoa bae garem article wea garem title “Olketa Barava Willing” wea storyim samfala experience. Olketa experience hia bae storyim wei wea samfala brata and sista barava hapi taem olketa go long ples wea needim samfala pablisa for preach.
Mifala savve bae iu enjoyim wei for iusim disfala magasin for studyim Bible.
[Piksa long page 3]
1879
[Piksa long page 3]
1895
[Piksa long page 3]
1931
[Piksa long page 3]
1950
[Piksa long page 3]
1974
[Piksa long page 3]
2008