Disaed for Worshipim Jehovah Taem Iu Young
“Gohed duim olketa samting wea iu lanem finis and wea iu barava biliv long hem nao.”—2 TIM. 3:14.
1. Wanem nao tingting bilong Jehovah long olketa young Witness wea worshipim hem?
FROM Jehovah tinghae tumas long olketa young pipol wea worshipim hem, hem mekem man wea raetem psalm for talem diswan: “Pipol bilong iu bae laek givim olketa seleva long day bilong iu for faet. Long wei wea luk naes tumas, iu garem olketa young man bilong iu wea olsem wata long naet wea kamap long morning for watarem grass.” (Ps. 110:3) Tru tumas, Jehovah barava tinghae long olketa young pipol wea laek worshipim hem.
2. Hu nao savve laekem young pipol for aftarem olketa material samting?
2 Waswe, iu wanfala young wan long Christian kongregeson? Waswe, iu dedicate finis long Jehovah? Maet plande young wan no savve disaed sapos olketa bae worshipim trufala God or nomoa. Olketa bisnisman, skul teacher, and maet samfala fren and samfala long famili talem olketa young wan for aftarem nomoa olketa material samting. Taem olketa young wan aftarem olketa spiritual samting, plande taem pipol long world savve tok spoelem olketa. Bat taem iu worshipim trufala God, datwan nao nambawan samting wea iu savve duim long laef bilong iu. (Ps. 27:4) Tingim thrifala kwestin hia: Why nao iu mas worshipim God? Nomata pipol maet talem or duim samting for againstim iu, wanem nao bae helpem iu for faithful long Jehovah? Wanem nao olketa nambawan waka wea iu savve duim sapos iu gohed strong for worshipim God?
Best Samting Nao Hem for Worshipim Jehovah
3. Taem iumi tingim olketa samting wea Jehovah wakem, wanem nao iumi laek duim?
3 Why nao iu mas worshipim trufala God? Revelation 4:11 talem olsem: “Jehovah, iu nao God bilong mifala. Iu wakem evri samting and iu givim laef long olketa samting hia bikos hem nao wanem iu laek for duim. So hem fitim for mifala praisem iu and mekhae long iu from bigfala paoa bilong iu.” Jehovah nao nambawan God wea wakem evri samting. Earth bilong iumi luk naes fogud! Hem wakem olketa tree, flaoa, animal, sea, maunten, and olketa watafol tu. Psalm 104:24 talem olsem: “Earth hem fulap long olketa samting wea [God] wakem.” Iumi hapi tumas from Jehovah hem wakem gud tumas body and mind bilong iumi dastawe iumi savve hapi long olketa gudfala samting wea stap long earth! From iumi tinghae tumas long evri nambawan samting wea hem wakem, iumi laek worshipim hem!
4, 5. Wanem nao Joshua lukim wea mekem hem fren gud witim Jehovah?
4 Joshua wea leadim olketa Israelite, hem talem tu why nao iumi mas worshipim Jehovah. Taem hem klosap dae, hem talem pipol bilong God: “Iufala barava savve evri samting wea God bilong iufala Jehovah promisim long iufala hem kamap tru. No eni samting wea hem promisim hem fail. Evri promis bilong hem kamap tru.” Why nao Joshua fit for talem datwan?—Josh. 23:14.
5 Taem Joshua big kam long Egypt, hem herem promis bilong Jehovah for givim land for olketa Israelite. (Gen. 12:7; 50:24, 25; Ex. 3:8) Then Joshua lukim Jehovah duim samting wea hem promisim taem hem mekem Tenfala Trabol kasem Egypt. Gogo diswan mekem Pharaoh mas letem olketa Israelite go free from Egypt nao. Joshua stap tu taem Jehovah sevem olketa Israelite long Red Sea, and hem lukim tu Pharaoh and army bilong hem draon long datfala sea. Taem olketa Israelite wakabaot long datfala “barava drae ples,” wea nem bilong hem Sinai Desert, Joshua lukim Jehovah givim evri samting wea olketa Israelite needim. No eni Israelite hem hangre or thirsty gogo hem dae. (Deut. 8:3-5, 14-16; Josh. 24:5-7) Taem olketa Israelite redi for go insaed long Promis Land, Joshua lukim God helpem hem witim olketa nara Israelite for winim olketa strongfala nation long Canaan.—Josh. 10:14, 42.
6. Wanem nao bae helpem iu for laek worshipim God?
6 Joshua savve Jehovah duim samting wea Hem promisim evritaem. Dastawe hem sei olsem: “Mi and famili bilong mi, mifala bae worshipim Jehovah.” (Josh. 24:15) Waswe long iu? Taem iu tingim olketa promis bilong trufala God wea kamap finis and olketa wea bae kamap long future, waswe, datwan mekem iu laek worshipim God tu olsem Joshua?
7. Why nao man mas baptaes long wata?
7 Taem iu tingim olketa samting wea Jehovah wakem and olketa nambawan promis bilong hem, bae iu laek for dedicate long Jehovah and baptaes long wata for showimaot datwan. Olketa wea laek worshipim God mas baptaes. Jesus tu duim diswan. Bifor hem kamap Messiah, hem talem John Baptaesa for baptaesim hem. Why nao hem laek baptaes? Jesus talem olsem: “Mi kam daon from heven for duim samting wea man wea sendem mi hem laekem, no samting wea miseleva laekem.” (John 6:38) Jesus baptaes for showim long pipol hem laek duim samting wea Dadi bilong hem laekem.—Matt. 3:13-17.
8. Why nao Timothy laek worshipim God? Wanem nao maet iu need for duim?
8 Tingim tu Timothy, wanfala young Christian wea Jehovah givim staka gudfala waka long hem. Why nao Timothy laek worshipim trufala God? Bible talem hao Timothy ‘gohed for duim olketa samting wea hem lanem finis and wea hem barava biliv long hem.’ (2 Tim. 3:14) Sapos iu studyim Bible and lanem finis olketa teaching insaed and iu bilivim olketa teaching hia hem tru, iu mas disaed nao distaem. Timothy hem duim sem samting tu. Hem gud for storyim samting wea iu laek for duim long dadi and mami. Tufala witim olketa elder long kongregeson savve helpem iu for minim olketa mark insaed long Bible wea iu mas kasem bifor iu savve baptaes.—Readim Acts 8:12.
9. Taem iu baptaes, hao nao maet pipol ting long datwan?
9 Taem iu baptaes, diswan hem nambawan samting wea iu duim for worshipim trufala God. Taem iu duim diswan, hem olsem iu insaed wanfala big resis and prize bilong datwan nao hem laef olowe and bae iu hapi tu bikos iu duim wanem God laekem. (Heb. 12:2, 3) Famili bilong iu witim olketa fren bilong iu long kongregeson wea ran long datfala resis bae hapi tu long iu. Nambawan samting nao, Jehovah bae hapi tumas long iu. (Readim Proverbs 23:15.) Hem tru, maet samfala pipol no savve why nao iu laek worshipim Jehovah and maet olketa tingse iu no tingting gud. Maet olketa againstim iu tu. Nomata olsem, iu savve winim olketa hard samting hia.
Waswe Sapos Pipol Askem Kwestin Long Iu or Againstim Iu?
10, 11. (a) Taem iu disaed for worshipim God, wanem nao pipol maet askem long iu? (b) Hao nao Jesus ansarem pipol wea laek savve long biliv bilong hem? Wanem nao iu lanem from datwan?
10 Maet olketa wea iu skul witim, neiba, and relative no minim why nao iu disaed for worshipim Jehovah. Maet olketa askem kwestin long iu abaotem wanem iu bilivim. Wanem nao bae iu talem long olketa? Iu mas ting raonem wanem nao mekem iu laek worshipim Jehovah mekem iu savve story long olketa. And taem iu storyim wanem iu bilivim, hem gud for iu followim samting wea Jesus duim.
11 Taem olketa bigman bilong Jew religion askem Jesus abaotem resurrection, Jesus storyim wanfala scripture wea olketa nating tingim nomoa. (Ex. 3:6; Matt. 22:23, 31-33) Taem wanfala man wea teachim law askem Jesus wanem nao nambawan komandment, Jesus talem olketa scripture for helpem hem. Man hia hapi tumas long samting wea Jesus talem long hem. (Lev. 19:18; Deut. 6:5; Mark 12:28-34) Wei bilong Jesus for story and iusim olketa scripture hem mekem “pipol garem difren tingting long hem,” and pipol wea againstim hem no savve duim eni samting long hem tu. (John 7:32-46) Taem pipol askem iu abaotem biliv bilong iu, iusim Bible for ansarem olketa and duim “long hambol wei and wea showimaot respect.” (1 Pet. 3:15) Sapos iu no savve long ansa bilong kwestin, no trae for ansarem bat talem olketa bae iu kam bak bihaen iu savve long ansa. Then iusim Subject Index insaed long olketa December Wastaoa, Watch Tower Publications Index, or CD-ROM bilong Watchtower Library for faendem ansa. Sapos iu redi gud, bae iu “savve hao for ansarem” olketa.—Col. 4:6.
12. Taem pipol spoelem iu, why nao iu mas no wiki long datwan?
12 Taem iu disaed for worshipim God, maet pipol duim samfala nara samting tu long iu. Iu mas no forgetim Satan nao enemy bilong God wea rulim disfala world. (Readim 1 John 5:19.) No tingse evriwan bae hapi long iu or tok hae long iu. Maet samfala againstim iu and ‘tok nogud olowe abaotem iu.’ (1 Pet. 4:4) Bat tingim diswan, no iuseleva nomoa olsem. Pipol spoelem Jesus Christ tu. Aposol Peter kasem sem samting tu and hem talem diswan: “Olketa fren, long distaem iufala safa long olketa samting wea hem testim iufala. Nogud iufala sapraes tumas long diswan and iufala tingim diswan hem mas no kasem iufala olsem. Nomoa. Hem gud for iufala mas hapi nomoa, from iufala safa long wei wea Christ tu hem safa long hem.”—1 Pet. 4:12, 13.
13. Why nao olketa Christian mas hapi nomata pipol spoelem olketa?
13 From iu wanfala Christian, iu mas hapi nomata pipol spoelem iu or againstim iu. Why nao olsem? Bikos sapos world hapi long iu, datwan showimaot iu followim Satan nao and no God. Jesus talem diswan: “Iufala wea pipol tok hae long iufala, iufala keakea, bikos hem nao samting wea pipol bilong olketa bifor duim long olketa giaman profet.” (Luke 6:26) Sapos pipol spoelem iu, datwan showimaot Satan and sekson bilong hem kros long iu from iu worshipim Jehovah. (Readim Matthew 5:11, 12.) And nomata pipol ‘tok spoelem iu bikos long nem bilong Christ,’ iu hapi.—1 Pet. 4:14.
14. Taem man faithful long Jehovah nomata pipol againstim hem, wanem gud samting nao kamaot from diswan?
14 Taem iu faithful long Jehovah nomata pipol againstim iu, fofala gud samting nao kamaot from diswan. Iu mekem pipol savve long God and Son bilong hem. Iu bae strongim olketa Christian brata and sista. Maet samfala pipol laek savve long Jehovah. (Readim Philippians 1:12-14.) And taem Jehovah strongim iu long olketa hard taem wea kasem iu, bae iu lovem hem go moa.
Bae Iu “Garem Chance for Duim Staka Waka Moa”
15. Aposol Paul garem “chance” for duim wanem samting?
15 Aposol Paul storyim waka wea hem duim long Ephesus olsem: “Mi garem chance for duim staka waka moa.” (1 Cor. 16:8, 9) Hem garem chance for preachim gud nius long staka pipol long datfala taon and for mekem olketa kamap disaepol. From Paul iusim gud datfala chance, hem helpem staka pipol for savve long Jehovah and worshipim Hem.
16. Long 1919, wanem kaen waka nao olketa anointed Christian kasem?
16 Long 1919, Jesus Christ givim “staka waka” long olketa anointed Christian. (Rev. 3:8) Olketa barava busy for preachim gud nius and lanem pipol olketa trufala teaching long Bible. Wanem nao kamaot from disfala waka wea olketa duim? Staka pipol long earth herem gud nius, and distaem samting olsem seven million pipol nao hope for laef olowe insaed niu world bilong God.
17. Wanem “staka waka” nao hem stap wea iu savve duim?
17 “Staka waka” yet hem stap for evriwan wea worshipim Jehovah. Olketa wea barava busy for preachim gud nius olketa hapi tumas. Iufala young wan wea worshipim Jehovah, waswe, iufala tinghae long nambawan waka wea iufala savve duim for helpem pipol “biliv long datfala gud nius”? (Mark 1:14, 15) Waswe, enitaem iu tingting for regular pioneer or auxiliary pioneer? Olketa narafala waka wea iu savve duim tu hem for buildim olketa Kingdom Hall, waka long Bethel, spesol pioneer, or duim missionary waka. From klosap nao nogud world bilong Satan bae finis, lelebet taem nomoa stap for duim olketa waka hia. From diswan, waswe, iu ‘garem chance for duim eni waka’ hia?
‘Trustim Jehovah and Bae Iufala Luksavve Hem Gud Tumas’
18, 19. (a) Why nao David laek tumas for worshipim Jehovah? (b) Wanem nao David talem wea showimaot hem nating sorre from hem worshipim God?
18 Man wea raetem psalm hem talem pipol for ‘trustim Jehovah and bae olketa luksavve hem gud tumas.’ (Ps. 34:8) Taem King David hem wanfala shepherd long Israel bifor, Jehovah sevem hem from olketa wild animal. God helpem hem taem hem faetem Goliath and taem hem kasem staka trabol. (1 Sam. 17:32-51; Ps. 18, smol toktok front long disfala scripture) From David savve God hem barava kaen tumas long hem, hem talem disfala toktok: “God bilong mi, Jehovah, iu wakem plande nambawan samting for mifala and iu tingim mifala plande taem. No eniwan moa hem olsem iu.”—Ps. 40:5.
19 David lovem Jehovah tumas and hem barava laek for praisem Hem. (Readim Psalm 40:8-10.) Taem hem gogo for olo, hem nating sorre from hem worshipim trufala God long full laef bilong hem. Samting wea mekem David barava hapi tumas nao hem from hem faithful long God. David sei olsem: “Jehovah, iu nao Nambawan Lord. Iu nao mi trustim start kam from taem mi young yet. And nomata mi olo distaem and hair bilong mi hem white nao, plis God, iu no lusim mi.” (Ps. 71:5, 18) Nomata body bilong David hem no strong tumas olsem bifor, hem trustim Jehovah and fren gud go moa witim Hem.
20. Why nao wei for worshipim God hem best samting wea iu savve duim long laef?
20 Samting wea Joshua, David, and Timothy duim long laef bilong olketa hem showimaot best samting for iu duim nao hem for worshipim Jehovah. Olketa material samting savve helpem iu for lelebet taem nomoa, bat sapos iu ‘worshipim Jehovah’ datwan bae helpem iu for olowe. (Josh. 22:5) Sapos iu no dedicate long Jehovah yet, iu trae tingim diswan, ‘Why nao mi no kamap wanfala Witness bilong Jehovah yet?’ Sapos iu baptaes finis, waswe, iu laek hapi go moa? Sapos olsem, duim samfala samting moa long ministry and kamap wanfala strong Christian. Study bihaen long diswan bae storyim wanem nao iu savve duim for kamap strongfala Christian taem iu followim wei bilong aposol Paul.
Wanem Nao Ansa Bilong Iu?
• Why nao iumi mas worshipim God?
• Wanem nao helpem Timothy disaed for worshipim God?
• Nomata pipol againstim iu, why nao iu mas gohed faithful?
• Wanem waka nao iu savve duim?
[Piksa long page 18]
Best samting for duim long laef nao hem for worshipim Jehovah
[Piksa long page 19]
Taem pipol askem iu abaotem biliv bilong iu, waswe, iu savve ansarem olketa?