Baptaes Long Nem Bilong Dadi, Son, and Holy Spirit
“Iufala go and teachim pipol . . . for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit.”—MATT. 28:19.
1, 2. (a) Wanem nao happen long Jerusalem long Pentecost 33 C.E.? (b) Wanem nao mekem staka pipol baptaes?
LONG day bilong Pentecost 33 C.E., staka pipol from olketa difren ples kam long Jerusalem. Wanfala important hipap nao gohed long there and staka pipol nao kam for datwan. Bat wanfala samting wea no happen bifor hem happen. Bihaen datwan, aposol Peter givim tok wea mekem pipol barava bilivim wanem hem talem and olketa laek duim samting nao. Samting olsem 3,000 Jew and olketa wea followim religion bilong olketa Jew repent and baptaes long wata. Then olketa joinim niufala Christian kongregeson wea just start. (Acts 2:41) Taem staka pipol baptaes long olketa pool long Jerusalem, staka pipol nao mas story abaotem datwan!
2 Wanem nao mekem staka pipol hia baptaes? Long morning long datfala day, olketa herem “wanfala noise wea start kam long skae. Hem here olsem bigfala wind.” Long rum antap long wanfala haos, samting olsem 120 disaepol bilong Jesus kasem holy spirit. Bihaen datwan, olketa man and woman wea lotu gud olketa hipap kam and olketa laek tumas for herem olketa disaepol hia “toktok long olketa difren languis.” Taem staka pipol herem tok bilong Peter and wanem hem talem abaotem dae bilong Jesus, “olketa sorre tumas.” Wanem nao olketa mas duim? Peter sei: “Iufala mas repent and baptaes long nem bilong Jesus Christ. . . . Then iufala bae kasem datfala holy spirit.”—Acts 2:1-4, 36-38.
3. Long day bilong Pentecost, wanem nao olketa Jew and olketa wea followim religion bilong olketa Jew mas duim?
3 Tingim hao olketa Jew and olketa wea followim religion bilong olketa Jew worshipim God bifor olketa herem tok bilong Peter. Olketa bilivim finis Jehovah hem God bilong olketa. From olketa garem Hebrew Scripture, olketa savve holy spirit hem paoa bilong God wea hem iusim for wakem evri samting and for duim olketa nara samting tu. (Gen. 1:2; Judg. 14:5, 6; 1 Sam. 10:6; Ps. 33:6) Nomata olsem, olketa mas duim samfala samting moa. Olketa mas luksavve hao God iusim Messiah, wea hem nao Jesus, for sevem olketa and olketa mas biliv long Jesus. Dastawe Peter talem olketa for “baptaes long nem bilong Jesus Christ.” Long samfala day bifor, Jesus wea laef bak moa talem Peter and olketa narawan for baptaesim pipol “long nem bilong Dadi and bilong Son and bilong holy spirit.” (Matt. 28:19, 20) Datfala toktok garem bigfala mining long first century and distaem tu. Wanem nao hem minim?
Long Nem Bilong Dadi
4. Wanem nao Jehovah changem abaotem wei wea pipol savve fren witim hem?
4 Pipol wea duim wanem Peter talem olketa worshipim Jehovah and fren gud witim hem finis. Olketa trae for followim Law bilong hem dastawe staka from olketa nara kantri kam long Jerusalem. (Acts 2:5-11) Bat God changem wei wea pipol savve fren witim hem. Jehovah no ting long olketa Jew olsem spesol pipol bilong hem nao, and from Law hem finis, wei for followim Law no savve mekem God hapi. (Matt. 21:43; Col. 2:14) Sapos pipol hia laek for gohed fren witim Jehovah, olketa mas duim nara samting.
5, 6. Wanem nao staka Jew and olketa wea followim religion bilong olketa Jew duim mekem olketa savve fren witim God?
5 Olketa mas gohed for worshipim Jehovah wea givim laef long olketa. (Acts 4:24) Tru tumas, olketa wea lisin long Peter barava luksavve Jehovah hem Dadi wea kaen tumas long olketa. Hem sendem Messiah for sevem olketa and hem willing for forgivim pipol hia tu wea Peter storyim. Hem sei: “Pipol long Israel mas savve God mekem disfala man Jesus, wea iufala nilam long post, for hem Lord and Christ.” Pipol wea duim wanem Peter talem luksavve olketa mas barava tinghae long samting wea Dadi duim for evriwan wea laek fren witim God!—Readim Acts 2:30-36.
6 Tru tumas, olketa hia luksavve sapos olketa laek fren witim Jehovah, olketa mas luksavve Jehovah iusim Jesus nao for sevem olketa. Dastawe iumi savve why nao olketa repent from sin bilong olketa and repent from wei wea olketa join long wei for killim dae Jesus nomata olketa savve long datwan or nomoa. And iumi savve tu why nao long olketa day bihaen datwan “olketa hia gohed lane from olketa aposol.” (Acts 2:42) Olketa savve ‘story long God wea kaen tumas’ and bae olketa laek for duim datwan tu.—Heb. 4:16.
7. Wanem nao tingting bilong staka pipol abaotem God bifor olketa baptaes long nem bilong Dadi?
7 Distaem staka million difren kaen pipol lanem tru teaching long Bible abaotem Jehovah. (Isa. 2:2, 3) Samfala no bilivim God hem stap and samfala bilivim God hem stap bat hem no interest long olketa man. Gogo olketa hia bilivim olketa savve fren witim God. Olketa narawan worshipim trinity god or olketa difren kaen idol. Bat gogo olketa savve Jehovah nomoa God wea garem evri paoa, and distaem olketa iusim nem bilong hem taem olketa story long hem. Datwan followim wanem Jesus talem long olketa disaepol bilong hem hao olketa mas baptaes long nem bilong Dadi.
8. Wanem nao olketa wea no savve abaotem sin wea iumi kasem from Adam need for luksavve long hem abaotem Dadi?
8 Olketa lanem tu hao olketa kasem sin from Adam. (Rom. 5:12) Olketa no savve long diswan bifor, bat olketa mas bilivim hem tru samting. Olketa hia olsem man wea sik bat hem no savve wanem kaen sik nao kasem hem. Maet samfala samting showimaot hem sik, olsem wei wea body bilong hem savve soa. Bat from hem no savve wanem sik nao kasem hem, maet hem ting hem healthy nomoa. Nomata olsem, olketa samting wea kasem hem showimaot hem garem sik. (Markem witim 1 Corinthians 4:4.) Waswe sapos doctor talem hem wanem kaen sik nao kasem hem? Hem bae wise sapos hem lukaotem gudfala treatment and tekem datwan. Long sem wei tu, taem staka savve long tru samting abaotem sin wea iumi kasem, olketa luksavve Bible nao hem olsem treatment for olketa and olketa savve God nao bae mekem olketa gud bak. Tru tumas, olketa wea no fren witim Dadi long heven need for luksavve long God wea savve mekem olketa gud bak moa.—Eph. 4:17-19.
9. Wanem nao Jehovah duim for mekem iumi savve fren witim hem?
9 Sapos iu dedicate long Jehovah God and iu baptaes finis, iu savve hem barava gud for fren witim hem. Iu tinghae tu long wei wea Dadi bilong iu Jehovah hem lovem iu. (Readim Romans 5:8.) Nomata Adam and Eve sin againstim God, God duim samting for mekem olketa pikinini bilong tufala and iumi evriwan savve fren gud witim hem. Taem God givim Son bilong hem for iumi, hem mas sorre tumas taem hem lukim wei wea Son bilong hem safa and dae. From iumi savve long datwan, iumi luksavve God nao fit for rulim iumi and iumi obeyim olketa law bilong hem bikos iumi lovem hem. Sapos iu no baptaes yet, iumi storyim finis staka samting wea savve mekem iu laek dedicate long God and baptaes.
Long Nem Bilong Son
10, 11. (a) Storyim wei wea iu tinghae long Jesus. (b) Wanem nao tingting bilong iu abaotem wei wea Jesus dae for sevem iu?
10 Tingim moa samting wea Peter talem long pipol wea hipap. Hem mekhae long wei for biliv long Jesus, wea datwan hem join witim wei for baptaes “long nem . . . bilong Son.” Why nao hem important for duim olsem long datfala taem and distaem tu? Tru tumas, wei for biliv long Jesus and baptaes long nem bilong hem, hem minim iumi luksavve long wanem Jesus duim for mekem iumi savve fren witim Jehovah. Jesus mas dae long post mekem hem finisim curse wea olketa Jew kasem from olketa no duim wanem Law talem. Nomata olsem, iumi kasem staka gud samting from Jesus dae for iumi. (Gal. 3:13) Hem givim laef bilong hem, wea datwan hem price wea olketa man needim for sevem olketa. (Eph. 2:15, 16; Col. 1:20; 1 John 2:1, 2) Jesus gohed strong nomata hem kasem olketa nogud samting, pipol tok spoelem hem, killim hem nogud, and gogo hem dae. Hem duim olsem mekem olketa man kasem gud samting. Waswe, iu barava tinghae long wanem hem duim? Tingim sapos iu nao boy wea 12 year wea insaed long datfala ship Titanic, wea bangem bigfala ice and hem sink daon long year 1912. Iu trae for jamp go insaed long laefboat, bat hem full finis. Then wanfala man wea insaed long laefboat hem kissim waef bilong hem, hem jamp go bak insaed long ship, and hem letem iu nao for go long laefboat. Hao nao tingting bilong iu long man hia? Iu bae barava tinghae long hem! Iu bae barava minim feeling bilong boy wea disfala tru samting kasem hem.a Bat tingim Jesus, hem nao duim barava big samting for iu. Hem dae for mekem iumi savve laef olowe.
11 Hao nao tingting bilong iu taem iu savve long wanem Son bilong God duim for iu? (Readim 2 Corinthians 5:14, 15.) Maet iu barava tinghae long hem. Datwan helpem iu for dedicate long God and for ‘iusim laef bilong iu, no for duim samting wea iuseleva laekem, bat for followim man wea dae for iu.’ Taem iu baptaes long nem bilong Son, hem minim iu luksavve long wanem Jesus duim for iu and iu luksavve hem nao “man wea God markem for givim laef long pipol.” (Acts 3:15; 5:31) Bifor iu study, iu no fren witim God and iu no garem hope tu. Bat from iu showimaot faith long Jesus Christ and iu baptaes, distaem iu fren witim Dadi long heven. (Eph. 2:12, 13) Aposol Paul sei: “Long bifor, iufala no followim God and iufala enemy bilong hem bikos iufala tingting nomoa for duim olketa rabis samting. Bat distaem God mekem iufala savve fren bak witim hem taem hem mekem Jesus kamap man and dae mekem iufala kamap pipol wea holy and klin.”—Col. 1:21, 22.
12, 13. (a) From iu baptaes long nem bilong Son, wanem nao bae iu duim sapos wanfala man mekem iu feel nogud? (b) From iu baptaes long nem bilong Jesus, wanem nao iu mas duim?
12 Nomata iu baptaes long nem bilong Son, iu luksavve iu born sin and duim olketa samting wea no stret. Hem gud for iu tingim datwan evritaem. Tingim sapos wanfala man mekem iu feel nogud. Waswe, iu forgetim nao hao iutufala evriwan born sin? Iutufala evriwan needim God for forgivim iutufala and iutufala shud forgivim iutufala tu. (Mark 11:25) Jesus storyim wanfala tokpiksa for mekhae long datwan. Hem story abaotem king wea talem wakaman bilong hem for no changem bak kaon bilong hem wea hem 60 million denarii. Bat wakaman hia go askem nara wakaman wea kaonem 100 denarii nomoa long hem for mas changem bak datfala kaon. Then Jesus strongim disfala point hao Jehovah bae no forgivim man wea no forgivim brata bilong hem. (Matt. 18:23-35) Tru tumas, taem man baptaes long nem bilong Son, datwan minim hem luksavve Jesus nao man wea God markem for givim laef long pipol and hem mas waka hard for followim wei bilong Jesus and duim wanem Jesus teachim, olsem for man mas willing for forgivim narawan.—1 Pet. 2:21; 1 John 2:6.
13 Bat from iumi no perfect, iumi no savve followim gud wei bilong Jesus. Nomata olsem, from iumi lovem God and iumi dedicate long hem, iumi laek for followim wei bilong Jesus. Iumi mas gohed waka hard for lusim olketa rabis wei bilong iumi and garem olketa gudfala wei. (Readim Ephesians 4:20-24.) Tingim diswan. Taem iu respectim fren bilong iu, maet gogo iu trae for followim example bilong hem and olketa gudfala wei bilong hem. Long sem wei tu, bae iu laek for lane from Christ and followim wei bilong hem.
14. Wanem nao iu savve duim for showimaot iu luksavve Jesus hem King long heven?
14 Iu savve duim nara samting tu for showimaot wanem hem minim for baptaes long nem bilong Son. God “mekem evri samting for stap anda long leg bilong [Jesus] and hem mekem hem hed long evri samting long kongregeson.” (Eph. 1:22) So iu mas respectim Jesus and wei wea hem leadim pipol wea dedicate long Jehovah. Christ iusim olketa man wea no perfect for leadim kongregeson, wea main wan nao hem olketa elder. Iumi garem olketa elder for ‘stretem olketa holy wan and for strongim body bilong Christ.’ (Eph. 4:11, 12) Nomata olketa man duim mistek, from Jesus hem King long Kingdom long heven, hem savve stretem datwan long taem wea hem markem and wea followim tingting bilong hem. Waswe, iu bilivim datwan?
15. Sapos iu no baptaes yet, olketa wanem blessing nao iu savve kasem taem iu baptaes?
15 Hem tru, samfala no dedicate yet long Jehovah and baptaes. Sapos iu no baptaes yet, taem iu tingim olketa samting wea iumi storyim finis, waswe, iu tingse hem fitim for iu luksavve long Son bilong God and tinghae long hem? Taem iu baptaes long nem bilong Son, iu bae kasem staka nambawan blessing.—Readim John 10:9-11.
Long Nem Bilong Holy Spirit
16, 17. Wanem nao hem minim for baptaes long nem bilong holy spirit?
16 Wanem nao hem minim for baptaes long nem bilong holy spirit? Iumi storyim finis hao pipol wea herehere long Peter long Pentecost savve wanem nao holy spirit. Olketa lukim long eye bilong olketa tu hao God gohed for iusim holy spirit bilong hem. Peter nao wanfala wea “kasem holy spirit and [hem] start for toktok long olketa difren languis.” (Acts 2:4, 8) Datfala toktok “long nem bilong” no evritaem minim nem bilong wanfala man. Distaem pipol duim staka samting “long nem bilong gavman,” nomata gavman hem no wanfala man. Gavman nao givim paoa long olketa for duim samting. Long sem wei tu, man wea baptaes long nem bilong holy spirit hem luksavve holy spirit hem no wanfala man, bat hem paoa bilong Jehovah. And taem man baptaes long wei olsem, hem showimaot hem luksavve God iusim holy spirit for mekem plan bilong hem kamap tru.
17 From iu studyim Bible iu savve wanem nao holy spirit. Iu minim hao God iusim holy spirit for helpem olketa man raetem Bible. (2 Tim. 3:16) Taem iu gohed for study, iu bae barava minim gud hao ‘Dadi long heven givim holy spirit long olketa wea askem hem’ and long iu tu. (Luke 11:13) Maet iu tu luksavve holy spirit helpem iu. Bat sapos iu no baptaes yet long nem bilong holy spirit, promis wea Jesus talem hao Dadi bilong hem bae givim holy spirit minim iu bae kasem olketa nambawan blessing long future taem iu kasem datfala holy spirit.
18. Olketa wea baptaes long nem bilong holy spirit kasem olketa wanem blessing?
18 Distaem tu iumi luksavve Jehovah iusim holy spirit for leadim Christian kongregeson. Holy spirit helpem iumi wanwan long samting wea iumi duim evriday. From iumi baptaes long nem bilong holy spirit, iumi luksavve hao holy spirit savve helpem iumi, and iumi hapi for datfala spirit leadim iumi. Bat samfala laek for savve, hao nao iumi savve gohed duim wanem iumi promisim long Jehovah and long wanem wei nao holy spirit helpem iumi? Iumi bae storyim diswan long study bihaen.
[Footnote]
a Lukim Awake! October 22, 1981, page 3-8.
Waswe, Iu Tingim Yet?
• Wanem nao hem minim for baptaes long nem bilong Dadi?
• Wanem nao hem minim for baptaes long nem bilong Son?
• Wanem nao iu savve duim for showimaot iu tinghae long wei for baptaes long nem bilong Dadi and bilong Son?
• Wanem nao hem minim for baptaes long nem bilong holy spirit?
[Olketa Piksa long page 10]
Bihaen long Pentecost 33 C.E., long wanem wei nao olketa niu disaepol savve fren witim God?
[Credit Line]
By permission of the Israel Museum, Jerusalem