Chapter 1

Worship withim Wan Mind—Wanem Nao Hem Mas Meanim long Yu?

1, 2. (a) Wanem samting nao mekem trufela way for worship withim wan mind kamap long taem bilong yumi? (b) Hao nao Bible story abaot samting wea happen distaem?

PLANTI pipol raonem earth they start for worship withim wan mind. Diswan hem mekem pipol bilong every nation and tribe and langwis for kam tugeta. Wan mind bilong them hem no from they agree for followim belief bilong other pipol. They no kasem diswan from they hold back for tok againstim living wea no fitim Word bilong God. So hao nao they kasem diswan? Diswan hem from pipol bilong every different kaen living they kasem savvy abaot Jehovah olsem only tru God and they willing for change-im laef bilong them for fitim olketa raeteous way bilong hem.​—⁠Lukim Revelation 15:3, 4.

² Diswan hem fulfillim wanfela profesi wea profet Micah raetem abaot 2,700 year bifor. Taem hem story abaot “lastfela part bilong olketa day,” hem raet olsem: “Planti nation bae go and say: ‘Kam, yufela pipol, and letem yumi go ap long maunten bilong Jehovah and long haos bilong God bilong Jacob; and hem bae teachim yumi abaot olketa way bilong hem, and yumi bae wakabaot long road bilong hem.’” (Mic. 4:1, 2)a Waswe, yu lukim diswan happen?

3, 4. (a) Long wanem way nao “olketa nation” they tan go long Jehovah? (b) Wanem nao olketa question wea yumi mas askim yumi seleva?

³ No any full “nation” go long spiritual haos bilong Jehovah for worship. But pipol wanwan from olketa nation they duim diswan. Taem they learn abaot loving purpose and barava nambawan fashion bilong Jehovah God, diswan muvim heart bilong them. Long humble way they lukaotem samting wea God wantim them for duim. Prayer bilong them hem olsem David, man bilong faith wea say: “Teachim mi for duim will bilong yu, from yu God bilong mi.”—Ps. 143:10.

⁴ Waswe, yu lukim yuseleva midlwan long disfela bigfela sekson wea worshipim Jehovah? Waswe, samting wea yu duim for followim instruction wea yu kasem hem prove-im yu barava ting hae long way wea diswan start kam from Jehovah? Waswe, yu really ‘wakabaot long road bilong hem’?

Hao Diswan Kamap

5. (a) Go-go, wan mind long worship bae go kasem wea? (b) Why nao hem important for kamap worshiper bilong Jehovah distaem? Hao nao yumi savvy helpem other pipol for duim diswan?

⁵ Purpose bilong Jehovah hem for every creation wea garem savvy for wan mind long worship—no anywan followim giaman way, no anywan olabaot from they fail for faendem really meaning bilong laef. Yumi barava luk forward long day wea everywan wea laef bae blessim only tru God! (Ps. 103:19-22) But bifor datwan savvy happen, Jehovah mas aotem olketa wea les long loving kingship bilong hem and want for spoelem laef bilong other pipol. Long way bilong mercy hem talem firstaem samting wea hem bae duim. Pipol everywea garem chance for change-im living bilong them. Dastawe long taem bilong yumi, disfela important toktok hem go aot everywea long world: “Fraet long God and givim hem glory, from hour bilong judgment bilong hem kam finis, so worshipim dat Wan wea mekem heven and earth and sea and every wata.” (Rev. 14:6, 7) Waswe, yu acceptim finis datfela invitation? Sapos olsem, yu garem privilege for work withim organization bilong Jehovah for helpem other pipol for duim sem samting.

6. Taem yumi learnim finis olketa main teaching bilong Bible, yumi mas trae hard for muv ahed long wanem way?

⁶ Hem no purpose bilong God for bringim pipol insaed organization bilong hem wea say they believim Jehovah and they want for stap long Paradaes but long sem taem they go ahed for lukaotem samting bilong themseleva. Hem wantim pipol for kasem “stretfela savvy abaot will bilong hem,” and diswan mas show aot long laef bilong them. (Col. 1:9, 10) Taem pipol wea ting hae long every samting hia they learnim finis olketa main teaching bilong Bible, they want for muv ahed for kamap mature Kristian. They want for barava savvy gud long Jehovah, for mekem savvy bilong them abaot Word bilong hem kamap moa big and moa deep, and for followim every bit long laef bilong them. They trae hard for kamap olsem Father bilong them long heven, for showim aot olketa fashion bilong hem and kasem tingting bilong hem. Diswan muvim them for lukaotem way for share every bit long work wea hem duim long earth distaem. Waswe, hem nao samting wea yu duim?—Eph. 5:1; Heb. 5:12–6:3; 1 Tim. 4:15.

7. Wanem nao olketa way wea savvy mekem trufela wan mind kamap distaem? Hao nao diswan kamap?

⁷ Bible hem say pipol wea servim Jehovah mas garem wan mind. (Eph. 4:1-3) Disfela wan mind mas kamap distaem, nomata yumi stap insaed world wea divaed and yumi still trae hard for faetem way wea yumi no perfect. Jesus pray strong for olketa disaepol bilong hem for kamap wan, for enjoyim trufela wan mind. Wanem nao diswan bae meanim? Firstfela samting, they bae fren gud withim Jehovah and Son bilong hem. And tu, they bae garem wan mind withim each other. (John 17:20, 21) Distaem they kasem diswan taem they followim instruction wea they kasem long “haos” bilong Jehovah.

Wanem Samting Nao Mekem Wan Mind Kamap?

8. (a) Taem yumi each wan use-im Bible for answerim olketa question wea affectim yumi, yumi mekem wanem samting grow? (b) Taem yu answerim olketa question wea stap on top, meanim klia olketa point wea mekem Kristian wan mind kamap.

⁸ Samfela key wea mekem wan mind kamap they stap long daon. Taem yu answerim olketa question wea stap underneath long them, ting abaot hao each wan affectim way wea yu fren withim Jehovah and otherfela Kristian. Way for reason long olketa point and olketa scripture hia bae mekem grow tingting and savvy wea followim way bilong God, from they olketa fashion wea yumi everywan needim. (Prov. 5:1, 2; Phil. 1:9-11) So tingting gud long each point hia:

(1) Yumi everywan worshipim Jehovah and luksavvy hao hem fit for markem wanem samting hem gud and no gud.

Hao nao Jehovah bae ting sapos yumi meanim for no followim kaonsel bilong hem long wanfela samting wea maet yumi ting hem small nomoa? (Luke 16:10; lukim Malachi 1:6-8.)

Waswe, hem affectim other pipol sapos yumi no obeyim olketa komand bilong Jehovah everytaem? (Lukim Romans 5:12; Joshua 7:20-26; 1 Kings 14:16.)

(2) Nomata wanem ples yumi stap long world, yumi garem Word bilong God for leadim yumi.

Taem yumi decide-im samting, why nao hem danger for duim samting wea yumi “tingim” hem stret? (Jer. 17:9; Prov. 14:12)

Sapos yumi no savvy wanem kaonsel nao Bible givim abaot wanfela samting, wanem nao yumi mas duim? (Prov. 2:3-5)

(3) Yumi everywan kasem gudfela samting from sem program bilong spiritual kaikai.

Olketa wea no ting hae long arrangement bilong Jehovah for kasem spiritual kaikai they waswe? (Lukim Isaiah 1:3; 9:16; 65:14.)

(4) Jesus Kraest, and no any man, hem Leader bilong yumi and man wea thru long hem yumi everywan kam klosap long Jehovah long worship.

Waswe, anywan long yumi garem gudfela reason for ting yumi moa hae winim other pipol? (Rom. 3:23, 24; 12:3; Matt. 23:8-10)

(5) Nomata wanem ples yumi stap, yumi luk long Kingdom bilong God olsem only hope for olketa man.

Hao nao diswan protectim yumi from any samting wea savvy divaedem yumi? (Matt. 6:9, 10; Mic. 4:3)

(6) Holy spirit mekem olketa wea worshipim Jehovah garem olketa fashion wea important for Kristian garem wan mind.

Hao nao yumi openem way for spirit bilong God for garem fruit insaed long yumi? (Ps. 1:2; Prov. 22:4; Rev. 3:6; Acts 5:32)

Taem yumi garem olketa fruit bilong spirit, hao nao diswan affectim way wea yumi fren withim Jehovah? Withim olketa brata bilong yumi? (Gal. 5:22, 23)

(7) Yumi everywan garem responsibility for preachim gud nius bilong Kingdom bilong God.

Taem yumi busy for share long disfela preaching work withim otherfela Kristian, hao nao diswan affectim feeling bilong yumi for them? (Lukim Colossians 4:7, 11.)

9. Taem yumi barava followim olketa truth hia long laef bilong yumi, hao nao diswan affectim yumi?

⁹ Way for luksavvy long olketa point hia hem easy samting. Way for live followim them hem needim moa samting. But taem yumi duim olsem, yumi kamap klos long Jehovah. Way wea yumi hipap withim olketa brata bilong yumi kamap samting wea strongim yumi. Olsem Psalm 133:1 talem: “Lukim! Hem gud tumas for olketa brata for stap tugeta withim wan mind!” Waswe, yuseleva feel strong taem yu lusim world, withim every selfish fashion bilong hem, and stap long olketa meeting withim other pipol wea barava love-im Jehovah?

Stap Klia long Samting Wea Savvy Divaedem Yumi

10. Why nao yumi need for stap klia long way for garem independent fashion?

¹⁰ For mekem yumi no spoelem datfela gudfela wan mind, yumi mas stap klia long olketa samting wea savvy divaedem yumi. Wanfela main samting nao independent fashion. Jehovah helpem yumi for stap klia long diswan from hem talem yumi hu nao startim, Satan the Devil. Hem nao dat wan wea giamanim Eve for ting say hem bae kasem gudfela samting sapos hem no obeyim God and decide-im samting seleva. Adam tu followim hem for againstim God. Samting wea happen from diswan bringim trabel for them and for yumi. (Gen. 2:16, 17; 3:1-6, 17-19) Yumi stap insaed world wea fulap withim independent fashion, so yumi no sapraes sapos yumi tu need for daonem datfela spirit insaed long yumi seleva. Long loving way Jehovah helpem yumi for duim diswan thru long organization bilong hem.

11. Wanem samting nao bae show aot sapos yumi really prepare for laef insaed raeteous Niu World bilong God or nomoa?

¹¹ Thru long datfela organization yumi learn abaot nambawan promis bilong Jehovah for change-im disfela system withim niu heven and niu earth wea “raeteous fashion bae stap.” (2 Pet. 3:13) Yumi barava hapi tumas long hope wea klosap nao badfela world bae finis and earth bae kamap wanfela Paradaes. But waswe, living bilong yumi show aot yumi really prepare for laef insaed wanfela world wea raeteous fashion nao bae stap? Bible tok stret olsem long yumi: “No love-im world or any samting insaed long world. Sapos anywan love-im world, love bilong Father no stap long hem.” (1 John 2:15) Hem tru yumi no laekem planti samting insaed long world. But waswe, yumi no laekem nomoa olketa samting bilong world wea affectim samting wea yumi enjoyim long living? Or waswe, yumi barava no laekem tu spirit bilong hem—independent fashion bilong hem, way wea hem barava ting hae long seleva? Waswe, hem fashion bilong yumi for barava listen long Jehovah and obeyim hem from heart bilong yumi, nomata hem againstim samting wea body bilong yumi wantim? Full living bilong yumi—nomata wanem ples yumi stap, or wanem samting yumi duim—mas prove-im tingting and samting wea yumi duim hem followim way bilong God.​—⁠Prov. 3:5, 6.

12. (a) Why nao hem important for use-im chance wea stap distaem for learn abaot olketa way bilong Jehovah and for followim long living bilong yumi? (b) Wanem nao olketa scripture wea stap long paragraf meanim for yumi each wan?

¹² Taem wea Jehovah markem for finisim disfela badfela system and everywan wea love-im way bilong world, hem bae no delay. Hem bae no delayim datfela taem or change-im olketa mark bilong hem for fitim pipol wea still hold strong long world, olketa wea hafhaf nomoa for learnim will bilong God and for duim. Distaem nao hem taem for duim samting! (Luke 13:23, 24; 17:32; 21:34-36) Dastawe, hem gud tumas for lukim “great crowd” bilong pipol wea hold strong long disfela nambawan chance, barava lukaotem instruction wea Jehovah provide-im thru long loving organization bilong hem and wakabaot withim wan mind long road bilong hem!

[Footnote]

Samting for Review

● Wanem nao purpose bilong Jehovah long saed bilong worship?

● Bihaen yumi learnim olketa main Bible teaching, yumi mas trae hard for muv ahed long wanem way?

● Wanem nao yumi each wan savvy duim, mekem olketa samting wea mekem wan mind kamap they affectim laef bilong yumi?

[Full-page piksa long page 4]