Iufala Young Wan, Followim Advaes Long Bible
“Kasem wisdom and wei for minim samting.”—PROV. 4:5.
1, 2. (a) Wanem nao helpem aposol Paul for winim olketa hard samting wea hem kasem? (b) Wanem nao iu savve duim for kasem wisdom and wei for minim samting?
“TAEM mi laek duim samting wea stret, tingting for duim samting wea nogud tu hem stap.” Iu savve hu nao talem datwan? Hem aposol Paul. Nomata Paul lovem Jehovah, samfala taem hem no isi for hem duim samting wea stret. Hao nao tingting bilong hem abaotem datwan? Paul sei: “Mi iusles man nomoa!” (Rom. 7:21-24) Waswe, iu minim feeling bilong Paul? Waswe, samfala taem hem no isi for iu duim samting wea stret? Waswe, iu tu feel nogud olsem Paul? Sapos olsem, no feel wikdaon. Paul winim olketa hard samting wea hem kasem and iu tu savve duim sem samting.
2 Paul winim olketa hard samting hia bikos hem followim “olketa gudfala toktok.” (2 Tim. 1:13, 14) Taem hem duim datwan, hem kasem wisdom and wei for minim samting wea helpem hem for winim olketa hard taem and for disaedem stret samting. Jehovah God savve helpem iu for kasem wisdom and wei for minim samting. (Prov. 4:5) Nambawan advaes wea hem givim hem stap long Bible. (Readim 2 Timothy 3:16, 17.) Tingim olketa gud samting wea iu savve kasem taem iu followim olketa principle long Bible. Hem savve helpem iu taem iu story witim dadi and mami, hao for iusim selen, and taem iu stap seleva.
Long Famili
3, 4. Why nao maet hem no isi for iu obeyim olketa rul wea dadi and mami markem, bat why nao olketa markem olketa rul hia?
3 Waswe, hem no isi for iu followim olketa rul wea dadi and mami markem? Wanem nao maet mekem iu feel olsem? Maet hem bikos iu laek for chusim wanem iuseleva laekem. Datwan hem samting wea evriwan laekem. Olketa young wan savve garem datkaen tingting taem olketa start for kamap big. Nomata olsem, iu mas obeyim dadi and mami bilong iu evritaem.—Eph. 6:1-3.
4 Taem iu minim why dadi and mami markem olketa rul, datwan bae helpem iu for obeyim wanem olketa talem. Hem tru, maet samfala taem iu tu garem sem tingting olsem Brenda,a wea 18 year. Hem sei: “Dadi and Mami forgetim hao taem tufala young tufala tu olsem mi. Tufala no laekem mi for talem tingting bilong mi, for disaedem samting, or for olsem bigman.” Maet iu tu feel olsem Brenda, and tingse dadi and mami shud letem iu duim samfala samting wea iu laekem. Bat dadi and mami markem olketa rul bikos olketa tingim iu. Olketa Christian dadi and mami savve olketa mas ansa long Jehovah long hao olketa lukaftarem iu.—1 Tim. 5:8.
5. Wanem gud samting nao iu savve kasem sapos iu obeyim dadi and mami?
5 Taem iu obeyim olketa rul wea dadi and mami markem, hem olsem iu peim kaon wea iu garem long bank. Sapos iu evritaem peim kaon bilong iu, bank bae trustim iu and savve letem iu for kaonem staka selen moa. Long sem wei, iu need for respectim and obeyim dadi and mami. (Readim Proverbs 1:8.) Sapos iu evritaem obeyim tufala, bae tufala trustim iu and savve letem iu for disaedem samfala samting moa. (Luke 16:10) Bat sapos hem wei bilong iu for no followim olketa rul wea tufala markem, iu shud no sapraes sapos tufala no letem iu for chusim wanem iu laekem.
6. Wanem nao dadi and mami savve duim for helpem olketa young wan for obey?
6 Taem dadi and mami showimaot gudfala example, datwan savve helpem olketa young wan for obeyim olketa rul wea tufala markem. Taem dadi and mami willing for obeyim wanem Jehovah talem, datwan showimaot olketa rul wea God markem hem stret. Diswan bae helpem olketa young wan luksavve olketa rul wea dadi and mami markem hem fitim for olketa obeyim. (1 John 5:3) Bible storyim tu olketa taem wea Jehovah letem olketa wakaman bilong hem for talemaot tingting bilong olketa long samfala samting. (Gen. 18:22-32; 1 Ki. 22:19-22) Waswe, iufala dadi and mami savve letem pikinini for talemaot tingting bilong hem long samfala samting?
7, 8. (a) Wanem hard samting nao samfala young wan kasem? (b) Wanem nao savve helpem iu for kasem gud samting from discipline?
7 Maet olketa young wan feel nogud taem dadi and mami talem samting wea olketa tingse hem no stret. Maet samfala taem iu tu feel olsem disfala young man Craig. Hem sei: “Mami bilong mi hem olsem policeman. Evritaem nomoa hem laek savve long mistek wea mi duim.”
8 Plande taem iumi savve feel nogud taem samwan givim kaonsel or discipline long iumi. Nomata iu luksavve discipline wea iu kasem hem stret, Bible sei discipline hem samting wea no isi for iumi acceptim. (Heb. 12:11) Wanem nao savve helpem iu for kasem gud samting from discipline? Hem important for tingim dadi and mami kaonselem iu bikos olketa lovem iu. (Prov. 3:12) Olketa laekem iu for no garem olketa nogud wei bat for garem olketa gudfala wei. Dadi and mami luksavve sapos olketa no stretem iu, hem olsem olketa heitim iu! (Readim Proverbs 13:24.) Tingim tu hao iu savve lane from olketa mistek wea iu duim. So taem tufala stretem iu, hem gud for tingim wise samting wea tufala talem. “Wisdom hem gud winim silver and hem hae winim gold.”—Prov. 3:13, 14.
9. Winim wei for olketa young wan tingim nomoa samting wea olketa tingse hem no stret, wanem nao olketa savve duim?
9 Bat dadi and mami tu savve duim mistek. (Jas. 3:2) Taem olketa disciplinem iu, maet samfala taem olketa no tingting gud bifor olketa talem samting. (Prov. 12:18) Wanem nao savve mekem dadi and mami for duim olsem? Maet olketa kasem hevi or tingse iu duim mistek bikos olketa no duim eni samting for helpem iu. Trae for no tingim nomoa samting wea iu tingse hem no stret, bat tinghae long wei wea dadi and mami laek for helpem iu! Sapos iu lane for acceptim discipline, datwan bae helpem iu taem iu big.
10. Wanem nao savve helpem iu for acceptim and kasem gud samting from discipline and olketa rul wea dadi and mami markem?
10 Wanem nao savve helpem iu for acceptim and kasem gud samting from discipline and olketa rul wea dadi and mami markem? Iu need for lane for story gud witim tufala. Wanem nao savve helpem iu for duim datwan? First samting hem for lisin long tufala. Bible sei: “Man mas willing for lisin, no kwiktaem for toktok, and no kwiktaem for kros.” (Jas. 1:19) No kwiktaem for talem excuse for wanem iu duim bat trae for kontrolem feeling bilong iu and lisin long wanem dadi and mami talem. Tingim wanem tufala talem and no hao olketa talem datwan. Then showimaot iu acceptim wanem olketa talem and talemaot iu nao rong. Bat waswe sapos iu laek explainim long dadi and mami why iu duim or talem datfala samting? Staka taem hem wise for ‘kwaet nomoa’ and story witim tufala bihaen iu duim wanem tufala laekem. (Prov. 10:19) Taem dadi and mami luksavve iu lisin long tufala, bae olketa laek for lisin long iu. Datwan showimaot iu garem gudfala tingting and followim advaes long Bible.
Wei for Iusim Selen
11, 12. (a) Bible encouragem iumi for garem wanem tingting abaotem selen, and why nao olsem? (b) Wanem nao dadi and mami savve duim for helpem iu iusim selen long gudfala wei?
11 Bible sei: “Selen savve protectim iu.” Bat datfala sem verse sei wisdom nao hem winim selen. (Eccl. 7:12) Bible encouragem iumi for garem gudfala tingting abaotem selen and for no laekem tumas. Why nao iumi mas no laekem selen tumas? Tingim disfala tokpiksa: Naef wea sharp hem gudfala tul for man iusim taem hem kuki. Bat sapos man no savve hao for iusim gud datfala naef, maet naef hia katem hem. Long sem wei tu, sapos iumi iusim selen long wisefala wei, bae datwan helpem iumi. Bat staka taem olketa wea “laekem tumas for rich,” spoelem wei wea olketa fren gud witim narawan, olketa long famili, and witim God. Datwan “mekem olketa seleva for kasem staka problem wea barava spoelem olketa.”—Readim 1 Timothy 6:9, 10.
12 Wanem nao savve helpem iu for iusim selen long gudfala wei? Hem gud for askem advaes from dadi and mami! Solomon sei: “Man wea wise bae lisin and savve long samfala samting moa, and man wea minim samting bae savve wanem for duim.” (Prov. 1:5) Wanfala young gele wea nem bilong hem Anna askem help from dadi and mami bilong hem. Hem sei: “Dadi lanem mi hao for iusim selen, and hem showim mi hem important for raetem wanem mi iusim selen long hem.” Mami bilong Anna tu lanem hem wanem for duim. Anna sei: “Hem lanem mi hao for comparem olketa price firstaem bifor mi baem eni samting.” Waswe, Anna kasem eni gud samting? Hem sei: “Distaem mi savve hao for iusim selen. From mi iusim long wisefala wei, datwan helpem mi for no garem eni kaon and no wari.”
13. Wanem nao iu savve duim for kontrolem hao iu iusim selen?
13 Sapos iu baem eni samting nomoa or iusim selen for mekem olketa fren bilong iu laekem iu, bae kwiktaem nomoa iu garem kaon. Wanem nao savve helpem iu for no duim olsem? Iu mas lane for kontrolem hao iu iusim selen. Hem nao samting wea Ellena duim, wea hem winim 20 year. Hem sei: “Taem mi go long eni ples witim olketa fren bilong mi, mi planim firstaem haomas selen bae mi iusim. . . . Mi luksavve hem wise tu for go long stoa witim olketa fren wea iusim selen bilong olketa long gudfala wei and wea encouragem mi for comparem olketa price firstaem winim wei for baem firstfala samting wea mi lukim.”
14. Why nao iumi mas no letem “riches” for switim iumi?
14 For waka for selen and hao for iusim datwan hem important samting long laef. Bat Jesus sei olketa wea “luksavve olketa needim God” nao bae hapi. (Matt. 5:3) Hem sei “riches wea savve switim man” savve spoelem wei wea man fren witim God. (Mark 4:19) Dastawe hem important tumas for followim advaes long Bible and garem stretfala tingting abaotem selen!
Taem Iu Stap Seleva
15. Wanem taem nao maet iu faendem hem no isi for iu faithful long God?
15 Wanem taem nao iu faendem hem no isi for iu faithful long God? Waswe, hem taem iu stap witim olketa narawan or taem iu stap seleva? Taem iu long skul or long ples wea iu waka, maet hem isi for luksavve long eni samting wea savve spoelem wei wea iu fren witim God. Bat taem iu stap seleva hem isi tumas for duim samting wea savve spoelem gudfala wei bilong iu.
16. Why nao iu shud obeyim Jehovah taem iu stap seleva?
16 Why nao iu shud obeyim Jehovah taem iu stap seleva? Tingim diswan: Iu savve mekem Jehovah feel sorre or hapi. (Gen. 6:5, 6; Prov. 27:11) Jehovah ‘tingim iu’ and wanem iu duim savve affectim hem. (1 Pet. 5:7) Hem laekem iu for lisin long hem mekem iu kasem gud samting. (Isa. 48:17, 18) Taem samfala wakaman bilong Jehovah long Israel bifor no followim kaonsel wea hem talem, hem barava sorre. (Ps. 78:40, 41) Nomata olsem, Jehovah lovem profet Daniel. Wanfala angel sei Daniel hem “man wea barava spesol.” (Dan. 10:11) Why nao olsem? Daniel faithful long God no long taem wea hem stap witim staka pipol nomoa bat taem hem stap seleva tu.—Readim Daniel 6:10.
17. Wanem nao olketa kwestin wea iu savve tingim taem iu chusim hapitaem?
17 Iu mas “lane for luksavve long wanem hem stret and wanem hem no stret” mekem iu gohed faithful long God taem iu stap seleva. Taem iu duim olsem datwan bae helpem iu for duim wanem hem stret. (Heb. 5:14) Olsem example, taem iu chusim music for lisin long hem, movie for lukim, or Web site for lukim long Internet, olketa kwestin hia bae helpem iu for chusim samting wea stret. ‘Waswe, samting wea mi chusim bae encouragem mi for tingim narawan or bae hem mekem mi hapi taem “narawan kasem trabol”?’ (Prov. 17:5) ‘Waswe, bae hem mekem mi for “lovem gud samting” or for lovem “nogud samting”?’ (Amos 5:15) Samting wea iu duim taem iu stap seleva bae showimaot wanem iu tinghae long hem.—Luke 6:45.
18. Wanem nao iu shud duim sapos iu savve samting wea iu duim hem no stret, and why nao olsem?
18 Wanem nao iu shud duim sapos iu savve samting wea iu duim hem no stret? Bible sei: “Man wea haedem sin bilong hem bae no kasem gudfala samting, bat man wea talemaot sin bilong hem and no duim moa bae kasem mercy.” (Prov. 28:13) Hem no wise for gohed duim nogud samting and “mekem holy spirit bilong God feel sorre”! (Eph. 4:30) Hem important for talemaot sin wea iu duim long God and long dadi and mami bilong iu. “Olketa elder long kongregeson” tu savve barava helpem iu. Disaepol James sei: “Olketa savve prea for [man wea duim sin], and oilim hem witim oil long nem bilong Jehovah. And prea bilong faith bae mekem sikman kamap gud, and Jehovah bae mekem hem kamap gud moa. And tu, sapos hem duim sin, hem bae kasem forgiveness.” (Jas. 5:14, 15) Hem tru, maet iu shame taem iu talemaot sin bilong iu and maet iu kasem samfala nogud samting from wanem iu duim. Bat sapos iu no fraet for askem help from olketa narawan, problem bilong iu bae no kamap worse and bae iu garem gudfala konsens.—Ps. 32:1-5.
Mekem Jehovah Hapi
19, 20. Wanem nao Jehovah laekem iu for kasem, bat wanem nao iu mas duim?
19 Jehovah hem “datfala hapi God” and hem laekem iu tu for hapi. (1 Tim. 1:11) Hem interest long iu. Nomata sapos no eniwan savve iu trae hard for duim samting wea stret, Jehovah savve long datwan. Hem lukim evri samting. Hem no lukluk for mistek wea iu duim, bat hem laek for helpem iu duim gud samting. “Jehovah lukluk gud long evri samting long world, mekem hem savve givim paoa long olketa wea lovem hem long full heart.”—2 Chron. 16:9.
20 So followim advaes long Bible. Iu bae garem wisdom and wei for minim samting wea bae helpem iu for winim olketa problem wea iu kasem and for disaed gud. Iu bae mekem dadi and mami bilong iu hapi and Jehovah tu. And iu tu bae hapi.
[Footnotes]
a Mifala changem olketa nem.
Wanem Nao Ansa Bilong Iu?
• Wanem nao savve helpem olketa young wan for acceptim and kasem gud samting from discipline and olketa rul wea dadi and mami markem?
• Why nao hem important for garem gudfala tingting abaotem selen?
• Wanem nao bae helpem iu for faithful long Jehovah taem iu stap seleva?
[Piksa long page 6]
Waswe, bae iu faithful long God taem iu stap seleva?