OLKETA KWESTIN WEA YOUNG PIPOL GAREM
Hao Nao Mi Savve Story Witim Parents blo Mi Abaotem Olketa Rul blo Olketa?
“Mi agree witim olketa rul wea parents blo mi mekem taem mi 15 years old, bat distaem mi 19 and mi tingse mi shud garem moa freedom.”—Sylvia.
Waswe, iu savve feel olsem Sylvia? Sapos olsem, information lo disfala article savve helpem iu for story witim parents blo iu.
Wanem iu shud savve lo hem
Bifor iu story witim parents blo iu abaotem olketa rul blo olketa, tingim diswan:
Sapos no eni rul stap, evriting bae olobaot. Tingim wanfala road wea staka trak go lo hem. Wanem nao bae happen sapos no eni rul stap lo datfala road for olketa draeva, olsem olketa saen and speed limit? Olsem olketa rul lo road helpem olketa draeva, olketa rul wea parents mekem hem helpem famili gohed gud.
Taem parents mekem olketa rul, datwan showimaot olketa tingim iu. Sapos olketa no mekem eni rul, maet datwan showimaot olketa no tingim iu. Olketa bae no showimaot gudfala wei for lukaftarem pikinini.
WASWE, IU SAVVE? Parents mas followim olketa rul tu! Sapos iu no ting olsem, readim Jenesis 2:24; Diutronomi 6:6, 7; Ephesus 6:4; and 1 Timothy 5:8.
Bat waswe sapos iu ting olketa rul wea parents blo iu mekem hem strict tumas?
Wanem iu savve duim
Ting raonem information hia bifor iu go story witim parents blo iu. Kam kasem distaem, waswe, iu evritaem obeyim olketa rul wea parents blo iu mekem? Sapos iu no evritaem obeyim wanem olketa talem, then maet hem no gudfala taem for iu askem olketa for moa freedom. Hem bae moabeta for readim article, “Wanem Nao Mi Mas Duim for Parents Bilong Mi Trustim Mi?”
Bat sapos plande taem iu obeyim wanem parents blo iu talem, hem gud for tingim firstaem wanem iu laek talem lo olketa. Wei for duim datwan or for raetem daon wanem iu laek talem bae helpem iu for luksavve sapos samting wea iu laek askem hem ova tumas or nomoa. Then askem parents blo iu for chusim taem and ples wea fitim olketa and wea mekem iufala evriwan relax and feel free for story. Then taem iu story witim parents blo iu, rememberim diswan:
Showimaot respect. Bible sei: “Tokstrong lo [man], bae hemi hot moa.” (Provebs 15:1) So tingim diswan: Sapos iu start for argue witim parents blo iu or sei olketa strict tumas bae kwiktaem nomoa raoa kamap.
“Taem mi respectim parents blo mi bae olketa respectim mi tu. Hem moa isi for mifala evriwan agree lo samting taem mifala showimaot respect lo each other.”—Bianca, 19.
Lisin. Bible sei iumi mas “willing for lisin, no kwiktaem for toktok.” (James 1:19) Tingim diswan, iu story witim parents blo iu, wea minim iu no story nomoa bat iu shud lisin tu.
“Taem iumi big maet iumi tingse iumi savve plande moa samting winim parents blo iumi, bat kaen tingting hem barava no stret. Iumi shud lisin lo olketa and followim advaes blo olketa.”—Devan, 20.
Minim tingting blo olketa. Trae for minim tingting blo parents blo iu. Followim wanem Bible talem for “evritaem tingim olketa narawan and no tingim iufala seleva nomoa,” wea diswan minim for tingim parents blo iu tu.—Philippi 2:4.
Wanem nao best samting for iu duim?
“Bifor mi savve ting parents blo mi againstim mi and no laek sapotim mi. Bat distaem mi luksavve olketa trae for kamap gudfala parents olsem mi tu trae for garem gudfala tingting olsem wanfala bigman. Evri samting wea olketa duim hem bikos olketa lovem mi.”—Joshua, 21.
Storyim nara idea lo olketa. Tingim sapos iu laek go lo wanfala party wea bae kamap leit lo naet, bat parents blo iu no laekem iu for go. Trae for faendemaot reason why olketa no laekem iu for go. Waswe, hem bikos party hia bae kamap leit lo naet or hem datfala party nao olketa no laekem?
Sapos olketa no laekem iu for go lo party bikos hem kamap leit, waswe, bae olketa letem iu go sapos iu go witim narawan?
Bat sapos main reason hem bikos olketa no laekem datkaen party, waswe, iu savve explainim lo olketa nem blo olketa narawan wea bae attend and hu bae lukaftarem datfala party?
So remember for showimaot respect taem iu story lo parents blo iu and lisin taem olketa story kam lo iu. Wanem iu talem and duim shud showimaot iu “respectim dadi and mami bilong iu.” (Ephesus 6:2, 3) Waswe, olketa willing for changem tingting blo olketa? Maet olketa willing. Nomata wanem olketa disaedem, iu shud duim diswan . . .
Acceptim wanem parents blo iu disaedem. Hem important for iu duim diswan bikos maet hem mekem parents blo iu givim iu moa freedom. Sapos iu no agree witim olketa and start for argue olketa, next taem iu trae for askem olketa for changem tingting blo olketa bae hem moa hard. Bat sapos iu willing for followim wanem olketa talem, maet parents blo iu no strict tumas lo future.