Jehovah Protectim Iumi for Sevem Iumi
“God hem protectim iufala bikos iufala garem faith. God duim olsem for sevem iufala wea diswan bae showaot long taem bilong end.” —1 PET. 1:5.
WANEM NAO ANSA BILONG IU?
Hao nao Jehovah leadim iumi kam long tru worship?
Wanem nao iumi savve duim for letem kaonsel bilong Jehovah leadim iumi?
Hao nao Jehovah encouragem iumi?
1, 2. (a) Hao nao iumi savve God bae helpem iumi for faithful go kasem end? (b) Jehovah hem savve long wanem samting abaotem iumi?
“MAN wea bae sev nao hem man wea no givap go kasem taem world hem finis.” (Matt. 24:13) Disfala toktok bilong Jesus showimaot klia iumi mas faithful go kasem end mekem iumi stap laef taem world bilong Satan hem finis. Bat for duim diswan Jehovah no expectim iumi for depend long wisdom or strong bilong iumiseleva. Bible hem sei: “God hem keepim olketa promis bilong hem and hem bae no letem samting for switim iufala wea iufala no fit for winim. Bae hem helpem iufala for winim datwan mekem iufala no givap.” (1 Cor. 10:13) Wanem nao iumi lanem from scripture hia?
2 Jehovah bae no letem samting for switim iumi wea iumi no fit for winim. Jehovah savve duim diswan bikos hem savve gud long evri samting abaotem iumi. Hem savve wanem kaen problem nao kasem iumi, wanem kaen man nao iumi, and wanem kaen hard samting iumi fit for deal witim. Bible sei Jehovah hem barava savve long evri samting abaotem iumi wanwan. Hem savve long samting wea iumi duim evriday and wei bilong iumi. Hem savve tu long tingting bilong iumi and olketa samting wea heart bilong iumi laekem.—Readim Psalm 139:1-6.
3, 4. (a) Hao nao samting wea happen long David showimaot Jehovah hem interest long iumi wanwan? (b) Hao nao Jehovah showimaot hem interest long iumi distaem?
3 Waswe, hem tru Olmaeti God hem barava interest olsem long olketa man nating? King David ting raonem diswan and hem sei long Jehovah: “Taem mi luk go ap long skae and lukim moon and olketa star wea iu wakem, mi garem tingting olsem: Why nao iu tingim olketa man nating?” (Ps. 8:3, 4) Maet David askem datfala kwestin bikos long samting wea happen long hem wea showimaot Jehovah interest long hem. Taem David, wea hem lastborn son bilong Jesse, hem wanfala young boy nomoa wea lukaftarem sheepsheep, Jehovah sei hem “man wea mekem heart bilong hem hapi” and hem chusim hem for kamap leader bilong pipol bilong hem Israel. (1 Sam. 13:14; 2 Sam. 7:8) Creator bilong universe hem savve long tingting and feeling bilong David nomata hem young boy nomoa wea lukaftarem sheepsheep. Tingim hao nao David hem feel taem hem luksavve long datwan!
4 Jehovah showimaot hem interest long iumi tu distaem. Hem hipimap pipol from “evri nation” wea “spesol” long hem for olketa worshipim hem. (Hag. 2:7) And tu, hem helpem olketa wea worshipim hem for gohed faithful. Hao nao Jehovah duim datwan? Bifor iumi ansarem datfala kwestin, bae iumi storyim wanem Jehovah duim for leadim pipol kam long tru worship.
GOD LEADIM IUMI KAM
5. Hao nao Jehovah leadim pipol kam long Son bilong hem? Storyim wanfala example.
5 Jesus hem sei: “Hard for eniwan kam long mi sapos Dadi wea sendem mi kam hem no leadim hem kam long mi firstaem.” (John 6:44) Datfala toktok showimaot for iumi disaepol bilong Christ, iumi needim help bilong God. God nao mas leadim iumi kam long Son bilong hem. Hao nao hem duim olsem? Hem iusim preaching waka and holy spirit bilong hem. Olsem example, taem Paul and olketa wea gogo witim hem stap long Philippi, olketa meetim wanfala woman wea nem bilong hem Lydia. Bible sei taem olketa sharem gud nius witim hem, “hem lisin long Paul, and Jehovah openem heart bilong hem for bilivim samting wea Paul storyim.” God iusim holy spirit bilong hem for helpem Lydia minim and acceptim datfala message. Gogo, Lydia and evriwan wea stap long haos bilong hem baptaes.—Acts 16:13-15.
6. Hao nao God leadim iumi wanwan kam long tru worship?
6 Waswe, Jehovah duim diswan long Lydia nomoa? Nomoa. Sapos iu wanfala Christian wea dedicate finis, God leadim iu kam long tru worship tu. Dadi bilong iumi long heven lukim gud samting long heart bilong Lydia, and hem lukim gud samting long iu tu. Taem iu willing for lisin long gud nius, Jehovah iusim holy spirit bilong hem for helpem iu minim and acceptim datfala message. (1 Cor. 2:11, 12) Taem iu traem best for followim samting wea iu lanem from Bible, hem blessim datwan. Taem iu dedicate long hem, heart bilong hem hapi. Jehovah hem helpem iu from taem wea iu start for servem hem kam kasem distaem.
7. Hao nao iumi savve Jehovah bae helpem iumi for gohed faithful?
7 From Jehovah helpem iumi taem iumi start for servem hem, iumi sure hem bae gohed helpem iumi for faithful long hem. Hem savve hem mas helpem iumi for kam insaed truth and hem savve hem mas helpem iumi for no lusim truth tu. Aposol Peter talem olketa anointed Christain “paoa bilong God hem protectim” olketa mekem olketa savve gohed faithful long hem. (1 Pet. 1:4, 5) Toktok bilong Peter hem fitim evri Christian. Long wanem wei nao Jehovah protectim iumi distaem? Iumi shud interest for savve long ansa bilong datfala kwestin bikos iumi evriwan needim help bilong God for gohed faithful long hem.
GOD SAVVE STOPEM IUMI FOR NO DUIM RONG SAMTING
8. Wanem nao maet mekem iumi no luksavve iumi redi for duim rong samting?
8 Olketa problem wea iumi kasem and olketa wik point bilong iumi savve mekem iumi for no garem tingting bilong Jehovah. Sapos olsem, maet iumi no luksavve iumi redi for duim rong samting. (Readim Galatia 6:1.) Diswan nao samting wea kasem David.
9, 10. (a) Wanem nao Jehovah duim for stopem David for no duim rong samting? (b) Wanem nao Jehovah duim for iumi distaem?
9 Taem King Saul aftarem David and David garem chance for spoelem Saul, hem barava kontrolem hemseleva. (1 Sam. 24:2-7) Bat no longtaem bihaen datwan, David no kontrolem hemseleva nao. Hem and olketa man bilong hem needim kaikai and wata so hem askem help bilong nara Israelite man, wea nem bilong hem Nabal. Nabal tok spoelem David and les for helpem hem. Diswan mekem David kros fogud and hem laek for go killim dae Nabal and evri man long haos bilong hem. David no tingim bae Jehovah judgem hem sapos hem killim dae pipol hia wea no guilty long eni samting. Bat waef bilong Nabal, Abigail, hem stopem David for no duim disfala rong samting. David luksavve Jehovah iusim Abigail for protectim hem, so David sei long hem: “Praisem Jehovah, God bilong Israel, wea sendem iu tuday for meetim mi! And God mas blessim iu from gudfala tingting bilong iu, and from iu stopem mi tuday for no killim dae eniwan and iu stopem mi for no stretem disfala problem seleva.”—1 Sam. 25:9-13, 21, 22, 32, 33.
10 Wanem nao iumi lanem from disfala story? Jehovah savve stopem iumi for no duim rong samting. Bat iumi mas no tingse Jehovah bae evritaem sendem samwan for stopem iumi taem iumi redi for duim wanfala rong samting. Iumi no savve wanem God bae duim taem wanfala samting hem happen, or wanem hem bae letem for happen for mekem plan bilong hem kam tru. (Eccl. 11:5) Nomata olsem, iumi sure Jehovah hem savve long evri samting wea kasem iumi and hem bae helpem iumi for gohed faithful long hem. Hem promisim iumi olsem: “Bae mi teachim iu olketa stretfala wei for iu followim and bae mi givim gudfala tingting long iu. Bae mi givim advaes long iu and gohed for lukaftarem iu.” (Ps. 32:8) Hao nao Jehovah givim advaes long iumi? Wanem gud samting nao iumi savve kasem sapos iumi followim advaes hia? And why nao iumi sure Jehovah hem leadim pipol bilong hem distaem? Bae iumi lukim ansa for olketa kwestin hia long buk bilong Revelation.
KAONSEL FROM BIBLE PROTECTIM IUMI
11. Wanem nao showimaot Jehovah hem savve long evri samting wea gohed long olketa kongregeson distaem?
11 Long vision wea stap long Revelation chapter 2 and 3, datfala King Jesus Christ lukim samting wea happen long sevenfala kongregeson long Asia Minor. Datfala vision showimaot Christ hem lukim evri samting wea gohed insaed long each kongregeson. Hem storyim wanem nao happen insaed long samfala kongregeson and hem talem nem bilong samfala man tu. Hem praisem samfala kongregeson and hem givim kaonsel long samfala tu. Wanem nao iumi lanem from diswan? Sevenfala kongregeson hia piksarem olketa anointed Christian bihaen long 1914. Nomata kaonsel wea Christ givim hem for olketa anointed wan, evri kongregeson long earth distaem savve kasem gud samting from datwan. Evri samting hia showimaot Jehovah hem iusim Son bilong hem for leadim pipol bilong Hem distaem. Hao nao iumi savve letem Jehovah for leadim iumi?
12. Wanem nao iumi savve duim for letem Jehovah leadim iumi?
12 Wanfala wei for letem Jehovah leadim iumi hem for duim study seleva. Jehovah givim staka kaonsel long iumi long olketa buk wea iumi kasem from datfala wakaman wea faithful and wise. (Matt. 24:45) Bat for kasem gud samting from diswan, iumi mas markem taem for studyim olketa buk hia and followim wanem iumi lanem. Taem iumi study seleva, iumi letem Jehovah for ‘protectim iumi mekem iumi no foldaon.’ (Jude 24) Waswe, enitaem iu lukim wanfala point taem iu study insaed wanfala buk bilong iumi and sei: ‘Diswan barava fitim mi nao’? Iu shud ting long datwan olsem Jehovah hem stretem iu. Olsem wanfala fren wea remindim iu long wanfala samting, Jehovah savve iusim holy spirit for helpem iumi luksavve long wanfala samting wea iumi duim, or wanfala wei bilong iumi, wea hem no mas stret. Taem iumi acceptim datfala kaonsel wea kam from holy spirit, iumi letem Jehovah for leadim iumi. (Readim Psalm 139:23, 24.) Dastawe hem fitim for ting raonem sapos iumi markem inaf taem for study and sapos iumi study gud.
13. Why nao hem gud for ting raonem sapos iumi markem inaf taem for study and sapos iumi study gud?
13 Sapos iumi hapitaem olowe, bae iumi no garem taem for duim study seleva. Wanfala brata sei hem isi tumas for diswan happen. Why nao olsem? Hem storyim hao distaem staka garem TV, computer, computer game, and olketa game long mobile. Sapos iumi no careful, hem isi for iusim staka taem long olketa samting hia, gogo iumi no garem eni taem for study gud nao. (Eph. 5:15-17) Hem gud for iumi wanwan tingim tufala kwestin hia: “Haomas taem nao mi savve studyim olketa deep samting insaed long Bible? Waswe, mi duim datwan taem mi garem wanfala part long meeting nomoa?” Traem best for iusim taem wea iumi markem for study seleva and taem wea iumi duim Famili Worship, for studyim olketa deep samting long Bible and lukaotem wisdom bilong Jehovah olsem iumi lukaotem riches wea haed. Wisdom bilong Jehovah savve protectim iumi and helpem iumi for faithful go kasem end.—Prov. 2:1-5.
ENCOURAGEMENT HELPEM IUMI FOR NO GIVAP
14. Wanem nao Bible talem wea showimaot Jehovah hem tingim feeling bilong iumi?
14 David kasem staka hard taem and sorre samting long laef bilong hem. (1 Sam. 30:3-6) Bible showimaot Jehovah savve long feeling bilong David. (Readim Psalm 34:18; 56:8.) God savve long feeling bilong iumi tu. God hem savve taem iumi “sorre tumas” and “barava wikdaon.” Diswan comfortim iumi, olsem hem comfortim David tu, wea sei olsem: “Mi hapi tumas long wei wea iu kaen long mi. Iu savve long samting wea spoelem mi and hard taem wea kasem mi.” (Ps. 31:7) Jehovah no lukim nomoa hard taem wea kasem iumi bat hem comfortim and encouragem iumi for helpem iumi gohed strong. Wanfala wei wea hem duim diswan hem long olketa meeting.
15. Wanem nao iumi lanem from samting wea kasem Asaph?
15 Samting wea kasem Asaph hem helpem iumi for luksavve why hem gud for iumi go long olketa meeting. Asaph hem wikdaon bikos hem evritaem tingim hao hem luk olsem nogud pipol stap gud bat raeteous pipol nao safa. Hem start for tingse hem iusles nomoa for servem Jehovah. Hem sei: “Heart bilong mi no garem eni feeling, and olketa kidney bilong mi barava feel pain.” Diswan mekem hem klosap lusim Jehovah nao. Wanem nao helpem Asaph for kasem bak gudfala tingting? Hem sei: “Mi kam insaed nambawan holy ples bilong God.” Taem hem hipap witim olketa narawan wea worshipim Jehovah, hem kasem bak gudfala tingting. Asaph luksavve nogud pipol bae stap gud for lelebet taem nomoa, and tu, Jehovah bae stretem evri samting. (Ps. 73:2, 13-22) Maet samfala taem iumi tu feel olsem Asaph. Olketa samting long disfala world bilong Satan wea no stret, savve mekem iumi wikdaon and sorre. Bat taem iumi hipap witim olketa brata and sista bilong iumi, datwan strongim iumi and helpem iumi for gohed servem Jehovah and hapi.
16. Hao nao example bilong Hannah savve helpem iumi?
16 Bat waswe sapos wanfala samting wea happen hem mekem iu feel olsem iu no laek go long olketa meeting? Maet iu lusim wanfala privilege insaed long kongregeson and iu feel shame lelebet. Or maet iu garem problem witim wanfala brata or sista. Sapos kaen samting olsem kasem iu, maet example bilong Hannah savve helpem iu. (Readim 1 Samuel 1:4-8.) Staka taem Peninnah, wea hem mek-tu waef bilong hasband bilong Hannah, savve mekem hem feel nogud. Diswan hem moa hard long Hannah long taem wea full famili go long Shiloh for givim olketa sakrifaes long Jehovah evri year. From Hannah feel nogud tumas long diswan hem savve “krae and no kaikai.” Nomata olsem, Hannah no letem diswan stopem hem for go long ples wea hem savve worshipim Jehovah God. Jehovah tinghae long wei wea hem faithful and blessim hem.—1 Sam. 1:11, 20.
17, 18. (a) Wanem encouragement nao iumi kasem long olketa meeting? (b) Love wea Jehovah showimaot long iu hem mekem iu feel hao?
17 Hem gud for olketa Christian distaem followim example bilong Hannah. Iumi shud go evritaem long olketa meeting. Iumi evriwan kasem encouragement wea iumi needim long olketa meeting. (Heb. 10:24, 25) Love wea olketa brata and sista showimaot long olketa meeting hem comfortim iumi. Olsem example, maet wanfala samting wea iumi herem long tok or koment bilong samwan, hem barava encouragem iumi. Maet wanfala brata or sista willing for lisin long iumi, or talem samting wea mekem iumi feel gud. (Prov. 15:23; 17:17) Taem iumi singim olketa Kingdom song datwan encouragem iumi and mekem iumi hapi moa. Taem iumi wari nao iumi barava needim encouragement wea iumi kasem long olketa meeting. Long olketa meeting nao “toktok” bilong Jehovah “for comfortim man” hem helpem iumi for no givap and for gohed faithful.—Ps. 94:18, 19.
18 Love wea Jehovah showimaot long iumi mekem iumi feel sef olsem Asaph taem hem sei olsem long Jehovah: “Iu holem raet hand bilong mi. Iu bae iusim kaonsel bilong iu for leadim mi.” (Ps. 73:23, 24) Iumi barava thankiu long Jehovah wea hem protectim and helpem iumi for no givap go kasem end!
[Piksa long page 28]
Iu tu Jehovah leadim iu kam long tru worship
[Piksa long page 30]
Wei for followim kaonsel bilong Jehovah protectim iumi
[Piksa long page 31]
Encouragement helpem iumi for no givap