Waswe, Iu Showimaot Glory Bilong Jehovah?
“Iumi olsem olketa mirror wea showimaot glory bilong Jehovah.”—2 COR. 3:18.
WANEM NAO ANSA BILONG IU?
Why nao iumi fit for showimaot glory bilong Jehovah nomata iumi sin?
Hao nao wei for prea and olketa meeting bilong iumi helpem iumi showimaot glory bilong God?
Wanem nao iumi mas duim mekem iumi savve gohed givim glory long Jehovah?
1, 2. Why nao olketa man fit for followim olketa wei bilong Jehovah?
IUMI evriwan olsem mami or dadi bilong iumi long samfala wei. Maet iumi herem samwan sei long wanfala boy, ‘Iu olsem dadi bilong iu.’ Or maet iumi herem samwan sei long wanfala gele, ‘Iu olsem mami bilong iu.’ Plande taem olketa pikinini trae for followim wei bilong dadi or mami and samting wea olketa duim. Bat waswe long iumi? Waswe, iumi fit for followim wei bilong Jehovah, wea hem Dadi bilong iumi long heven? Nomata iumi no savve lukim God, iumi savve lane abaotem olketa nambawan wei bilong hem from olketa samting wea hem wakem. Iumi savve lane abaotem olketa nambawan wei bilong God tu taem iumi studyim Bible and ting raonem olketa samting wea iumi readim, especially olketa samting wea Son bilong hem Jesus, talem and duim. (John 1:18; Rom. 1:20) So iumi fit for followim wei bilong Jehovah, and taem iumi duim olsem iumi showimaot glory bilong hem.
2 Bifor God wakem Adam and Eve, hem savve olketa man bae fit for duim wanem hem laekem, followim wei bilong hem, and givim glory long hem. (Readim Genesis 1:26, 27.) Iumi olketa Christian laek for followim wei bilong God bilong iumi. Sapos iumi duim olsem, iumi garem nambawan privilege for showimaot glory bilong hem. Iumi savve duim datwan nomata wanem nao kastom bilong iumi, ples wea iumi kam from, or sapos iumi skul or nomoa. Why nao iumi savve sei olsem? Diswan hem bikos “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.”—Acts 10:34, 35.
3. Taem iumi story abaotem Jehovah, datwan savve mekem iumi feel hao?
3 Olketa anointed Christian showimaot glory bilong Jehovah. Aposol Paul wea hem wanfala anointed Christian hem sei: “No eni samting kavarem feis bilong iumi evriwan. Iumi olsem olketa mirror wea showimaot glory bilong Jehovah. Taem iumi showimaot datfala glory, diswan changem iumi for garem glory olsem hem, and glory wea iumi showimaot hem gohed for kamap big.” (2 Cor. 3:18) Long hia Paul story abaotem taem wea Moses kam daon from Maunt Sinai witim Ten Komandment. Feis bilong Moses hem shaen bikos Jehovah story witim hem. (Ex. 34:29, 30) Olketa Christian no kasem sem samting olsem Moses, and taem pipol lukluk long feis bilong olketa hem no shaen olsem Moses. Bat pipol lukim hapi bilong olketa Christian taem olketa story abaotem Jehovah, olketa wei bilong hem, and nambawan plan bilong hem for olketa man. So nomata iumi anointed Christian or nara sheepsheep, iumi savve olsem olketa mirror wea showimaot glory bilong Jehovah long preaching waka and long samting wea iumi duim long laef bilong iumi. (2 Cor. 4:1) Waswe, iu showimaot glory bilong Jehovah long wei for duim wanem hem laekem and for duim preaching waka evritaem?
IUMI LAEK SHOWIMAOT GLORY BILONG JEHOVAH
4, 5. (a) Olsem Paul, wanem nao iumi evriwan stragol long hem? (b) Wanem nao sin, and long wanem wei nao hem affectim olketa man?
4 Iumi wea worshipim Jehovah laek for showimaot glory bilong hem long evri samting wea iumi duim. Bat staka taem iumi duim samting wea no stret nomata iumi laek duim stret samting. Paul tu hem garem sem problem. (Readim Rome 7:21-25.) Hem talem reason why nao iumi evriwan stragol olsem. Hem sei: “Evriwan sin and no savve showimaot olketa nambawan wei bilong God.” (Rom. 3:23) From Adam hem sin, evri man born sin, and sin hem olsem wanfala nogud king wea rulim evri man.—Rom. 5:12; 6:12.
5 Wanem nao sin? Iumi duim sin sapos iumi no followim wei bilong Jehovah or olketa haefala mark bilong hem, and duim samting wea difren from wanem hem laekem iumi for duim. Sin savve spoelem wei wea iumi fren witim God. Sin savve stopem iumi for no showimaot glory bilong Jehovah, olsem man wea savve sutsut witim bow and arrow hem no kasem target bilong hem bikos wanfala samting stopem hem. Samfala taem iumi min for duim sin, bat olketa narataem iumi no min for duim datwan. (Num. 15:27-31) Sin hem affectim olketa man long bigfala wei, and mekem olketa stap farawe from God. (Ps. 51:5; Isa. 59:2; Col. 1:21) Living bilong staka pipol stopem olketa for no fren witim Jehovah, so olketa misstim nambawan chance for showimaot glory bilong God. No eni samting savve spoelem olketa man olsem sin.
6. Why nao iumi fit for showimaot glory bilong Jehovah nomata iumi sin?
6 Nomata iumi born sin, Jehovah hem ‘givim hope long iumi.’ (Rom. 15:13) Taem Jehovah givim Jesus Christ olsem sakrifaes for iumi, hem mekem wei for iumi kamap free from sin. From iumi showimaot faith long datfala sakrifaes “iumi no slave bilong sin moa,” bat iumi fit for showimaot glory bilong Jehovah and fren witim hem. (Rom. 5:19; 6:6; John 3:16) Sapos iumi gohed fren witim God bae hem blessim iumi distaem, and long future bae hem mekem iumi perfect and givim iumi laef olowe. Hem nambawan blessing for God ting long iumi olsem pipol wea savve showimaot glory bilong hem, nomata iumi pipol wea sin!
WANEM NAO HELPEM IUMI SHOWIMAOT GLORY BILONG GOD?
7. Sapos iumi laek showimaot glory bilong God iumi mas honest long iumiseleva abaotem wanem samting?
7 Sapos iumi laek showimaot glory bilong God, iumi mas luksavve iumi evriwan born sin. (2 Chron. 6:36) Iumi mas honest long iumiseleva abaotem olketa wik point bilong iumi and waka hard for winim olketa mekem iumi savve givim glory long God. Olsem example, sapos iumi lukluk long olketa rabis piksa wea datwan hem wanfala sin, iumi mas luksavve iumi needim olketa elder for helpem iumi and askem olketa for helpem iumi. (Jas. 5:14, 15) Sapos man wea duim disfala sin hem barava laek for givim glory long God, datwan nao hem first samting wea hem mas duim. Iumi mas mek sure iumi obeyim Jehovah long evri samting wea iumi duim long laef. (Prov. 28:18; 1 Cor. 10:12) Nomata wanem nao olketa wik point bilong iumi, iumi mas gohed waka hard for winim olketa mekem iumi savve showimaot glory bilong God.
8. Nomata iumi no perfect, wanem nao iumi mas duim?
8 Jesus nomoa man wea evritaem duim samting wea mekem God hapi and showimaot glory bilong God long perfect wei. Nomata iumi no perfect olsem Jesus, iumi shud traem best for followim example bilong hem. (1 Pet. 2:21) Jehovah luksavve taem iumi winim olketa wik point. Hem luksavve tu wei wea iumi traem best for givim glory long hem, and hem blessim hard waka bilong iumi.
9. Hao nao Bible helpem iumi for kamap gud long wei for showimaot glory bilong God?
9 Bible savve helpem iumi for kamap gud long wei for showimaot glory bilong God. Iumi mas studyim gud Bible and ting raonem wanem iumi readim. (Ps. 1:1-3) Taem iumi readim Bible evriday bae iumi luksavve wanem change nao iumi need for duim, mekem iumi kamap gudfala Christian. (Readim James 1:22-25.) Samting wea iumi lanem long Bible hem strongim faith bilong iumi. Hem strongim iumi tu for no duim bigfala sin and for duim samting wea mekem Jehovah hapi.—Ps. 119:11, 47, 48.
10. Hao nao wei for prea savve helpem iumi kamap gud long wei wea iumi servem Jehovah?
10 Nara samting wea iumi mas duim sapos iumi laek for showimaot glory bilong God hem for “gohed for prea and no givap.” (Rom. 12:12) Iumi shud prea for Jehovah helpem iumi worshipim hem long wei wea stret. Iumi savve askem hem for givim holy spirit long iumi, for strongim go moa faith bilong iumi, and for helpem iumi no foldaon long eni samting wea switim iumi for duim wanem hem no stret. Iumi savve askem hem tu for helpem iumi kamap gud long wei for teachim pipol abaotem Bible. (2 Tim. 2:15; Matt. 6:13; Luke 11:13; 17:5) Olsem wanfala pikinini hem trustim dadi bilong hem, iumi mas trustim Dadi bilong iumi long heven tu. Sapos iumi askem Jehovah for helpem iumi kamap gud long wei wea iumi servem hem, iumi sure hem bae helpem iumi. Iumi mas no tingse Jehovah hem taed for herem prea bilong iumi. So taem iumi prea iumi shud praisem hem, talem thankiu long hem, and askem hem for leadim iumi, especially long olketa hard taem. Iumi savve askem Jehovah tu for helpem iumi duim samting wea givim glory long nem bilong hem.—Ps. 86:12; Jas. 1:5-7.
11. Hao nao olketa meeting bilong iumi helpem iumi showimaot glory bilong God?
11 God hem markem “datfala wakaman wea faithful and wise” for lukaftarem olketa sheepsheep bilong hem. (Matt. 24:45-47; Ps. 100:3) Datfala wakaman wea faithful and wise laek for helpem iumi evriwan for showimaot glory bilong Jehovah. Wanfala wei wea olketa helpem iumi nao hem long olketa meeting bilong iumi. Olketa meeting helpem iumi for stretem samting long laef bilong iumi and changem samfala wei bilong iumi. (Heb. 10:24, 25) Dastawe iumi shud no kam leit long olketa meeting. Sapos hem wei bilong iumi for kam leit long olketa meeting, bae iumi misstim samfala samting wea savve helpem iumi.
FOLLOWIM WEI BILONG GOD
12. Hao nao iumi savve followim wei bilong God?
12 For iumi showimaot glory bilong Jehovah, iumi mas “followim wei bilong hem.” (Eph. 5:1) Wanfala wei for duim diswan hem for garem sem tingting olsem Jehovah. Taem iumi duim samting followim tingting bilong iumiseleva, iumi no givim glory long God and iumi spoelem iumiseleva. From iumi stap long world bilong Satan, iumi mas waka hard for heitim samting wea Jehovah heitim and lovem samting wea hem lovem. (Ps. 97:10; 1 John 5:19) For iumi servem God long stretfala wei, iumi mas barava bilivim hao evri samting wea iumi duim mas givim glory long hem.—Readim 1 Corinth 10:31.
13. Why nao iumi mas heitim sin, and datwan bae mekem iumi stap klia long wanem samting?
13 From Jehovah heitim sin, iumi tu shud heitim sin. Sapos iumi heitim sin, bae iumi stap klia long eni samting wea savve leadim iumi for duim sin. Olsem example, iumi mas stap klia long wei for apostate. Olketa apostate no givim glory long God. (Deut. 13:6-9) So iumi mas stap klia long olketa apostate or eniwan wea hem wanfala brata bat duim samting wea spoelem nem bilong God. Iumi shud duim diswan nomata olketa insaed famili bilong iumi tu. (1 Cor. 5:11) Iumi no kasem eni gud samting sapos iumi trae for pruvim samting wea olketa apostate talem hem rong, or sapos iumi trae for pruvim olketa wea tok againstim organization bilong Jehovah olketa rong. Iumi mas no interest for savve long wanem olketa talem, nomata hem long buk or Internet, bikos diswan savve spoelem wei wea iumi fren witim Jehovah.—Readim Isaiah 5:20; Matthew 7:6.
14. Iumi mas olsem Jehovah long wanem important wei, and why nao olsem?
14 For iumi followim wei bilong Jehovah hem barava important for iumi showimaot love. (1 John 4:16-19) Love wea iumi garem for olketa brata and sista pruvim iumi olketa disaepol bilong Jesus and iumi worshipim Jehovah. (John 13:34, 35) From iumi no perfect, maet samfala taem hem no isi for iumi showimaot love. Bat iumi mas traem best for showimaot love evritaem. Sapos iumi waka hard for showimaot love and olketa Christian wei, datwan bae helpem iumi for no sin againstim narawan, and stopem iumi for duim samting wea no kaen.—2 Pet. 1:5-7.
15. Sapos iumi lovem olketa narawan, hao nao bae iumi showimaot datwan?
15 Sapos iumi garem love bae iumi laek for duim gud samting for nara pipol. (Rom. 13:8-10) Olsem example, sapos hasband and waef lovem tufala, bae tufala evritaem faithful. Sapos iumi lovem olketa elder and tinghae long waka wea olketa duim, bae iumi obeyim and stap anda long olketa. Olketa pikinini wea lovem dadi and mami bae obeyim and respectim olketa and no tok spoelem olketa. Sapos iumi lovem olketa narawan, bae iumi no tingse iumi winim olketa and bae iumi no story long olketa long wei wea no showimaot respect. (Jas. 3:9) Olketa elder wea lovem sheepsheep bilong God bae kaen long olketa.—Acts 20:28, 29.
16. Sapos iumi lovem God and pipol, hao nao datwan helpem iumi long ministry?
16 Iumi shud showimaot love long pipol wea iumi meetim long ministry tu. From iumi barava lovem Jehovah, bae iumi no wikdaon taem pipol no interest or no lisin long message bilong iumi. Bat iumi bae gohed for preachim gud nius. Bae iumi prepare firstaem and traem best for duim gud ministry bilong iumi. Sapos iumi lovem God and pipol, bae iumi no preach from hem samting iumi mas duim nomoa, bat bae iumi hapi for preach and ting long datwan olsem wanfala nambawan privilege.—Matt. 10:7.
GOHED GIVIM GLORY LONG JEHOVAH
17. From iumi luksavve sin savve stopem iumi for no showimaot glory bilong God, wanem nao iumi mas duim?
17 Staka pipol long world no luksavve sin hem barava spoelem iumi evriwan. Bat iumi luksavve long datwan. Dastawe iumi savve iumi mas faet againstim feeling for laek duim sin. Iumi savve iumi mas trainim konsens bilong iumi mekem datwan savve helpem iumi duim stret samting taem iumi garem feeling for laek duim rong samting. (Rom. 7:22, 23) Iumi evriwan garem olketa wik point, bat God savve strongim iumi for duim stret samting nomata wanem samting kasem iumi.—2 Cor. 12:10.
18, 19. (a) Wanem nao savve helpem iumi for winim datfala faet againstim Satan and olketa demon? (b) Wanem nao iumi laek gohed strong for duim?
18 From iumi laek givim glory long Jehovah, iumi mas faet againstim Satan and olketa demon bilong hem. Sapos iumi iusim “evri samting for faet wea God givim,” iumi savve winim datfala faet. (Eph. 6:11-13) Satan barava waka hard for duim samting wea bae mekem Jehovah no kasem glory wea Hem nomoa shud kasem. Satan waka hard tu for spoelem wei wea iumi fren witim God. Dastawe taem iumi and staka nara man, woman, and pikinini wea no perfect gohed faithful and givim glory long God, Satan hem no win nao! So iumi mas gohed for praisem Jehovah, olsem olketa long heven wea sei: “Jehovah, wea iu nao God bilong mifala and wea iu garem bigfala paoa, iu nao fit for kasem glory and for evriwan mekhae long iu bikos iu wakem evri samting, and evri samting hem stap bikos hem nao wanem iu laekem.”—Rev. 4:11.
19 Iumi laek gohed strong for givim glory long Jehovah. Jehovah barava hapi tumas taem staka wea worshipim hem duim best bilong olketa for followim wei bilong hem and showimaot glory bilong hem. (Prov. 27:11) Iumi mas olsem David wea praisem Jehovah long full heart bilong hem and sei: “Mi bae givim glory long nem bilong iu for olowe.” (Ps. 86:12) Olketa wea obeyim Jehovah bae fit for showimaot glory bilong hem long perfect wei and praisem hem for olowe. Datwan bae hem wanfala nambawan taem! Waswe, iu showimaot glory bilong Jehovah God distaem, and garem hope for duim datwan for olowe?
[Piksa long page 27]
Waswe, iu duim olketa samting hia for showimaot glory bilong Jehovah?