Waswe, Bae Iu Showimaot Glory Bilong God?
“Iumi . . . showimaot glory bilong Jehovah olsem olketa mirror.”—2 CORINTHIANS 3:18.
1. Wanem nao Moses lukim, and wanem nao happen bihaen?
MOSES stap seleva hae antap long Maunt Sinai and hem askem God for showim hem wanfala samting wea no eniwan lukim bifor. Hem laek for lukim glory bilong God, and Jehovah letem hem for duim datwan. Disfala vision wea mekem man fraet and respectim God hem wanfala long olketa barava spesol vision wea Jehovah showimaot. Tru nao, Moses no really lukim Jehovah, bikos God hem braet tumas and sapos man lukim hem bae hem dae. Dastawe, Jehovah iusim “hand” bilong hem for protectim Moses taem Hem go pas. Luk olsem Jehovah iusim wanfala angel for duim diswan. Then Jehovah letem Moses for lukim lastfala part bilong datfala glory wea shaen braet tumas. Taem Jehovah story witim Moses hem iusim tu wanfala angel. Bible hem sei olsem abaotem samting wea happen bihaen: “Taem Moses kam daon from Maunt Sinai . . . skin long feis bilong hem shaen from hem story witim [Jehovah].”—Exodus 33:18–34:7, 29.
2. Wanem nao aposol Paul sei abaotem glory wea olketa Christian savve showimaot?
2 Tingim sapos iu stap long datfala maunten witim Moses. Hem bae spesol samting tumas for lukim glory bilong Olmaeti wea shaen braet tumas and for lisin taem Hem story kam! Tingim privilege for wakabaot kam daon from Maunt Sinai witim Moses, wea hem nao help for mekem datfala Law covenant kamap! Bat iu savve, long samfala wei, olketa tru Christian fit for showimaot glory bilong God winim wei wea Moses duim. Datfala interesting point hem showaot insaed wanfala leta bilong aposol Paul. Hem sei olketa anointed Christian savve “showimaot glory bilong Jehovah olsem olketa mirror.” (2 Corinthians 3:7, 8, 18) Olketa Christian wea hope for stap long earth savve showimaot tu glory bilong God.
Wei wea Olketa Christian Showimaot Glory Bilong God
3. Why nao iumi fit for sei savve bilong iumi abaotem Jehovah hem winim savve bilong Moses?
3 Hao nao bae iumi fit for showimaot glory bilong God? Iumi no olsem Moses wea lukim and herem Jehovah. Bat, iumi savve plande samting abaotem Jehovah wea Moses no savve abaotem. Jesus kamap Messiah samting olsem 1,500 year bihaen Moses dae. So, hard for Moses savve hao Jesus bae fulfillim datfala Law and givim laef bilong hem for baem bak olketa man from sin and dae. (Romans 5:20, 21; Galatians 3:19) And tu, Moses no fit for minim evribit nambawan plan bilong Jehovah, wea join witim Kingdom bilong Messiah, and datfala Paradaes long earth wea kingdom hia bae mekem kamap. So iumi no lukim glory bilong Jehovah witim really eye, bat iumi lukim thru long eye bilong faith wea garem faondeson long olketa Bible teaching. Nara samting tu, iumi no herem voice bilong Jehovah thru long wanfala angel, bat thru long Bible, especially olketa Gospel, wea storyim long barava naesfala wei ministry and teaching bilong Jesus.
4. (a) Hao nao olketa anointed Christian showimaot glory bilong God? (b) Hao nao olketa wea hope for stap long earth savve showimaot glory bilong God?
4 Olketa Christian no showimaot glory bilong God thru long wei wea laet shaen kam from feis bilong olketa. Nomata olsem, feis bilong olketa hem luk braet taem olketa talem narawan abaotem olketa nambawan fasin and plan bilong Jehovah. Profet Isaiah talem hao pipol bilong God distaem “bae talemaot glory bilong [Jehovah] midolwan long olketa nation.” (Isaiah 66:19) And long 2 Corinthians 4:1, 2, hem sei: “From iumi garem disfala ministry . . . , iumi rejectim finis olketa samting wea no honest wea mekem iumi shame, iumi no followim giaman wei, and no spoelem word bilong God tu, bat iumi mekem truth showaot klia and God lukim hao samting wea iumi duim hem fitim conscience bilong evri man.” Toktok bilong Paul hem really for olketa anointed Christian, wea olketa nao “olketa minister bilong wanfala niu covenant.” (2 Corinthians 3:6) Bat ministry bilong olketa affectim tu staka pipol wea garem hope for laef olowe long earth. Ministry bilong tufala sekson hia showimaot glory bilong Jehovah thru long samting olketa teachim and thru long living bilong olketa. Tru nao, hem responsibility and privilege bilong iumi for showimaot glory bilong Most Hae God olsem wanfala mirror!
5. Wei wea iumi gohed strong long spiritual wei showimaot wanem samting?
5 Olsem Jesus talem finis, nambawan gud nius bilong Kingdom bilong God hem kasem evri ples long earth distaem. (Matthew 24:14) Olketa man from evri nation, tribe, pipol, and languis barava acceptim gud nius and olketa changem laef bilong olketa mekem olketa fit for duim wanem God laekem. (Romans 12:2; Revelation 7:9) Olsem olketa Christian bifor, olketa no savve stop for tok abaotem olketa samting wea olketa lukim and herem. (Acts 4:20) Distaem, winim six million nao showimaot glory bilong God. Diswan hem staka winim enitaem bifor. Waswe, iu wanfala long olketa hia? Wei wea pipol bilong God gohed strong long spiritual wei, showimaot hao Jehovah blessim and protectim olketa. And wei wea olketa strongfala paoa againstim iumi hem narafala samting wea pruvim hao spirit bilong Jehovah hem stap witim iumi. Bat why nao spirit bilong Jehovah hem stap witim iumi?
No Eniwan Savve Stopem Pipol Bilong God for Preach
6. For saedem Jehovah, why nao man mas garem faith and no fraet?
6 Waswe sapos iu mas go long kot for witness againstim wanfala barava nogud criminal? Iu savve hao datfala criminal garem wanfala strong organization and hem bae iusim eni wei for stopem iu for talemaot nogud samting wea hem duim. For iu witness againstim criminal olsem iu mas no fraet and mas trustim tu olketa police for protectim iu from datfala man. Iumi distaem olsem tu. Taem iumi witness abaotem Jehovah and olketa plan bilong hem, iumi witness againstim Satan, and iumi showimaot hao hem man for killim dae narawan, hem laea, and hem leadim go rong evri pipol long earth. (John 8:44; Revelation 12:9) For saedem Jehovah and againstim Devil iu mas garem faith and no fraet.
7. Wanem kaen paoa nao Satan garem, and wanem nao hem trae hard for duim?
7 Tru nao, Jehovah nao barava hae winim evriwan. Paoa bilong hem barava strong winim paoa bilong Satan. Iumi savve trustim hao Jehovah hem fit and hem willing for protectim iumi from iumi loyal for servem hem. (2 Chronicles 16:9) Nomata olsem, Satan nao ruler bilong olketa demon and disfala world wea no followim God. (Matthew 12:24, 26; John 14:30) From Satan hard for lusim disfala earth and hem “kros tumas,” hem barava againstim olketa servant bilong Jehovah and hem iusim world wea hem kontrolem for trae stopem disfala waka for preachim gud nius. (Revelation 12:7-9, 12, 17) Hao nao hem duim diswan? Long plande wei, bat tingim thrifala wei.
8, 9. Hao nao Satan mekius long wei wea pipol lovem olketa rong samting, and why nao iumi mas chusim gud hu nao iumi kaban witim?
8 Wanfala wei wea Satan trae for pullim iumi nao, hem thru long wei for mekem iumi wari abaotem living. Pipol wea stap insaed olketa last day distaem lovem selen, lovem olketa seleva, and lovem hapitaem. Olketa no lovem God. (2 Timothy 3:1-4) From pipol busy tumas long olketa samting wea olketa duim evriday, plande ‘no lisin’ long gud nius wea iumi talemaot. Olketa no interest for lanem tru samting wea Bible teachim. (Matthew 24:37-39) Kaen tingting olsem savve affectim iumi and mekem iumi no ting strong long wei wea iumi fren witim Jehovah. Sapos iumi letem iumiseleva for lovem olketa material samting and lovem hapitaem, isisi, love bilong iumi for God bae lus.—Matthew 24:12.
9 From diswan, olketa Christian careful for chusim hu nao olketa kaban witim. King Solomon hem sei: “Man wea wakabaot witim wise pipol bae kamap wise, bat man wea kaban witim krangge pipol bae kasem trabol.” (Proverbs 13:20) So hem gud for iumi “wakabaot” witim olketa wea showimaot glory bilong God. Tru nao, iumi hapi tumas taem iumi duim datwan! Taem iumi hipap witim olketa brata and sista bilong iumi long meeting and narataem tu, love, faith, hapi, and wisdom bilong olketa hem encouragem iumi. Gudfala wei for kaban olsem hem strongim wei wea iumi disaed strong for gohed duim ministry bilong iumi.
10. Hao nao Satan iusim wei for tok spoelem man for againstim olketa wea showimaot glory bilong God?
10 Wei for tok spoelem man nao hem mek-tu wei wea Satan trae for stopem olketa Christian for showimaot glory bilong God. Iumi shud no sapraes long diswan. Taem Jesus Christ duim ministry bilong hem long earth, pipol tok spoelem hem, laf long hem, tok daonem hem, mekfani long hem, no respectim hem, and spit long hem tu. (Mark 5:40; Luke 16:14; 18:32) Pipol tok spoelem tu olketa Christian bifor. (Acts 2:13; 17:32) Olketa servant bilong Jehovah distaem kasem sem samting. Aposol Peter talem finis hao pipol bae ting long olketa olsem olketa false profet. Hem sei: “Long olketa last day pipol wea laek for tok spoelem samting bae kam witim toktok bilong olketa, followim samting wea olketa seleva laekem and sei: ‘Wea nao disfala taem wea hem promisim hem bae stap moa? . . . Evri samting gohed semsem olsem from start bilong creation.’” (2 Peter 3:3, 4) Pipol tok spoelem olketa servant bilong God and sei olketa ova tumas. Pipol sei olketa mark bilong Bible saed long fasin no fitim distaem. Long tingting bilong staka pipol, message wea iumi preach abaotem hem krangge samting nomoa. (1 Corinthians 1:18, 19) From iumi Christian, pipol savve tok spoelem iumi long skul, ples for waka, and insaed famili tu. Nomata olsem, iumi gohed for showimaot glory bilong God thru long waka bilong iumi for preach, from iumi savve olsem Jesus hao Word bilong God hem truth.—John 17:17.
11. Hao nao Satan iusim persecution for trae stopem olketa Christian for preach?
11 Mek-thri samting wea Devil iusim for trae stopem iumi, hem nao persecution and wei wea pipol againstim iumi. Jesus sei olsem long olketa follower bilong hem: “Pipol bae persecutim and bae killim iufala dae, and evri nation bae heitim iufala bikos long nem bilong mi.” (Matthew 24:9) Tru nao, from iumi Olketa Jehovah’s Witness, iumi kasem barava nogud persecution long plande ples long earth. Iumi savve Jehovah talem finis hao wei for heit bae kamap midolwan olketa wea servem God and olketa wea servem Satan. (Genesis 3:15) Iumi savve tu hao wei for faithful nomata iumi kasem test hem pruvim hao sovereign rul bilong Jehovah long universe hem barava stret. Wei for savve long diswan hem strongim iumi for gohed nomata iumi kasem olketa barava hardfala taem. Sapos iumi gohed strong for showimaot glory bilong God, no eni persecution savve stopem evribit wei for witness abaotem Jehovah.
12. Why nao iumi shud hapi from iumi faithful nomata Satan againstim iumi?
12 Waswe, iu strong for no followim world and gohed faithful nomata pipol tok spoelem and againstim iu? Sapos olsem iu fit for hapi. Jesus promis olsem long olketa follower bilong hem: “Iufala hapi nomoa taem pipol tok spoelem iufala and persecutim iufala and talem laea samting wea barava nogud againstim iufala bikos long mi. Hapi and jampjamp from iufala hapi, from reward bilong iufala hem big long heven; bikos long sem wei tu olketa persecutim olketa profet bifor.” (Matthew 5:11, 12) Wei wea iu faithful hem showimaot hao holy spirit bilong Jehovah hem stap witim iu, and strongim iu for showimaot glory bilong hem.—2 Corinthians 12:9.
Jehovah Helpem Iumi for Gohed Strong
13. Wanem nao main samting wea mekem iumi gohed for duim Christian ministry bilong iumi?
13 Wanfala main reason why iumi gohed strong long ministry hem from iumi lovem Jehovah and kasem hapi from wei wea iumi showimaot glory bilong hem. Olketa man savve laek followim example bilong samwan wea olketa lovem and respectim. Jehovah God nomoa hem barava nambawan example wea fit for iumi followim. From Jehovah garem bigfala love, hem sendem kam Son bilong hem long earth for witness abaotem truth and for baem bak olketa man wea obey. (John 3:16; 18:37) God laekem pipol for repent and kasem salvation. Iumi tu ting olsem, dastawe iumi preach long olketa. (2 Peter 3:9) From iumi feel olsem, and bikos iumi disaed strong for followim example bilong God, diswan muvim iumi for no givap for showimaot glory bilong hem thru long ministry bilong iumi.
14. Hao nao Jehovah strongim iumi for gohed duim ministry bilong iumi?
14 Bat really, Jehovah nao givim iumi strong for gohed duim Christian ministry. Hem savve sapotim and strongim iumi thru long spirit, organization, and Word bilong hem, Bible. Jehovah “givim fasin for gohed strong” long olketa wea willing for showimaot glory bilong hem. Hem savve ansarem olketa prea bilong iumi and givim iumi wisdom for deal witim olketa hard samting wea iumi kasem. (Romans 15:5; James 1:5) And tu, Jehovah no savve letem iumi for kasem eni hard samting wea iumi kanduit deal witim. Sapos iumi trustim Jehovah, hem bae mekem wei for iumi winim datfala problem mekem iumi savve gohed showimaot glory bilong hem.—1 Corinthians 10:13.
15. Wanem nao helpem iumi for gohed strong?
15 Wei wea iumi gohed strong long ministry bilong iumi showimaot hao spirit bilong God stap witim iumi. Olsem example: Waswe sapos samwan askem iu for go from haos tu haos and givim free wanfala kaen bred. Hem talem iu tu, for iu mas iusim selen and free taem bilong iuseleva for duim diswan. Taem iu duim, iu faendaot hao tu-thri pipol nomoa laekem bred bilong iu, and tu, samfala barava les and trae for stopem iu for givimaot datwan. Waswe, iu bae willing for gohed duim disfala waka for evri month, and evri year? Luk olsem, nomoa. Bat maet for plande year finis iu barava waka hard and iusim taem and selen bilong iuseleva for talemaot datfala gud nius. Why nao iu duim datwan? Iu duim bikos iu lovem Jehovah and bikos hem givim spirit bilong hem for helpem iu gohed strong!
Wanfala Waka for No Forgetim
16. Sapos iumi gohed strong long ministry wanem nao iumi and olketa wea lisin long iumi bae kasem?
16 Datfala ministry bilong niu covenant hem wanfala barava spesol present winim eni narawan. (2 Corinthians 4:7) Long sem wei tu, Christian ministry wea olketa nara sheep duim evriwea long world hem barava spesol. Olsem Paul talem long Timothy, taem iu gohed strong for duim ministry bilong iu, iu savve “sevem [iuseleva] and olketa wea lisin long iu.” (1 Timothy 4:16) Tingim datwan. Gud nius wea iu preachim long olketa narawan hem mekem olketa garem chance for laef olowe. Iu savve mekem grow gudfala wei for fren witim olketa wea iu helpem long spiritual wei. Tingim hao bae iu hapi fogud for stap olowe long Paradaes witim olketa hia! For sure, olketa bae nating forgetim wei wea iu waka hard for helpem olketa. Tru nao, datwan bae mekem iu barava feel satisfae!
17. Why nao iumi fit for sei iumi stap long wanfala barava spesol taem?
17 Distaem iu stap long wanfala barava spesol taem. No enitaem moa bae iumi preachim gud nius long pipol wea nating fren witim God. Noah stap midolwan kaen pipol olsem, and hem lukim taem olketa distroe. Hem masbi hapi tumas taem hem ting go bak long wei wea hem faithful for duim will bilong God for buildim wanfala ark, wea mekem hem and famili bilong hem laef! (Hebrews 11:7) Iu savve hapi olsem tu. Tingim feeling bilong iu taem iu stap long niu world and ting go bak long olketa samting wea iu duim long olketa last day, and iu lukim hao iu duim best bilong iu for Kingdom.
18. Wanem promis wea encouragem iumi nao Jehovah talem for olketa servant bilong hem?
18 So iumi mas gohed for showimaot glory bilong God. Diswan hem samting iumi bae rememberim for olowe. Jehovah tu rememberim waka bilong iumi. Bible encouragem iumi olsem: “God hem no wicked mekem hem forgetim waka bilong iufala and love wea iufala showimaot for nem bilong hem, long wei wea iufala servem olketa holy wan and gohed for serve. Bat mifala laekem evriwan long iufala for showimaot semkaen fasin for waka hard mekem iufala savve garem full trust long datfala hope go kasem end, mekem iufala no kamap lesy, bat followim olketa wea thru long faith and patient fasin kasem olketa promis.”—Hebrews 6:10-12.
Iu Savve Explainim Diswan?
• Hao nao olketa Christian showimaot glory bilong God?
• Wanem nao samfala samting wea Satan iusim for stopem pipol bilong God for preach?
• Wanem nao showimaot spirit bilong God hem stap witim iumi?
[Piksa long page 15]
Feis bilong Moses showimaot glory bilong God
[Olketa Piksa long page 16]
Iumi showimaot glory bilong God long ministry bilong iumi