Olketa Barava Willing for Preach Long Brazil
TU-THRI year go finis, Rúbia (1), wanfala sista wea hem 30 year distaem, hem go visitim Sandra (2) wea pioneer long wanfala smol kongregeson long south part long Brazil. Taem Rúbia long there, wanfala samting wea happen mekem hem disaedem samting wea changem laef bilong hem. Wanem nao happen? Iumi lukim wanem Rúbia talem.
“MI SAPRAES TUMAS TAEM HEM TALEM DATWAN”
Rúbia hem sei: “Mi go witim Sandra long wanfala Bible study bilong hem. Taem mifala study, datfala woman sei olsem: ‘Sandra, thrifala gele wea mi waka witim laek for studyim Bible tu, bat mi talem olketa bae olketa mas weit firstaem. Mi savve disfala year bae iu no fit for study witim eniwan moa nao.’” Rúbia sei moa: “Mi sapraes tumas taem hem talem datwan. Mi hard for bilivim pipol wea laek for savve long Jehovah mas weit for samwan study witim olketa! Long hom kongregeson bilong mi, nomata for faendem wanfala Bible study nomoa bat hem hard tu. Taem datfala Bible study talem datwan, mi savve nao mi barava laek for helpem pipol long datfala smol taon. No longtaem bihaen, mi lusim big taon wea mi stap long hem and muv go long taon wea Sandra hem pioneer.”
Waswe, Rúbia kasem gud samting from wanem hem disaedem? Hem sei: “Bihaen tufala month, mi garem 15-fala Bible study, and olsem Sandra, mi tu no fit for study witim evriwan wea laek for study!”
HEM LUKLUK GUD MOA LONG MINISTRY BILONG HEM
Diego (3), wanfala brata wea samting olsem 20 year, hem go visitim tufala pioneer wea stap long Prudentópolis, wanfala smol taon long south part long Brazil. Datfala visit mekem hem for lukluk gud moa long ministry bilong hem. Hem sei: “Mi no duim staka samting long kongregeson bilong mi, and mi savve preach for tu-thri hour nomoa evri month. Taem mi visitim tufala pioneer hia and herem olketa experience bilong tufala, mi lukim tufala hapi tumas bikos tufala gohed strong long ministry. Bat mi, mi no ting strong nomoa long ministry bilong mi. Mi laek for hapi and satisfae tu olsem tufala.” Taem Diego go bak, hem start for pioneer nao.
Waswe, iu wanfala young Witness olsem Diego wea duim preaching waka and gogo long olketa kongregeson meeting, bat iu no enjoyim tumas ministry, and iu ting long hem olsem samting wea iu mas duim nomoa? Sapos olsem, waswe, iu savve changem samfala samting long laef bilong iu mekem iu fit for muv go long ples wea needim samfala pablisa moa for preach abaotem Kingdom? Hem tru, hem hard samting for lusim living wea isi, and maet iu wari nogud bae iu faendem hem hard tumas taem iu muv long nara ples. Nomata olsem, hem nao samting wea staka young wan duim finis. Olketa no hol bak for changem olketa goal bilong olketa mekem olketa fit for duim moa samting long waka bilong Jehovah. Tingim example bilong Bruno.
MAN FOR PLEIM MUSIC OR MAN FOR PREACH?
Tu-thri year go finis, Bruno (4), wea hem 28 year distaem, hem skul long wanfala music skul wea pipol tinghae long hem, and goal bilong hem for kamap man for leadim orchestra. From hem wanfala top student long datfala skul, tu-thri taem nao olketa askem hem for leadim symphony orchestra. Luk olsem hem fit for kasem bigfala nem long datfala waka. Bruno hem sei: “Nomata olsem, mi no really satisfae long laef bilong mi. Mi dedicatem laef bilong mi finis long Jehovah, bat mi luksavve mi no givim best bilong mi long hem, and datwan mekem mi feel nogud. Mi story long Jehovah abaotem hao mi feel, and mi story tu witim samfala mature brata long kongregeson. Bihaen mi tingting strong abaotem diswan, mi disaedem preaching waka nao mas first samting long laef bilong mi, so mi lusim datfala music skul, and muv go long ples wea needim samfala pablisa moa for preach abaotem Kingdom.” Waswe, Bruno kasem gud samting from wanem hem disaedem?
Bruno muv go long Guapiara, wanfala smol taon wea stap 260 kilometer from São Paulo. Samting olsem 7,000 pipol nao stap long Guapiara. Laef bilong Bruno long Guapiara hem barava difren. Hem sei: “Mi go stap insaed wanfala smol haos wea no garem ice, TV, or Internet connection. Nomata olsem, mi garem samfala samting wea mi nating garem bifor, olsem supsup garden and staka frut tree!” Bruno joinim wanfala smol kongregeson, and wantaem evri week hem tekem kaikai, wata, and samfala pablikeson, and go long motorbike bilong hem for preach long olketa farawe territory. Staka pipol long olketa territory hia nating herem gud nius bifor. Hem sei: “Mi garem samting olsem 18-fala Bible study. Taem mi lukim olketa student hia changem samfala samting long laef bilong olketa, datwan mekem mi barava hapi!” Hem sei tu: “Datfala taem nao mi luksavve why mi no hapi bifor hem bikos Kingdom hem no first samting long laef bilong mi. Sapos mi aftarem goal bilong mi saed long music, hard tumas for mi hapi olsem.” Wanem nao Bruno duim for kasem selen taem hem long Guapiara? Hem smile taem hem sei: “Mi lanem olketa narawan for pleim guitar.” Bruno hem still man for pleim music.
“MI DISAED FOR STAP NAO”
Story bilong Mariana (5) wea hem klosap kasem 30 year distaem, hem klosap semsem witim story bilong Bruno. Mariana hem wanfala lawyer bifor, and nomata hem kasem big selen from datfala waka, hem nating hapi and satisfae long laef. Hem sei: “Mi feel olsem mi ‘aftarem wind nomoa.’” (Eccl. 1:17) Samfala brata and sista encouragem hem for pioneer. Bihaen Mariana tingting gud abaotem diswan, hem witim thrifala fren bilong hem, Bianca (6), Caroline (7), and Juliana (8), disaed for go helpem wanfala kongregeson long Barra do Bugres, wea hem wanfala smol taon klosap long Bolivia, and wea stap staka thousand kilometer from hom bilong olketa. Then wanem nao happen?
Mariana sei: “Plan bilong mi hem for stap long there for thrifala month nomoa. Bat kasem end bilong thrifala month hia, mi garem 15-fala Bible study! And olketa Bible student hia needim staka help yet for savve long truth. From mi sorre long olketa mi no laek for talem olketa mi plan for go bak, so mi disaed for stap nao.” Nara thrifala sista tu disaedem sem samting. Waswe, disfala samting wea Mariana disaed for duim mekem hem hapi and satisfae? Hem sei: “Wei wea Jehovah iusim mi for helpem pipol changem laef bilong olketa for kamap gud hem mekem mi barava feel gud. Mi hapi tumas bikos distaem mi iusim taem and strong bilong mi for duim gud samting for helpem pipol.” Caroline talem feeling bilong fofala sista hia taem hem sei: “Long end bilong each day mi feel barava satisfae bikos mi savve mi duim best bilong mi long Kingdom waka. Important samting long laef bilong mi distaem hem for helpem olketa Bible study bilong mi. Mi hapi tumas taem mi lukim olketa muv ahed gud. Mi luksavve toktok long disfala scripture hem tru, wea sei: ‘Trustim Jehovah mekem iufala savve lukim Jehovah hem gud tumas.’”—Ps. 34:8.
Jehovah hem hapi tumas for lukim staka young brata and sista evriwea long world olketa “barava willing” for preachim gud nius abaotem Kingdom long olketa farawe ples! (Ps. 110:3; Prov. 27:11) And Jehovah hem barava blessim olketa young brata and sista hia.—Prov. 10:22.