Kasem Barava Gud Samting From Wei for Readim Bible
“Mi barava lovem law bilong God.”—ROME 7:22.
1-3. Wanem gud samting nao bae iumi kasem sapos iumi readim Bible and followim wanem iumi lanem?
WANFALA olo sista sei: “Evri morning mi sei thankiu long Jehovah for helpem mi minim Bible.” Nomata hem readim Bible winim 40-fala taem finis, hem gohed readim yet. Nara sista sei wei for readim Bible helpem hem for savve Jehovah hem really stap, and for fren gud witim hem. Hem sei: “Mi hapi winim eni narataem long laef bilong mi!”
2 Aposol Peter sei iumi mas lovem olketa tru teaching long Bible. (1 Pet. 2:2) Taem iumi studyim Bible and followim wanem iumi lanem, iumi savve garem gudfala konsens, and gudfala laef. Datwan savve helpem iumi for fren gud witim olketa narawan wea lovem and worshipim trufala God. Hem nao olketa gudfala reason for iumi “barava lovem law bilong God.” (Rome 7:22) Wanem moa samfala gud samting wea iumi savve kasem from wei for studyim Bible?
3 Taem iu gohed for lane abaotem Jehovah and Son bilong hem, bae iu lovem tufala and nara pipol tu. Bae iu lanem tu hao God bae sevem pipol wea raeteous taem hem finisim olketa nogud pipol. Iu garem gud nius for sharem witim pipol taem iu duim ministry. And Jehovah bae helpem iu taem iu teachim nara pipol wanem iu lanem.
READIM AND TING RAONEM
4. Wanem nao hem minim for “readim and ting raonem” Bible?
4 Jehovah laekem iumi for spendem taem for ting raonem and minim samting wea iumi readim long Bible. Hem sei long Joshua: “Iu mas evritaem story abaotem disfala buk bilong law, and iu mas readim and ting raonem evri day and evri naet.” (Josh. 1:8; Ps. 1:2) For “readim and ting raonem” Bible iu mas no read fast tumas bat readim long wei wea iu savve ting raonem wanem iu readim. Sapos iu duim olsem, bae iu savve ting raonem gud olketa verse wea savve helpem and encouragem iu. Taem iu readim wanfala toktok or story wea encouragem iu, readim slow, or maet iu talem olketa word wea iu readim tu. Sapos olsem, wanem iu readim bae barava kasem heart bilong iu. Why nao hem important for duim olsem? Bikos taem iu minim gud toktok bilong God, bae iu laek for followim tu.
5-7. Storyim olketa example wea showimaot wei for readim and ting raonem Bible savve helpem iu for (a) obeyim olketa law bilong God; (b) tok kaen long olketa narawan; (c) trustim Jehovah nomata long olketa hard taem.
5 Taem iumi readim olketa buk long Bible wea no isi for minim, hem gud for readim slow mekem iumi savve ting raonem wanem iumi readim. Olsem example, tingim sapos wanfala young brata hem readim buk bilong Hosea. Bihaen hem readim chapter 4, verse 11 go kasem 13, hem stop and ting raonem wanem hem readim. (Readim Hosea 4:11-13.) Why nao hem duim datwan? Bikos hem kasem hevi long skul for duim olketa dirty samting. Bat taem hem ting raonem olketa verse hia, hem luksavve Jehovah lukim olketa nogud samting wea pipol duim nomata taem olketa stap seleva, and hem no laek mekem Jehovah feel nogud. Brata hia disaed strong for gohed obeyim olketa law bilong Jehovah.
6 Nara example, tingim sapos wanfala sista hem readim buk bilong Joel and hem kasem chapter 2, verse 13. (Readim Joel 2:13.) Disfala verse mekem hem luksavve hem shud followim example bilong Jehovah wea “kaen and showimaot mercy, no kwiktaem for kros, and garem bigfala love.” Hem disaed for changem samfala wei bilong hem bikos samfala taem hem savve kros and talem toktok wea spoelem hasband bilong hem, and olketa narawan tu.
7 Mek-thri example, tingim sapos wanfala brata wea garem waef and olketa pikinini hem finis from waka bilong hem and wari abaotem hao for provaedem need bilong famili. Hem readim buk bilong Nahum and ting raonem gud wanem hem readim. Long Nahum 1:7, hem sei Jehovah savve long olketa wea trust long hem, and bae hem protectim olketa long “taem bilong trabol.” Disfala verse helpem brata hia for luksavve Jehovah lovem hem and famili bilong hem, so hem no wari tumas nao. Then hem readim verse 15. (Readim Nahum 1:15.) Hem luksavve hem savve showimaot hem trustim Jehovah long wei for preachim gud nius nomata long olketa hard taem. So nomata hem gohed lukaotem waka, hem disaed for spendem moa taem tu long midol week for duim preaching waka.
8. Storyim samting wea iu lanem taem iu readim Bible.
8 Olketa gudfala point wea iumi just storyim kam from olketa buk long Bible wea samfala tingse hem no isi for man minim. Bat taem iu readim olketa verse wea encouragem iu, bae iu interest for gohed readim olketa buk hia. Olketa savve comfortim iumi and mekem iumi wise. Evri buk long Bible savve helpem iumi long wei olsem. Word bilong God hem olsem wanfala diamond mine wea staka diamond stap deep insaed long graon. Taem iu readim full Bible, gohed lukaotem “olketa diamond,” wea hem nao olketa instruction and encouragement wea stap insaed!
TRAEM BEST FOR MINIM WANEM IU READIM
9. Wanem nao iumi savve duim for minim gud Bible?
9 Hem important for iumi readim Bible evriday. Bat iu mas mek sure iu minim tu wanem iu readim. So duim research long olketa buk bilong iumi for lanem moa samting abaotem pipol, olketa ples, and olketa samting wea iu read abaotem. Sapos iu no sure hao wanfala Bible teaching maet affectim laef bilong iu, askem wanfala elder or mature brata or sista for helpem iu. Wanfala Christian long first century needim help for minim gud moa olketa teaching bilong God. Nem bilong hem Apollos.
10, 11. (a) Wanem nao helpem Apollos for teach gud long ministry? (b) Wanem nao iumi lanem from example bilong Apollos? (Lukim box “Waswe, Iu Teachim Truth Followim Hao Iumi Minim Distaem?”)
10 Apollos hem wanfala Jew Christian wea savve gud long olketa Holy Raeting and hem strong for preach. Buk bilong Acts sei hem preach abaotem Jesus. Bat Apollos no luksavve Jesus teachim olketa disaepol bilong hem niu samting abaotem wei for baptaes. Wanfala hasband and waef, Aquila and Priscilla, herem Apollos teach long Ephesus, and tufala helpem hem for “minim gud moa teaching bilong God.” (Acts 18:24-26) Wanem gud samting nao Apollos kasem from diswan?
11 Bihaen Apollos preach long Ephesus, hem go long Achaia and preach long there. Hem iusim olketa Holy Raeting for showimaot teaching bilong olketa Jew hem no stret, and for showimaot Jesus nao hem datfala Christ. Hem helpem olketa wea bilivim datfala gud nius. (Acts 18:27, 28) From Apollos minim gud nao why olketa Christian baptaes, hem “barava helpem” olketa niu wan for kamap strongfala Christian. Wanem nao iumi lanem from disfala story? Iumi savve followim example bilong Apollos long wei for traem best for minim wanem iumi readim long Bible. Bat iumi mas hambol tu and hapi for acceptim help wea savve mekem iumi kamap gudfala teacher.
IUSIM WANEM IU LANEM FOR HELPEM NARA PIPOL
12, 13. Hao nao iumi savve iusim gud Bible for helpem wanfala Bible study disaed for worshipim Jehovah?
12 Olsem Priscilla, Aquila, and Apollos, iumi tu savve helpem nara pipol. Taem iu helpem samwan wea interest for changem samfala samting long laef bilong hem mekem hem kamap strongfala Christian, hao nao datwan mekem iu feel? Or sapos iu wanfala elder, hao nao iu feel taem wanfala brata or sista talem thankiu long iu for help wea iu givim long hem from Bible taem hem kasem hard taem? Taem iumi iusim Bible for helpem narawan changem samfala samting long laef bilong hem, datwan mekem iumi barava hapi.a Hao nao iu savve duim olsem?
13 Long taem bilong Elijah, staka Israelite no disaed sapos olketa bae followim tru worship or false worship. Samting wea Elijah talem long olketa Israelite savve helpem wanfala Bible study wea no disaed yet for worshipim Jehovah. (Readim 1 Kings 18:21.) Or maet man wea interest hem fraet nogud olketa fren or famili bilong hem tok spoelem hem from hem studyim Bible. Iu savve iusim toktok long Isaiah 51:12, 13 (Readim.) for helpem hem disaed for worshipim Jehovah.
14. Wanem nao iu savve duim for rememberim olketa scripture wea iu savve iusim for helpem narawan?
14 Staka toktok long Bible savve encouragem, stretem, or strongim iumi. Bat hao nao bae iu savve long wanem scripture for iusim long taem wea iu needim? Readim Bible evriday, and ting raonem samting wea iu readim. Gogo bae iu savve gud long Bible, and Jehovah savve iusim holy spirit bilong hem for helpem iu rememberim olketa scripture.—Mark 13:11; readim John 14:26.b
15. Wanem nao bae helpem iu for minim gud Bible?
15 Iu savve prea long Jehovah for wisdom, olsem King Solomon hem duim. Iu needim wisdom for duim ministry and waka bilong iu insaed kongregeson. (2 Chron. 1:7-10) Followim example bilong olketa profet taem iu studyim gud Bible. Diswan bae helpem iu for savve long tru samting abaotem Jehovah and plan bilong hem. (1 Pet. 1:10-12) Aposol Paul talem Timothy for studyim “message abaotem biliv bilong iumi and olketa nambawan teaching.” (1 Tim. 4:6) Sapos iu gohed studyim Bible, bae iu minim gud and lane hao for iusim Bible for helpem olketa narawan. Datwan bae strongim faith bilong iu tu.
WEI FOR READIM BIBLE PROTECTIM IUMI
16. (a) Hao nao wei for readim olketa Holy Raeting evriday helpem olketa long Beroea? (b) Why nao hem important for iumi readim Bible evriday?
16 Evriday olketa Jew wea stap long Beroea readim olketa Holy Raeting. Taem Paul preach long olketa, olketa comparem wanem hem talem witim samting wea olketa lanem finis long olketa Holy Raeting. From olketa luksavve samting wea hem teachim hem tru, “staka long olketa biliv.” (Acts 17:10-12) Diswan showimaot sapos iumi readim Bible evriday, datwan savve helpem iumi for garem strongfala faith long Jehovah. For go insaed niu world bilong God, iumi mas garem strongfala faith.—Heb. 11:1.
17, 18. (a) Hao nao strongfala faith and love protectim tokpiksa heart bilong iumi? (b) Hao nao hope hem protectim iumi?
17 Paul sei iumi mas garem faith, love, and hope. Hem sei: “Iumi wea pipol bilong day mas gohed for garem gudfala tingting, and werem datfala samting for kavarem chest, wea hem nao faith and love. Iumi mas werem tu datfala helmet, wea hem nao hope wea iumi garem for sev.” (1 Thess. 5:8) Datfala samting for kavarem chest hem wankaen shield wea soldia werem for protectim heart bilong hem. Iumi mas protectim tokpiksa heart bilong iumi tu. Taem Christian garem strongfala faith long olketa promis bilong God and barava lovem Hem and nara pipol, datwan bae protectim tokpiksa heart bilong hem. Hem bae traem best bilong hem for evritaem mekem God hapi.
18 Paul story tu abaotem tokpiksa helmet wea iumi mas werem. Hem nao “hope wea iumi garem for sev.” Long taem bilong Bible, olketa soldia savve werem helmet for protectim hed bilong olketa. Taem iumi strongim hope wea iumi garem for Jehovah sevem iumi, datfala hope savve protectim tingting bilong iumi. Strongfala hope bilong iumi mekem iumi no lisin long olketa rabis toktok bilong olketa apostate, wea savve spred kwiktaem long kongregeson olsem wanfala nogud sik. (2 Tim. 2:16-19) Hope bilong iumi bae strongim iumi tu for no duim olketa nogud samting.
WEI FOR READIM BIBLE BAE HELPEM IUMI GOHED FAITHFUL LONG OLKETA LAST DAY
19, 20. Why nao iumi barava tinghae long Bible, and hao nao iumi showimaot datwan? (Lukim box “Jehovah Givim Mi Wanem Mi Needim Long Barava Taem.”)
19 Taem disfala world gogo for finis, iumi mas barava depend long toktok bilong Jehovah insaed long Bible. Datwan savve helpem iumi for lusim olketa nogud wei and for no foldaon long sin. Bible bae comfortim and encouragem iumi for no givap nomata wanem kaen test iumi kasem from Satan and world bilong hem. Olketa instruction long Bible bae helpem iumi for gohed wakabaot long road wea lead go long laef.
20 God laekem tumas for “evri difren kaen man mas sev.” Olketa hia nao pipol bilong hem and evriwan wea willing for lisin taem iumi preachim and teachim gud nius long olketa. Bat evriwan wea laek for sev taem disfala world hem finis mas “garem stretfala savve abaotem olketa tru teaching.” (1 Tim. 2:4) Sapos iumi laek for sev, iumi mas readim Bible and followim wanem hem talem. Wei for readim Bible evriday hem showimaot iumi tinghae long toktok bilong Jehovah.—John 17:17.
a Iumi shud no iusim Bible for trae forcem man for change, or for sei hem wanfala nogud man. Iumi shud followim example bilong Jehovah long wei for patient and kaen long olketa Bible study bilong iumi.—Ps. 103:8.
b Waswe sapos iu savve rememberim samfala word long wanfala scripture, bat iu no remember wea nao hem stap long Bible? Iu savve chekim index wea stap bihaen long Bible, Watchtower Library, or concordance bilong New World Translation.