Iusim Toktok Bilong God wea Laef!

1, 2. Wanem nao Jehovah talem Moses for duim, and wanem nao Jehovah promisim long hem?

TINGIM sapos God chusim iu for story for pipol bilong hem, and hem sendem iu for go story long wanfala ruler wea garem bigfala paoa. Hao nao bae iu feel? Maet bae iu wari, fraet, and tingse iu no fit. Wanem nao bae iu talem long hem? From iu mas talem hem message wea kam from God, wanem nao bae mekem toktok bilong iu garem paoa?

² Datwan nao samting wea Moses, wea “hambol winim evri nara man wea stap long earth,” hem mas duim. (Num. 12:3) Jehovah sendem hem for go story long Pharaoh, man wea praod and no showimaot respect. (Ex. 5:1, 2) Jehovah talem Moses for go talem Pharaoh for letem pipol bilong hem wea slave long Egypt for go free. From Moses feel olsem hem no fit for duim datwan, hem sei long Jehovah: “Mi no fit for go long Pharaoh and tekem aot olketa Israelite from Egypt.” Bat Jehovah promisim Moses olsem: “Mi bae stap witim iu.”—Ex. 3:9-12.

3, 4. (a) Why nao Moses hem fraet for duim wanem Jehovah askem? (b) Wanem kaen feeling nao maet iumi garem wea semsem olsem Moses?

³ Why nao Moses hem fraet for duim wanem Jehovah askem? Hem fraet bikos hem tingse Pharaoh bae no willing for lisin long man wea Jehovah God sendem for story long hem. Nara samting tu, Moses wari nogud olketa Israelite daotem sapos God nao chusim hem for tekem olketa go aot from Egypt. Hem sei long Jehovah: “Waswe sapos olketa no bilivim mi and no herem wanem mi talem? Nogud olketa sei, ‘Jehovah nating kam story olsem long iu nomoa.’”—Ex. 3:15-18; 4:1.

⁴ Maet iumi no kasem assignment for go story long wanfala ruler wea garem bigfala paoa. Bat waswe sapos iu fraet lelebet for story long pipol long territory abaotem Jehovah and Kingdom bilong hem? Iumi savve lanem important samting from wanem Jehovah talem Moses for duim, and from samting wea happen bihaen.

“WANEM NAO IU HOLEM LONG HAND BILONG IU?”

5. Wanem paoa nao Jehovah givim long Moses, and hao nao datwan helpem hem for no fraet? (Lukim piksa long start bilong study.)

⁵ Taem Moses talem Jehovah hem wari nogud pipol no bilivim wanem hem talem, God helpem Moses for redi for duim wanem God laekem. Bible sei: “Jehovah sei olsem long [Moses]: ‘Wanem nao iu holem long hand bilong iu?’ Hem ansa olsem: ‘Wanfala walking stik.’ Hem sei: ‘Torowem long graon.’ So Moses torowem datfala walking stik long graon, and hem change for kamap wanfala snek. And Moses jamp from datfala snek. Then Jehovah sei long Moses: ‘Iu holem datfala snek long tail bilong hem.’ So Moses holem datfala snek and hem change for kamap wanfala walking stik moa. Then God sei: ‘Diswan hem for mekem olketa bilivim Jehovah . . . hem kam story long iu.’” (Ex. 4:2-5) Paoa bilong God nao mekem datfala walking stik wea Moses holem for kamap wanfala snek! Datfala mirakol pruvim God nao sendem Moses, and paoa wea Moses garem hem kam from God. Jehovah sei long hem: “Iu bae tekem disfala walking stik wea iu holem and iusim for duim olketa mirakol.” (Ex. 4:17) From Moses savve iusim datfala walking stik for pruvim paoa wea hem garem hem kam from God, hem no need for fraet for go story long Pharaoh and pipol bilong God tu.—Ex. 4:29-31; 7:8-13.

6. (a) Wanem nao iumi shud holem witim iumi taem iumi go preach, and why nao olsem? (b) Long wanem wei nao “toktok bilong God hem laef,” and long wanem wei nao “hem garem paoa”?

⁶ Wanem nao iumi shud holem witim iumi taem iumi go preach? Iumi holem Bible, and iumi laek for iusim datwan. Samfala pipol tingse Bible hem naesfala buk nomoa. Bat iumi savve Bible hem garem toktok wea kam from God. (2 Pet. 1:21) Hem storyim olketa promis bilong God and olketa samting wea Kingdom bilong hem bae duim. Aposol Paul sei: “Toktok bilong God hem laef and hem garem paoa.” (Readim Hebrew 4:12.) Long wanem wei nao toktok bilong God hem laef? “Toktok bilong God hem laef” bikos evri promis bilong Jehovah hem gohed for kamap tru, and evri samting wea hem talem bae happen. (Isa. 46:10; 55:11) Taem man luksavve evri promis long Bible bae kamap tru, then samting wea hem readim insaed Bible “hem garem paoa” for changem hem.

7. Wanem nao iumi savve duim for “iusim long stretfala wei datfala toktok bilong God”?

⁷ Jehovah givim iumi Bible, wea hem laef. Iumi savve iusim Bible for pruvim wanem iumi talem hem kam from God and man fit for trustim. Dastawe taem Paul trainim Timothy, hem encouragem hem for “iusim long stretfala wei datfala toktok bilong God wea tru.” (2 Tim. 2:15) Wanem nao iumi savve duim for followim datfala kaonsel bilong Paul? Hem nao for readim olketa scripture wea barava fitim taem iumi preach long pipol. Goal bilong iumi hem for kasem heart bilong olketa. Olketa tract wea iumi kasem long 2013 bae helpem iumi for duim datwan.

READIM SCRIPTURE WEA BARAVA FITIM

8. Wanem nao wanfala service overseer talem abaotem olketa tract?

⁸ Wei wea olketa raetem evri niu tract wea iumi kasem hem semsem, so sapos iumi lane hao for iusim wanfala tract, bae iumi savve hao for iusim evri tract hia. Wanfala service overseer long Hawaii, U.S.A., hem sei olsem: “Olketa tract hia barava gud for iusim long haos-tu-haos waka and long pablik witnessing.” Hem sei olketa tract hia isi for iusim bikos long front bilong evri tract hem garem kwestin for askem long haosholder, and tu, hem garem samfala difren ansa for datfala kwestin. Haosholder no need for wari sapos ansa wea hem talem hem stret or nomoa. Datfala brata sei wei wea olketa raetem olketa tract hia hem mekem pipol willing for story, and bikos long datwan olketa pablisa story gud witim staka pipol taem olketa iusim olketa tract hia.

9, 10. (a) Long wanem wei nao olketa tract helpem iumi for iusim Bible? (b) Which tract nao iu barava laek for iusim, and why nao olsem?

⁹ Evri tract hem garem scripture wea barava fitim wea iumi savve readim long haosholder. Olsem example, tingim datfala tract Waswe, Wei for Safa Bae Finis? Iu savve askem haosholder datfala kwestin long kava bilong tract hia. Taem datfala haosholder ansa maet hem sei “yes,” “nomoa,” or “mi no savve.” Nomata wanem ansa nao hem talem, showim page 2 long tract and sei: “Diswan nao samting wea Bible talem.” Then readim Revelation 21:3, 4.

¹⁰ Taem iu iusim datfala tract Wanem Nao Tingting Bilong Iu Abaotem Bible? askem disfala kwestin long haosholder. Nomata which wan long thrifala ansa nao hem chusim, tane go long page 2 and sei: “Bible hem sei ‘evri toktok insaed long olketa Holy Raeting hem kam from God.’” Then iu savve sei tu: “Datfala scripture talem samfala nara interesting samting tu.” Then openem Bible and readim 2 Timothy 3:16, 17.

11, 12. (a) Hao nao iu savve iusim olketa tract long ministry bilong iu? (b) Hao nao olketa tract savve helpem iu for duim olketa return visit?

¹¹ Sapos haosholder hem interest, maet iu savve readim and storyim samfala nara samting insaed tract wea iu iusim. Bat sapos man hia no interest for gohed long story, iu fit for hapi bikos hem herem nao message wea insaed datfala tract, and iu readim finis samfala scripture long hem. Nomata sapos iu readim wan or tufala verse nomoa long firstaem wea iu meetim wanfala man, iu savve duim return visit and gohed long story bilong iutufala.

¹² Long bihaen long evri tract hem garem disfala heding: “Samting for Tingim.” Anda long disfala heding hem garem kwestin and olketa scripture wea iu savve storyim taem iu duim return visit. Olsem example, long datfala tract Hao Nao Iu Ting Long Future? hem garem disfala kwestin: “Hao nao bae God mekem disfala world kamap gud?” Tufala scripture wea iu savve readim hem Matthew 6:9, 10 and Daniel 2:44. Long datfala tract Waswe, Man wea Dae Savve Laef Bak? hem garem disfala kwestin: “Why nao iumi kamap olo and dae?” Tufala scripture wea iu savve readim hem Genesis 3:17-19 and Rome 5:12.

13. Hao nao olketa tract savve helpem iumi for startim olketa Bible study?

¹³ Olketa tract hia savve helpem iumi for startim olketa Bible study. Long bihaen bilong olketa tract hia hem garem QR (quick response) Code.a Sapos man scanim datfala QR Code witim mobile or tablet bilong hem, bae jw.org Web site showaot long screen bilong hem. Bae hem lukim wanfala invitation for studyim Bible. Olketa tract hia story tu abaotem datfala brochure Gud Nius From God! Each tract encouragem man for readim wanfala leson long datfala brochure. Olsem example, datfala tract Hu Nao Kontrolem Disfala World? hem encouragem man for readim leson 5 insaed datfala brochure. Datfala tract Wanem Nao Savve Mekem Famili Hapi? hem encouragem man for readim leson 9. Olketa tract hia savve helpem iumi for readim Bible long haosholder long firstaem wea iumi meetim hem, and taem iumi duim return visit tu. Diswan savve helpem iumi for startim samfala Bible study moa. Wanem nao nara samting wea iumi savve duim for “iusim long stretfala wei datfala toktok bilong God”?

STORYIM SUBJECT WEA MAN INTEREST LONG HEM

14, 15. Wanem nao iumi savve duim for followim example bilong Paul long ministry bilong iumi?

¹⁴ Paul hem laekem tumas for minim tingting bilong pipol wea hem preach long olketa “mekem [hem] savve helpem staka pipol.” (Readim 1 Corinth 9:19-23.) Hem laek for helpem “evri didifren kaen man,” nomata olketa hia Jew or no Jew, for lanem truth mekem olketa savve sev. (Acts 20:21) Wanem nao iumi savve duim for followim example bilong Paul taem iumi prepare for ministry, and taem iumi preach long “evri difren kaen man”?—1 Tim. 2:3, 4.

¹⁵ Evri month Kingdom Ministry Bilong Iumi garem olketa idea wea iumi savve iusim long preaching waka. Hem gud for iusim olketa idea hia. Bat wanem nao bae iu duim sapos pipol long territory interest long difren subject? Redyim story wea olketa bae interest long hem. Wanem samting nao pipol long territory bilong iu wari abaotem? Chusim wanfala scripture wea join witim datfala subject. Wanfala circuit overseer and waef bilong hem storyim wanem tufala duim mekem tufala savve readim Bible long staka pipol. Tufala sei: “Long territory bilong mifala, sapos story bilong mifala hem short nomoa staka haosholder savve letem mifala for readim wanfala scripture. So taem mifala kasem haos, mifala openem Bible long scripture wea mifala laek readim, and bihaen mifala sei hello long haosholder, mifala readim nao datfala scripture.” Long olketa paragraf bihaen, bae iumi storyim samfala subject, kwestin, and olketa scripture wea hem gud for iusim long ministry. Maet iu laek for iusim samfala idea hia long territory bilong iu.

16. Storyim wanfala wei wea iu savve iusim Isaiah 14:7 long ministry.

¹⁶ Sapos iu stap long wanfala area wea staka criminal stap and pipol raf tumas, iu savve sei olsem long haosholder: “Waswe, iu tingse enitaem bae iumi lukim wanfala toktok long front page bilong niuspepa wea sei: ‘Full earth garem peace nao’?” Maet bae hem sei nomoa. Then iu savve sei: “Datwan nao samting wea Bible promisim long Isaiah 14:7,” and readim datfala scripture. Then iu savve sei moa: “Bible storyim staka nara promis bilong God abaotem peace wea klosap for kam long earth.” Then iu savve askem hem sapos hem olraet for iu readim wanfala long olketa promis hia from Bible.

17. Storyim wanfala wei wea iu savve iusim Matthew 5:3 long ministry.

¹⁷ Long territory bilong iu, waswe, hem no isi for olketa man provaedem wanem famili bilong olketa needim? Sapos olsem, maet iu savve askem haosholder olsem: “Waswe, man needim big waka and staka selen for mekem famili bilong hem hapi?” Bihaen hem ansa, iu savve sei: “Staka man garem big waka and staka selen, bat famili bilong olketa no hapi nomoa. So wanem nao savve mekem famili hapi?” Then readim Matthew 5:3 and offerim Bible study long hem.

18. Hao nao iu savve iusim Jeremiah 29:11 for comfortim pipol?

¹⁸ Waswe, pipol long territory bilong iu kasem wanfala disaster no longtaem go nomoa? Iu savve startim story bilong iu olsem: “Mifala kam for storyim wanfala message wea savve comfortim pipol. (Readim Jeremiah 29:11.) Waswe, iu lukim thrifala gud samting wea God laekem iumi for kasem? Hem laekem iumi for garem ‘peace,’ ‘gudfala future,’ and ‘hope.’ Iumi hapi for savve God laekem iumi for kasem gudfala samting long laef. Bat hao nao man fit for kasem diswan?” Then showim hem wanfala leson wea fitim disfala subject insaed long Gud Nius brochure.

19. Hao nao iumi savve iusim Revelation 14:6, 7 taem iumi meetim pipol wea interest for story abaotem religion?

¹⁹ Waswe, staka pipol long territory bilong iu interest for story abaotem religion? Sapos olsem, maet iu savve ask olsem: “Sapos wanfala angel kam story long iu, bae iu lisin long wanem hem talem? (Readim Revelation 14:6, 7.) Angel wea disfala scripture storyim hem talem iumi for ‘fraet long God and worshipim God wea wakem skae and graon.’ Waswe, iu savve long nem bilong God wea wakem skae and graon?” Then readim Psalm 124:8, wea sei: “Iumi kasem help from God wea nem bilong hem Jehovah, wea wakem skae and earth.” Bihaen datwan, iu savve askem hem sapos hem laek for savve long samfala samting moa abaotem Jehovah God.

20. (a) Hao nao iumi savve iusim Proverbs 30:4 for helpem man savve long nem bilong God? (b) Wanem scripture nao iu savve laek for iusim long ministry wea mekem pipol interest?

²⁰ Taem iu story witim wanfala young wan, iu savve sei: “Mi laek readim wanfala scripture long iu wea storyim wanfala barava important kwestin. (Readim Proverbs 30:4.) No eni man savve duim olketa samting wea disfala scripture storyim, so masbi disfala scripture story abaotem Creator bilong iumi.”b Readim moa last kwestin long scripture, then sei: “Hao nao bae iumi savve long nem bilong hem? Mi laek showim iu datfala nem long Bible.”

IUSIM BIBLE LONG MINISTRY

21, 22. (a) Storyim experience wea showimaot hao wei for iusim scripture wea barava fitim savve changem laef bilong samwan. (b) Wanem nao iu barava laek for duim long ministry bilong iu?

²¹ Taem iumi iusim olketa scripture wea barava fitim, datwan savve mekem pipol interest long wanem iumi storyim. Olsem example, tufala Witness long Australia meetim wanfala young woman long haos bilong hem. Wanfala long tufala askem hem olsem: “Waswe, iu savve long nem bilong God?” Then hem readim Psalm 83:18. Datfala woman sei: “Mi barava sapraes for lukim datfala nem! Bihaen tufala go, mi draev for 56 kilometer go long wanfala stoa wea salem olketa buk for chekim olketa nara Bible transleison, and tu, mi lukaotem datfala nem insaed long dictionary. Taem mi barava luksavve nem bilong God nao hem Jehovah, mi start for garem tingting hao masbi staka nara samting tu mi no savve yet.” No longtaem bihaen, woman hia witim man wea hem frenim tufala start for studyim Bible, then tufala marit and bihaen, tufala baptaes.

²² Toktok bilong God hem garem paoa for changem pipol. Taem man readim Bible, datwan savve helpem hem for garem strongfala faith long olketa promis bilong Jehovah. Faith bilong hem bae mekem hem laek for followim wanem hem lanem. (Readim 1 Thessalonica 2:13.) Message wea stap long Bible hem garem bigfala paoa winim eni samting wea iumi talem. So iumi mas traem best for evritaem iusim Bible long ministry bilong iumi, bikos toktok bilong God hem laef!