Iusim Olketa Tract for Talemaot Gud Nius
1. Storyim wei wea pipol bilong God iusim olketa tract.
1 Pipol bilong Jehovah iusim olketa Bible tract for talemaot gud nius for longtaem finis. Long 1880, Charles Russell and olketa nara brata wakem olketa tract wea olketa kolem Bible Students’ Tracts. Olketa wea readim Watch Tower kasem olketa tract hia and givimaot long pablik. Olketa brata tingim olketa tract hem important bikos long 1884 Charles Russell registerim organization bilong iumi and iusim word “tract” insaed legal nem bilong organization. Long datfala taem, legal nem hem Zion’s Watch Tower Tract Society, bat distaem hem Watch Tower Bible and Tract Society of Pennsylvania. Start long 1880 go kasem 1918, olketa Bible Student givimaot winim 300 million tract. Distaem tu olketa tract savve mekem pipol interest long gud nius.
2. Why nao hem gud for iusim olketa tract?
2 Why Hem Gud for Iusim: Olketa tract garem olketa naes piksa wea mekem pipol interest. Short message insaed hem interesting and pipol savve lanem staka samting from datwan. Maet pipol wea no laek for readim magasin or buk interest for readim tract. Hem isi for offerim tract, nomata olketa niu pablisa and olketa pikinini tu. And tract hem smol and isi for karem.
3. Storyim eni experience wea showimaot olketa tract savve helpem man.
3 Staka pipol wea herem gud nius kasem wanfala tract firstaem. Olsem example, wanfala woman long Haiti faendem wanfala tract long road. Bihaen hem readim hem sei: “Diswan nao truth!” Gogo hem go long Kingdom Hall, hem studyim Bible, then hem baptaes. Diswan happen bikos message long Bible wea stap insaed datfala tract hem garem paoa.
4. Sapos hem month for offerim olketa tract, wanem nao goal bilong iumi?
4 Long Haos tu Haos: From olketa tract savve mekem pipol interest long gud nius, iumi bae offerim olketa tract long samfala month. Diswan bae start long November. Goal bilong iumi hem no for givimaot nomoa olketa tract, bat for iusim tract for startim story. Sapos haosholder interest long tract, iumi savve iusim Wanem Bible Teachim buk or nara buk for showim hao for studyim Bible. Iumi savve duim datwan long firstaem iumi meetim hem or long return visit. Hao nao iumi savve offerim olketa tract long haos tu haos? Evri tract hem difren, so iumi need for savve gud long olketa tract wea iumi offerim.
5. Hao nao iumi savve offerim olketa tract long haos tu haos?
5 Iumi shud changem story bilong iumi for fitim territory and tract wea iumi iusim. For startim story, givim tract long haosholder. Piksa long front bilong tract maet mekem hem interest. Or iumi savve showim haosholder tu-thri difren tract mekem hem chusim tract wea hem interest long hem. Sapos title bilong tract hem kwestin, iumi savve askem tingting bilong hem abaotem datwan. Or iumi savve askem nara kwestin wea bae mekem hem interest for story. Then iumi savve readim samfala samting long tract, and sapos eni kwestin stap long paragraf, askem haosholder for talemaot tingting bilong hem. Iumi savve readim olketa main scripture from Bible. Bihaen iumi storyim samfala samting long tract, iumi savve markem taem for duim return visit. Taem no eniwan stap long haos, iumi savve leavim tract long ples wea narawan no savve lukim sapos datwan hem samting wea kongregeson bilong iumi savve duim.
6. Hao nao iumi savve iusim olketa tract long street witnessing?
6 Street Witnessing: Waswe, enitaem iu iusim olketa tract taem iu duim street witnessing? Samfala pipol hariap for go samwea and no savve stop for story witim iumi. So hem no isi for savve sapos olketa interest. Sapos iumi givim niu magasin long olketa iumi no savve sapos olketa bae readim, so hem gud for givim tract long olketa. From tract garem naes piksa and short message, maet pipol interest for readim taem olketa no busy. Bat sapos man no hariap for go samwea, iumi savve storyim samfala point from tract.
7. Storyim eni experience wea showim hao for iusim tract taem iumi duim enitaem witnessing.
7 Enitaem Witnessing: Hem isi for iusim tract taem iumi duim enitaem witnessing. Wanfala brata evritaem putim samfala tract long poket and taem hem meetim eniwan, olsem stoakeeper, hem askem sapos hem laek readim samting and then givim hem wanfala tract. Taem wanfala hasband and waef holiday long New York City long America, tufala luksavve olketa bae meetim pipol from olketa difren kantri. So tufala tekem Good News for People of All Nations buklet and samfala difren tract long olketa difren languis. Taem tufala meetim samwan from difren kantri wea salem samting long saed road or sidaon klosap long tufala long park or long ples for kaikai, tufala offerim tract long languis bilong hem.
8. Long wanem wei nao olketa tract olsem olketa seed?
8 “Plantim Olketa Seed”: Olketa tract hem olsem olketa seed. Farmer torowem staka seed long graon bikos hem no savve which wan nao bae grow. Ecclesiastes 11:6 sei: “Iu mas plantim olketa seed start long morning go kasem evening, bikos iu no savve which wan long olketa nao bae grow. Maet evri seed grow gud, or maet samfala nomoa grow bat olketa narawan no grow.” So olsem farmer wea torowem staka seed, iumi laek givimaot olketa tract wea bae helpem pipol savve long gud nius.—Prov. 15:7.
[Blurb long page 3]
From olketa tract savve mekem pipol interest long gud nius, iumi bae offerim olketa tract long samfala month. Diswan bae start long November.