Niufala Lukluk Bilong Olketa Tract!
1. Wanem samting wea iumi iusim long ministry hem garem niufala lukluk?
1 Long “Toktok Bilong God Hem Tru!” Distrik Convention long 2013, iumi kasem faevfala niu tract. And mek-six tract wea iumi kasem hem Kingdom Nius Namba 38, wea garem title “Waswe, Man wea Dae Savve Laef Bak?” Sixfala tract hia garem niufala lukluk. Why nao lukluk bilong olketa tract hem change? And hao nao iumi savve iusim gud long haos tu haos waka?
2. Why nao olketa tract garem niufala lukluk?
2 Why Nao Olketa Tract Garem Niufala Lukluk?: Plande taem for story gud from haos tu haos, iumi mas duim fofala samting hia: (1) For startim story, askem tingting bilong man abaotem wanfala samting. (2) Readim scripture from Bible. (3) Offerim literature for man readim. (4) Talem wanfala kwestin wea iu bae ansarem taem iu visitim hem moa, and markem taem for go bak. Niufala lukluk bilong olketa tract mekem isi for iumi duim fofala samting hia.
3. Hao nao iumi savve iusim wanfala niu tract long ministry?
3 Hao for Iusim Olketa Tract: (1) Sei hello, then showim haosholder kwestin long front, point go long thrifala ansa long daon, and askem hem which wan nao tingting bilong hem. (2) Openem tract, and storyim toktok anda long title “Bible Hem Sei.” Sapos fitim, readim datfala scripture from Bible. Sapos haosholder garem taem, storyim sekson “Gud Samting wea Iu Savve Kasem From Diswan.” (3) Givim tract long hem and encouragem hem for readim bihaen. (4) Bifor iu lusim hem, showim kwestin long bihaen page bilong tract anda long title “Wanfala Kwestin for Tingim,” and markem taem for go bak and storyim ansa from Bible.
4. Hao nao iumi savve iusim olketa tract long return visit?
4 Hem no hard tu for duim return visit. Iusim olketa scripture wea stap long bihaen page bilong tract for ansarem kwestin wea iu sei iu bae kam bak for storyim. Bifor iu lusim hem moa, showim piksa long tract abaotem Gud Nius brochure, showim datfala brochure long hem and leson wea garem moa information long datfala subject. Then givim brochure long hem and markem taem for kam bak and storyim brochure. Iu startim wanfala Bible study nao! Or maet iu no givim hem brochure bat givim nara tract and markem taem for go bak and storyim datwan witim hem.
5. Long wanem wei nao tract hem gud samting for iusim long ministry?
5 Pipol bilong Jehovah iusim olketa tract long ministry for winim 130 year. Nomata size and lukluk bilong olketa tract hem change insaed olketa year hia, hem gudfala tul for givim witness long pipol. Iumi laek for mekius long niufala lukluk bilong olketa tract hia for gohed helpem pipol evriwea long earth savve long message insaed Bible.—Prov. 15:7a.