ANSA FOR OLKETA BIBLE KWESTIN
Wanem nao bae happen long pipol long future?
From Jesus Dae For Iumi, Hao Nao Datwan Bae Mekem Evri Pipol For Lovem Each Other?
Olketa man gohed for lanem and wakem olketa niu samting saed long science and technology. Bat waswe, olketa savve duim eni samting wea bae mekem evri pipol tingim olketa narawan? Nomoa. Distaem pipol tingim olketa seleva nomoa and olketa greedy tumas. Nomata olsem, God no laekem olketa man for olsem.—Readim 2 Peter 3:13.
Bible hem storyim hao long future pipol evriwea long world bae lovem each other. Olketa bae stap gud and no eniwan bae spoelem olketa.—Readim Micah 4:3, 4.
Wanem nao God duim for finisim wei wea pipol tingim olketa seleva nomoa?
Taem God wakem Adam, Adam no tingim hemseleva nomoa. Bat taem hem chus for no obeyim God, datwan mekem hem no perfect and hem showimaot hem tingim hemseleva. So iumi garem wei for tingim iumiseleva nomoa bikos iumi kam from laen bilong hem. Bat God bae iusim Jesus for mekem olketa man kamap perfect.—Readim Rome 7:21, 24, 25.
Jesus duim wanem God laekem taem hem givim laef bilong hem olsem wanfala sakrifaes and datwan bae finisim nogud samting wea kamaot from wei wea Adam no obey. (Rome 5:19) Datwan minim long future, pipol bae no garem wei for tingim olketa seleva nomoa and for duim olketa samting wea no stret.—Readim Psalm 37:9-11