Hao Nao Iumi Savve Showimaot Iumi Lovem Jehovah?

1, 2. Wanem nao Jehovah duim wea teachim iumi for lovem hem?

TAEM wanfala dadi showimaot gudfala example, datwan savve teachim olketa pikinini bilong hem. Taem hem showimaot hem lovem olketa pikinini, datwan helpem olketa for showimaot love tu. Dadi bilong iumi Jehovah hem nambawan example long wei for showimaot love. So iumi showimaot love “bikos God hem lovem iumi firstaem.”—1 John 4:19.

² Long wanem wei nao Jehovah showimaot hem “lovem iumi firstaem”? Bible sei: “Christ hem dae for iumi taem iumi sin yet, wea diswan showimaot God hem lovem iumi.” (Rome 5:8) Dadi bilong iumi Jehovah, hem givim Son bilong hem for sevem iumi from sin and dae. Datfala nambawan present helpem iumi for fren gud witim Jehovah and for iumi showimaot iumi lovem hem. Jehovah showimaot nambawan example long wei for showimaot love and for tingim olketa narawan.—1 John 4:10.

3, 4. Hao nao iumi savve showimaot iumi lovem God?

³ Love hem main fasin bilong Jehovah. Dastawe Jesus sei: “Iu mas lovem God bilong iu Jehovah long full heart bilong iu, long full soul bilong iu, long full mind bilong iu, and long full strong bilong iu.” (Mark 12:30) Jehovah laekem iumi for lovem hem long “full heart” bilong iumi. Jehovah bae no hapi long iumi sapos iumi lovem samwan or nara samting winim wei wea iumi lovem hem. Bat for lovem Jehovah hem no wanfala feeling nomoa. Hem laekem iumi for lovem hem long “full mind,” and long “full strong” bilong iumi tu. Diswan minim wanem iumi tingim and samting wea iumi duim mas showimaot iumi lovem Jehovah.—Readim Micah 6:8.

⁴ So iumi mas lovem Jehovah witim full heart and evri samting wea iumi garem. Sapos wanem Jehovah laekem nao hem first samting long laef bilong iumi, datwan showimaot iumi barava lovem hem. Long study bifor diswan, iumi storyim fofala samting wea showimaot Jehovah barava lovem olketa pikinini bilong hem. Distaem bae iumi storyim wanem iumi savve duim for strongim love bilong iumi for Jehovah and for showimaot iumi lovem hem.

SHOWIMAOT IU TINGHAE

5. Taem iumi tingim evri gudfala samting wea Jehovah duim for iumi, wanem nao iumi laek for duim?

⁵ Taem samwan givim iu wanfala present, bae iu barava tinghae long hem. And from iu tinghae long datfala present, iu laek for iusim. James sei: “Evri gud and perfect present hem from antap. Hem kam from Dadi bilong olketa laet long skae. Dadi hia hem no olsem wanfala shadow wea savve change.” (Jas. 1:17) Iumi barava tinghae long Jehovah bikos hem givim iumi evri samting wea iumi needim for stap laef and for iumi hapi. Iumi luksavve hem barava lovem iumi, and iumi tu laek for showimaot iumi lovem hem. Waswe, iu laek for showimaot iu lovem hem?

6. Wanem nao olketa Israelite mas duim sapos olketa laekem Jehovah for blessim olketa?

⁶ Jehovah givim staka gudfala samting long olketa Israelite for plande handred year. Hem givim Law for leadim olketa and hem givim evri samting wea olketa needim. (Deut. 4:7, 8) And taem olketa obeyim olketa law hia, datwan showimaot olketa tinghae long Jehovah. Olsem example, taem olketa givim sakrifaes long Jehovah, olketa mas givim best samting wea olketa garem long garden bilong olketa. (Ex. 23:19) Olketa Israelite luksavve sapos olketa obeyim Jehovah and givim best samting wea olketa garem, hem bae blessim olketa.—Readim Deuteronomy 8:7-11.

7. Wanem nao “olketa gudfala samting” wea iumi savve givim for showimaot iumi lovem Jehovah?

⁷ Iumi tu savve showimaot iumi lovem Jehovah taem iumi givim long hem “olketa gudfala samting” wea iumi garem. (Prov. 3:9) Olsem example, iumi savve givim contribution for sapotim Kingdom waka long kongregeson bilong iumi and Kingdom waka evriwea long world. Nomata iumi garem staka samting or lelebet nomoa, iumi evriwan savve givim samting for showimaot iumi lovem Jehovah. (2 Cor. 8:12) Bat iumi savve duim olketa nara samting tu for showimaot iumi lovem Jehovah.

8, 9. (a) Wanem nao nara samting wea iumi savve duim wea showimaot iumi lovem Jehovah? (b) Wanem nao Mike and famili bilong hem duim?

⁸ Jesus teachim iumi Kingdom mas first samting long laef bilong iumi and iumi mas no wari tumas abaotem kaikai and kaleko. Hem sei Dadi bilong iumi hem promis for givim wanem iumi needim. (Matt. 6:31-33) Iumi trustim Jehovah and iumi sure hem bae duim wanem hem talem. Taem iu barava lovem samwan bae iu trustim hem. So taem iumi barava trustim Jehovah, iumi bae duim samting wea showimaot iumi barava lovem hem. (Ps. 143:8) Dastawe hem gud for iumi tingim olketa kwestin hia: ‘Waswe, olketa plan bilong mi and wei wea mi iusim taem and strong bilong mi showimaot mi barava lovem Jehovah? Waswe, mi trustim Jehovah evriday for provaedem wanem mi needim?’

⁹ Mike and famili bilong hem barava trustim Jehovah. Taem Mike hem young hem laekem tumas for go long nara kantri for preach. Nomata bihaen hem marit and garem tufala pikinini, hem still laek for duim datwan. Taem hem and famili readim story abaotem olketa brata and sista wea go long olketa ples wea needim samfala pablisa moa, olketa disaed for mekem laef bilong olketa simpol. So olketa salem haos bilong olketa and go stap long wanfala smol haos. And tu, Mike faendaot hem savve iusim Internet for ranem smol klining bisnis bilong hem nomata hem go stap long nara kantri. Then, Mike and famili bilong hem muv go long nara kantri and olketa barava enjoyim preaching waka. Mike sei: “Wanem Jesus talem long Matthew 6:33, hem barava tru.”

TING RAONEM OLKETA SAMTING WEA JEHOVAH TEACHIM LONG IU

10. Why nao hem gud for ting raonem olketa samting wea iumi lanem abaotem Jehovah olsem King David hem duim?

¹⁰ King David sei: “Skae talemaot glory bilong God, and full skae talemaot waka wea hand bilong hem duim.” Hem sei tu: “Law bilong Jehovah hem perfect and savve mekem man strong moa. Man savve trustim olketa reminder bilong Jehovah, and olketa mekem man wea no garem savve for kamap wise.” Taem David ting raonem olketa law bilong Jehovah and olketa samting wea hem wakem, datwan mekem David for fren gud witim Jehovah and laek for showimaot hem lovem hem. David sei: “Jehovah, iu nao strongfala ples bilong mi for haed and iu nao sevem mi. Mi laekem toktok bilong mi and samting wea stap long heart bilong mi for mas mekem iu hapi.”—Ps. 19:1, 7, 14.

11. Wanem nao iumi savve duim witim savve wea iumi kasem from Jehovah for showimaot iumi lovem hem? (Lukim piksa long start bilong study.)

¹¹ Distaem, Jehovah teachim iumi staka samting abaotem hemseleva, plan bilong hem, olketa samting wea hem wakem, and olketa tru samting insaed long Bible. World bilong Satan encouragem pipol for aftarem hae education for kasem bigfala savve, bat staka taem olketa wea aftarem hae education no fren gud witim God. Jehovah laekem iumi for kasem savve, bat hem helpem iumi tu for kamap wise. Hem laekem iumi for iusim wanem iumi lanem for helpem olketa narawan and for helpem iumiseleva tu. (Prov. 4:5-7) Olsem example, Jehovah laekem iumi for helpem olketa narawan for garem “stretfala savve abaotem olketa tru teaching” mekem datwan savve sevem olketa. (1 Tim. 2:4) Iumi showimaot love for Jehovah taem iumi strong for talemaot gud nius abaotem Kingdom long pipol and helpem olketa for savve long olketa plan bilong God for future.—Readim Psalm 66:16, 17.

12. Wanem nao wanfala young sista talem abaotem present wea hem kasem from Jehovah?

¹² Olketa young wan tu savve ting raonem wanem Jehovah teachim and givim long olketa. Shannon, tingim yet datfala “Godly Devotion” Distrik Convention wea olketa attendim taem hem 11 year and sista bilong hem 10 year. Long wanfala tok long datfala convention, speaker askem evri young wan for go sidaon long wanfala spesol ples. Firstaem Shannon fraet lelebet. Bat hem sapraes taem evri young wan kasem datfala buk Questions Young People Ask—Answers That Work. Taem Shannon kasem datfala naes present, hao nao tingting bilong hem abaotem Jehovah? Hem sei: “Long datfala taem nao mi luksavve Jehovah hem really stap and hem barava lovem mi tumas. Iumi hapi tumas bikos Jehovah, nambawan God bilong iumi, hem givim iumi olketa naesfala samting!”

ACCEPTIM KAONSEL AND WEI WEA JEHOVAH STRETEM IUMI

13, 14. Wanem nao iumi shud duim taem Jehovah stretem iumi, and why nao olsem?

¹³ Bible sei: “Jehovah hem stretem man wea hem lovem, olsem wanfala dadi hem stretem son wea hem lovem.” (Prov. 3:12) Taem iumi acceptim wei wea Jehovah stretem and trainim iumi, datwan helpem iumi for duim stret samting and iumi stap gud. Nomata olsem, “taem samwan stretem iumi datwan savve mekem iumi feel nogud tumas long firstaem.” (Heb. 12:11) Bat wanem nao iumi shud duim taem Jehovah stretem iumi? Iumi shud no ting nating long kaonsel wea Jehovah givim or gohed feel nogud long datfala kaonsel wea iumi kasem. From iumi lovem Jehovah, bae iumi obeyim hem and followim datfala kaonsel.

¹⁴ Long taem bilong Malachi, staka Jew no obeyim Jehovah. Nomata Jehovah no acceptim sakrifaes bilong olketa, olketa no warim nomoa. So Jehovah givim strongfala kaonsel long olketa. (Readim Malachi 1:12, 13.) Staka taem nao Jehovah kaonselem olketa, bat olketa nating followim wanem Jehovah talem. So Jehovah sei: “Mi bae cursim iufala, and mi bae cursim olketa blessing bilong iufala.” (Mal. 2:1, 2) Tru nao, sapos iumi no followim kaonsel wea Jehovah givim or iumi tingse hem no important, datwan savve spoelem wei wea iumi fren witim hem.

15. Wanem kaen tingting nao iumi shud no garem?

¹⁵ World bilong Satan mekhae long wei for praod and for pipol tingim olketa seleva nomoa. Staka no laekem eniwan for stretem olketa or talem olketa wanem for duim. Samfala herem kaonsel bat olketa no willing for followim. Iumi mas no olsem. Bible sei iumi mas no “followim wei bilong pipol long disfala world.” Bat iumi mas luksavve long wanem Jehovah laekem iumi for duim and duim samting wea hem hapi long hem. (Rome 12:2) Jehovah iusim organization bilong hem for givim kaonsel wea iumi needim long barava taem. Olsem example, evritaem iumi kasem reminder long hao for deal witim olketa nara man or woman, hao for chusim olketa gudfala fren, and hao for chusim gudfala hapitaem. Taem iumi acceptim wei wea Jehovah stretem iumi and followim wanem hem talem, datwan showimaot iumi tinghae long wei wea hem leadim iumi and iumi barava lovem hem.—John 14:31; Rome 6:17.

TRUSTIM JEHOVAH FOR HELPEM AND PROTECTIM IU

16, 17. (a) Why nao iumi shud savve long tingting bilong Jehovah firstaem bifor iumi disaedem eni samting? (b) Wanem nao olketa Israelite duim wea showimaot olketa no trustim Jehovah?

¹⁶ Olketa smol pikinini trustim dadi and mami for helpem and protectim olketa. Nomata olketa wea big finis tu savve askem dadi and mami for helpem olketa. Olketa luksavve olketa savve disaedem samting seleva, bat dadi and mami savve givim gudfala advaes long olketa. Dadi bilong iumi Jehovah laekem iumi for disaedem samting seleva. Bat from iumi trustim and lovem hem, iumi evritaem askem hem for helpem iumi, and iumi laek for savve long tingting bilong hem firstaem bifor iumi disaedem eni samting. Sapos iumi depend long Jehovah, hem bae givim iumi holy spirit wea savve helpem iumi for duim stret samting.—Phil. 2:13.

¹⁷ Long taem bilong Samuel, olketa Israelite lus taem olketa faet witim olketa Philistine. Olketa no askem Jehovah for helpem olketa. Bat olketa sei: “Iumi go tekem ark bilong covenant bilong Jehovah long Shiloh, mekem hem stap witim iumi, and hem sevem iumi from olketa enemy bilong iumi.” Bat wanem nao happen? Bible sei 30,000 soldia bilong Israel nao dae long datfala faet. And olketa Philistine tekem datfala ark bilong covenant. (1 Sam. 4:2-4, 10, 11) Olketa Israelite tingse from olketa tekem datfala Ark witim olketa, Jehovah bae helpem olketa and protectim olketa. Bat olketa no askem Jehovah for helpem olketa or for savve long tingting bilong hem firstaem bifor olketa duim samting. Olketa duim wanem olketa tingse hem stret, and olketa kasem barava nogud samting.—Readim Proverbs 14:12.

18. Wanem nao iumi lanem long Bible abaotem wei for trustim Jehovah?

¹⁸ Wanfala man wea raetem psalm wea lovem and barava trustim Jehovah hem sei: “Weit for God, from mi bae praisem hem moa olsem nambawan man for sevem mi. God bilong mi, mi barava wari tumas. Dastawe mi tingim iu.” (Ps. 42:5, 6) Waswe, iu tu garem sem tingting olsem? Waswe, iu fren gud witim Jehovah and trustim hem? Iu savve lane for barava trustim hem. Bible sei: “Trustim Jehovah long full heart bilong iu and no depend long savve bilong iuseleva. Tingim hem long evri samting wea iu duim, and hem nao bae showim iu stretfala wei for iu followim.”—Prov. 3:5, 6.

19. Hao nao iumi savve showimaot iumi lovem Jehovah?

¹⁹ Wei wea Jehovah lovem iumi firstaem, datwan teachim iumi for lovem hem. Hem gud for evritaem tingim staka gud samting wea Jehovah duim for iumi, and wei wea hem barava lovem iumi. And iumi laek for showimaot iumi lovem hem long full heart, full soul, full mind, and full strong bilong iumi.—Mark 12:30.