Spesol Waka for Givimaot Niu Brochure
1 Staka pipol distaem feel nogud long olketa samting wea happen long world, bat samfala nomoa savve long why hem olsem, wanem bae happen long future, and wanem olketa mas duim for stap laef long judgment wea bae kam. (Ezek. 9:4) For helpem olketa luksavve hao taem wea iumi stap insaed distaem hem barava important, wanfala spesol waka for givimaot niu brochure Gohed for Luk Aot! bae start long Monday, January 17, go kasem Sunday, February 13.
2 Iu savve givim brochure taem iu duim haos tu haos, return visit, enitaem witnessing, street and bisnis territory. Bat iumi bae givim brochure hia only long pipol wea barava interest for savve wanem Bible talem abaotem olketa samting wea happen long world. Maet iumi savve givim tract long pipol wea no really interest tumas long disfala message.
3 Maet man interest taem iu sei:
◼ “Staka pipol wari abaotem olketa bigfala problem and olketa barava nogud samting wea gohed for happen distaem. [Storyim wanfala example wea pipol savve abaotem.] Waswe, iu savve tu hao Bible talem finis olketa samting hia bae happen? [Letem hem ansa. Then readim wanfala scripture wea fitim example wea iu storyim, olsem Matthew 24:3, 7, 8; Luke 21:7, 10, 11; or 2 Timothy 3:1-5.] Bible talem stret wanem nao mining bilong taem iumi stap insaed long hem and wanem bae happen long future. Waswe, iu laek savve long samfala samting moa abaotem diswan? [Letem hem ansa. Givim brochure sapos man showimaot hem barava interest.] Man savve tekem disfala brochure wea no garem eni price. Sapos iu laek givim smol donation for disfala waka wea gohed evriwea long world, mifala bae hapi for acceptim.”
4 Or maet disfala idea waka gud:
◼ “Staka pipol distaem wari tumas abaotem olketa nogud samting wea happen long world or from olketa barava nogud samting wea kasem olketa seleva. Samfala ting why nao God no duim eniting for stopem olketa samting olsem for happen. Bible promisim iumi hao klosap nao God bae duim samting for finisim wei for safa. Lukim olketa gud samting wea God bae duim for olketa man. [Readim Psalm 37:10, 11.] Waswe, iu laek savve long samfala samting moa?” Finisim story followim idea wea stap long antap.
5 Raetem nem and address bilong eniwan wea tekem brochure, and markem taem for go bak and mekem grow datfala interest. Olketa idea long hao for duim diswan bae kamap long February 2005 Kingdom Ministry Bilong Iumi. Sapos man showimaot hem barava interest long fasfala kol, iu fit for startim Bible study long datfala taem long wei for iusim Gohed for Luk Aot! or Kasem brochure.
6 Evriwan savve tekem disfala brochure bihaen disfala Service Meeting. Hem gud for olketa pablisa and pioneer tekem nomoa haomas brochure olketa fit for givimaot long olketa fasfala tu-thri day for disfala waka. Jehovah bae blessim disfala spesol waka for hem kasem praise and for pipol wea garem honest heart evriwea savve kasem gud samting from diswan.—Ps. 90:17.