Keepim
Waswe, Iu Offerim Olketa Brochure Hia?
The Bible—What Is Its Message?
Disfala brochure hem for pipol wea no savve long Bible, main wan nao olketa long religion wea no Christian
Hao for offerim: “Mifala laek for savve long tingting bilong iu abaotem wanem disfala holy buk hem talem. [Readim Psalm 37:11, wea section 11 long disfala brochure storyim.] Long tingting bilong iu, earth bae hem hao taem disfala profesi hem kam tru? [Weit for hem ansa.] Diswan hem wanfala long olketa gud samting wea Bible storyim wea savve givim hope and comfortim pipol nomata wanem kaen living and biliv olketa garem.” Readim first paragraf long page 3, and offerim brochure.
Maet iu traem disfala idea: Sapos iu studyim Wanem Bible Teachim buk witim samwan long religion wea no Christian, hem gud for iusim tu-thri minute bifor or bihaen long study for story witim hem long wanfala section long disfala brochure for helpem hem for savve long samfala main samting insaed Bible.
A Book for All People
Disfala brochure hem for pipol wea skul gud and no savve long Bible
Hao for offerim: Readim 2 Timothy 3:16, 17. Then sei olsem: “Waswe, iu tingse Bible hem kam from God, or hem wanfala gud buk nomoa for readim? [Weit for hem ansa.] Staka pipol garem tingting bilong olketa seleva abaotem Bible bat tu-thri pipol nomoa readim Bible. [Readim experience long page 3.] Disfala brochure hem storyim why nao hem gud for pipol lukim wanem Bible talem nomata wanem kaen living and religion nao olketa kam from.”
Maet iu traem disfala idea: Sapos haosholder tekem disfala brochure, iu savve sei olsem: “Wanfala reason why staka pipol ting hem no important for readim Bible hem bikos olketa religion talem laea samting abaotem Bible and olketa teaching insaed. Taem mi kam bak, mi laek for showim iu wanfala example bilong datwan.” Taem iu go bak, storyim information long page 4-5.
Iu Savve Kamap Fren Bilong God!
Disfala brochure hem for olketa wea no savve read gud
Hao for offerim: “Iu tingse iumi olketa man savve fren witim God? [Weit for hem ansa. Then readim James 2:23.] Disfala brochure hem for helpem iumi kamap fren bilong God, olsem Abraham.”
Maet iu traem disfala idea: Maet long first taem wea iu meetim man or taem iu duim return visit, showim long hem hao for duim Bible study taem iufala storyim first paragraf long leson 1 or full leson.
A Satisfying Life—How to Attain It
Disfala brochure hem for olketa wea no garem religion
Hao for offerim: “Mifala visitim pipol for helpem olketa long wanem olketa savve duim for satisfae and hapi long laef. Iumi evriwan kasem olketa problem wea savve mekem iumi no hapi. Taem olsem, maet iumi askem advaes from wanfala gud fren, wantok or iusim Internet for faendem advaes. Iu savve kasem gudfala advaes long wea? [Weit for hem ansa.] Samfala no tingim hao Bible hem garem gudfala advaes. Wanfala example nao diswan. [Showim haosholder chapter 2, and readim wanfala toktok from Bible wea stap long eni paragraf.] Disfala brochure explainim wanem iumi savve duim for satisfae and hapi long laef.”
Maet iu traem disfala idea: Sapos haosholder tekem disfala brochure, iu savve sei olsem: “Samfala pipol sei staka samting wea Bible talem hem no stret. Bat mi laek for kam bak and showim long iu wanfala samting wea Bible talem wea stret witim science.” Taem iu go bak, storyim paragraf 4 long page 12.
The Origin of Life—Five Questions Worth Asking
Disfala brochure hem for olketa young Christian wea go long olketa skul wea teachim evolution. Hem gud tu for iusim taem iumi story witim olketa wea biliv long evolution, olketa wea no sure sapos God hem stap, and olketa wea no biliv God hem stap (No offerim disfala brochure long haos-tu-haos.)
Hao for iusim disfala brochure taem iumi story witim man wea biliv long evolution or man wea no biliv God hem stap: “Klosap evri science buk story abaotem evolution. Waswe, iu tingse evolution hem tru or hem wanfala idea nomoa? [Weit for hem ansa.] Hem gud for lukluk long tufala saed long story mekem iumi fit for savve long stretfala ansa. Disfala brochure storyim olketa pruv wea helpem staka pipol for bilivim hao God nao wakem evri samting.”
Maet iu traem disfala idea: Sapos iu wanfala student, putim brochure hia antap long desk bilong iu for lukim sapos eni classmate bae interest long hem.
Lasting Peace and Happiness—How to Find Them
Disfala brochure hem for olketa Chinese pipol
Hao for offerim: “From laef hem hard tumas distaem datwan savve mekem iumi for no hapi. Wanem nao savve helpem iu for hapi nomata staka problem distaem? [Weit for hem ansa.] Staka pipol luksavve taem olketa followim kaonsel from Bible olketa savve hapi. [Readim Psalm 119:1, 2.] Samfala no interest long Bible bikos olketa sei hem no fitim olketa man long Asia. Lukim diswan. [Storyim paragraf 16 long page 17.] Disfala brochure storyim wanem iumi savve duim mekem iumi hapi and stap gud for olowe.”
Maet iu traem disfala idea: Sapos haosholder tekem brochure, readim thrifala first sentence long paragraf 18 long page 17 and sei: “Taem mi kam bak, mi laek for showim long iu olketa gudfala samting wea bae happen long future wea Bible storyim.” Taem iu go bak, storyim wanfala point wea stap long paragraf 6 long page 30.