March, April, and May—Taem for Duim Moa Waka
1. Long wanem wei nao olketa ‘festival wea kamap evri year’ affectim olketa Israelite wea fraet long God?
1 Long samfala taem insaed year wea olketa markem finis, olketa Israelite bifor celebratem “olketa festival bilong Jehovah wea kamap evri year.” (Lev. 23:2) Wei wea olketa markem taem for ting raonem gudfala fasin bilong God, hem mekem olketa barava hapi and muvim olketa for strong for klin worship.—2 Chron. 30:21–31:2.
2, 3. Why nao hem fitim for iumi duim moa samting saed long spiritual waka long March, April or May, and long wanem day nao bae iumi celebratem Memorial?
2 Long distaem, waka for preach wea mekem iumi hapi hem kamap moa big evri year long March, April and May. Hem taem wea iumi barava ting strong long datfala barava spesol present wea Jehovah givim for iumi—only Son wea hemseleva nao wakem. (John 3:16; 1 Pet. 1:18, 19) Taem iumi ting raonem love wea God and Son bilong hem showim, diswan muvim iumi for praisem Jehovah and barava trae hard for duim will bilong Hem.—2 Cor. 5:14, 15.
3 Long disfala year iumi bae celebratem Evening Kaikai Bilong Lord long Thursday, March 24, bihaen sun go daon. Hao nao iumi savve duim moa samting long ministry long March, April, or May?
4, 5. (a) Wanem nao helpem samfala for preachim gud nius long staka pipol? (b) Wanem nao gudfala wei for duim diswan long territory bilong iu?
4 Preach Long Staka Pipol: Luk aotem olketa wei for preach long staka pipol taem iu share long field service. Waswe, iu savve plan for duim haos tu haos waka long evening taem staka pipol stap long haos? Sapos buk study bilong iu hem long evening, and sapos samfala long buk study grup bilong iu laek for duim field service bifor buk study start, buk study overseer savve arrangem shortfala meeting for field service for waka long wanfala territory wea stap klosap.
5 Nara wei for preach long staka pipol hem for witness long olketa pablik ples. Wanfala sista long Japan laek for auxiliary pioneer nomata hem waka full-taem. Wanfala elder talem idea for sista hia duim street waka klosap long train station bifor hem start waka each day. Fastaem hem faendem hard bikos hem feel shame and from samfala pipol tok strong long hem, bat from hem no givap, hem startim magasin route long samting olsem 40-fala difren wan. Olketa man hia, hem olketa wea travel long train, olketa wea waka long train station, and olketa wea ownim stoa wea stap klosap long train station. Average bilong magasin wea hem givimaot evri month hem 235. Wei wea hem story long pipol abaotem Bible for lelebet taem nomoa each day mekem hem fit for startim sixfala Bible study.
6. Hao nao olketa young wan savve mekem waka for preach kamap moa big?
6 Olketa Chance for Witness: Staka pablisa wea skul garem olketa skul holiday. Taem hia hem gudfala taem for auxiliary pioneer. And tu, olketa young Christian savve mekem waka for preach kamap moa big taem olketa witness long skul. Maet iu sapraes hao olketa classmate laek for savve long biliv bilong iu. Mekius long taem wea class story raonem wanfala subject or taem iu duim skul assignment, for givim witness. Samfala narawan givim witness long wei for showim olketa video bilong organization. Samfala startim Bible study witim olketa classmate and helpem olketa muv ahed for dedicate and baptaes. Olketa wei hia nao olketa nambawan wei for “praisem nem bilong Jehovah.”—Ps. 148:12, 13.
7. (a) Hao nao wanfala brata iusim chance wea hem garem for witness long pipol? (b) Waswe, iu garem eni experience wea semsem witim diswan?
7 Long olketa samting iu duim and ples wea iu go long hem evriday, traem olketa difren wei for startim story witim pipol abaotem nambawan God bilong iumi and abaotem olketa nambawan promis bilong hem. Wanfala brata wea travel long olketa sem train evriday witness long olketa narawan long taem wea fitim. Olsem example, taem hem weit for next train hem witness for faev minute evriday long wanfala young man. From hem duim olsem, datfala young man and nara man wea tufala waka tugeta agree for studyim Bible. Brata hia conductim study long train taem olketa travel. Gogo, wanfala olo woman wea herehere long story bilong olketa askem tu brata hia for studyim Bible witim hem. Hem tu hapi for study long olketa day wea hem gogo long train. Long wei olsem datfala brata study witim tenfala difren man long train.
8. Wanem wei for witness nao savve givim chance for olketa wea olo or sik for duim moa samting long ministry?
8 Waswe sapos iu no fit for duim tumas samting bikos iu olo or sik? Maet samfala wei stap for iu savve duim moa samting for praisem Jehovah. Waswe, iu traem finis enitaem witnessing? Plande information stap long olketa Kingdom Ministry wea savve helpem iu for savve long olketa chance wea iu savve garem for duim datwan.
9. Hao nao iumi savve helpem olketa Bible student for kamap fit for share witim kongregeson long pablik ministry?
9 Wei for attendim Memorial savve encouragem olketa niu wan for laek duim moa samting for praisem Jehovah. Iu savve helpem olketa for winim wei for fraet for share long waka for preach taem iu story abaotem olketa field service experience wea bae encouragem olketa and gohed trainim olketa for explainim olketa teaching long Bible and defendim biliv bilong olketa. (1 Pet. 3:15) Sapos Bible student talem tingting bilong hem for laek preachim gud nius, storyim diswan long presiding overseer. Hem bae arrange for tufala elder meet witim student for faendaot sapos hem fit for share witim kongregeson long pablik ministry. For sure, heart bilong Jehovah bae hapi for lukim olketa niu wan sapotim wei wea Hem nomoa fit for rul!—Prov. 27:11.
10. (a) Hao nao wanfala gud schedule savve helpem iumi for auxiliary pioneer? (b) Waswe, iu auxiliary pioneer last year long March, April or May? Wanem nao helpem iu for duim datwan?
10 Waswe, Iu Savve Auxiliary Pioneer? Iumi mas no ting smol long goal for auxiliary pioneer wea hem nao 50 hour. (Matt. 5:37) Diswan minim insaed wanfala week man mas duim 12 hour long field service. Waswe, eni auxiliary pioneer schedule long page 5 fitim iu? Sapos nomoa, waswe, iu savve mekem wanfala schedule wea bae helpem iu for auxiliary pioneer long March, April, or May? Askem Jehovah for sapotim hard waka bilong iu for mekem ministry bilong iu kamap moa big.—Prov. 16:3.
11. Hao nao olketa elder and ministerial servant savve sapotim olketa wea bae auxiliary pioneer?
11 Olketa elder and ministerial servant bae sapotim evribit hard waka bilong iu for barava praisem Jehovah long March, April or May. Maet staka long olketa elder and ministerial servant bae auxiliary pioneer. For fitim need, olketa elder bae arrangem olketa difren taem for meet for field service, olsem long olketa evening, olketa morning and aftanun long midol week, and long weekend. For disaedem ples and taem for meet and hu nao bae leadim grup, olketa elder bae story witim olketa wea plan finis for pioneer or wea tingting for duim datwan. Olketa elder bae trae hard for mekem arrangement wea olketa nara pablisa waka witim iu long olketa day and taem wea iu markem for field service. Long wei olsem olketa gudfala plan savve kamap and plande gud samting savve kamaot from diswan.—Prov. 20:18.
12. Wanem nao muvim iumi for praisem Jehovah evritaem?
12 Duim Best Bilong Iu: Sapos iu no fit for auxiliary pioneer, tingim hao Jehovah acceptim hard waka and wanem iumi duim ‘wea fitim wanem iumi garem and no fitim wanem iumi no garem.’ (2 Cor. 8:12) Iumi garem staka samting wea iumi thankiu long Jehovah for hem. David garem gudfala reason taem hem raet olsem: “Mi bae blessim Jehovah evritaem; evritaem mouth bilong mi bae praisem hem.” (Ps. 34:1) Iumi barava laek for duim datwan tu long March, April or May.
[Box long page 3]
Hao Nao Iu Savve Mekem Waka for Preach Kamap Moa Big?
◼ Preach taem pipol stap long haos
◼ Witness long olketa pablik ples
◼ Witness long wakples or skul
◼ Duim enitaem witnessing
◼ Auxiliary pioneer