Praisem Jehovah Long Big Kongregeson
1, 2. Iumi garem chance for duim wanem long distrik convention, and long olketa wanem wei nao iumi savve duim diswan?
1 Each year olketa distrik convention givim iumi nambawan chance for givim glory long Jehovah. Iumi garem feeling olsem David, wea sei: “Mi bae praisem iu long big kongregeson, midolwan plande pipol mi bae praisem iu.” (Ps. 35:18) Long “Obeyim God” Distrik Convention for disfala year, hao nao iumi savve mek sure samting iumi duim hem mekem Jehovah kasem praise olsem pipol wea garem wan mind?
2 Wanfala wei hem thru long fasin bilong iumi. Olketa manager long ples wea wanfala convention kamap long hem sei: “From samting wea mifala lukim abaotem olketa convention bilong iufala, mifala talem olketa nara lotu grup wea laek for iusim disfala ples for kam lukim hao Olketa Jehovah’s Witness arrangem wanfala convention, from arrangement bilong iufala hem stret evribit.” Thru long lukluk bilong iumi, wei wea iumi waka tugeta, and fasin bilong iumi, each wan hem tekpart for givim praise long God wea hem nomoa fit for kasem.—1 Pet. 2:12.
3, 4. Hao nao fasin for showimaot respect bae helpem iumi for werem kaleko wea fitim olketa Christian minister long taem iumi stap long assembly hall and long olketa nara taem?
3 Lukluk Bilong Iumi: For werem kaleko and garem lukluk wea givim praise long Jehovah hem needim man for garem fasin wea showimaot respect. (1 Tim. 2:9) Long page 132 long Ministry Skul buk, hem sei: “Man wea garem fasin wea showimaot respect hem no laek mekem nara pipol feel nogud and hem no laek for werem kaleko wea mekem pipol ting strong long hem.” Long staka kantri wei for werem kaleko wea no showimaot respect hem kamap big tumas. Bat Jehovah tinghae long wei wea iumi trae hard for mekem pipol garem stretfala tingting abaotem iumi wea servem hem. (Acts 15:14) Nomata long wanem ples nao convention hem kamap, datfala hipap hem kamap “big kongregeson” bilong iumi for thrifala day bilong convention. So taem iumi hipap front long Jehovah, iumi shud werem kaleko wea fitim Datwan wea hae winim evriwan long universe.—1 Chron. 29:11.
4 Iumi need for tingim tu lukluk and kaleko wea iumi werem bihaen long olketa session evriday. Nomata iumi laek werem kaleko wea fitim taem for relax or go long eni ples, hem important for kaleko and lukluk bilong iumi hem fitim pipol wea “honorim God.” (1 Tim. 2:10) Iumi no followim standard bilong world saed long wanem kaleko nao hem fitim. (1 John 2:16, 17) Olketa Christian pablikeson bilong iumi garem olketa piksa wea showim olketa difren kaen kaleko wea fitim and wea olketa man and woman werem taem olketa worship and long olketa nara taem. For werem badge card long ples bilong convention bae remindim iumi hao iumi olketa Christian minister evritaem.—2 Cor. 6:3, 4.
5, 6. Hao nao iumi savve showimaot iumi respectim spiritual tebol bilong Jehovah?
5 Respectim Spiritual Tebol Bilong Jehovah: Datfala Sovereign Lord bilong universe redim wanfala feast for iumi. (Isa. 25:6; 1 Cor. 10:21) Sapos iumi barava tinghae long privilege wea iumi garem for sidaon long spiritual tebol bilong Jehovah, bae iumi no laek missim eniwan long thrifala day bilong convention hia. Waswe, iu arrangem finis ples for stap, transport, and for askem boss for taem off? Waswe, iu markem inaf taem for redi and travel mekem iu kasem ples bilong convention early for faendem ples for sidaon, kaban witim olketa brata, and for sing tugeta for praisem Jehovah long singsing and prea for startim program?—Ps. 147:1.
6 Wei for showimaot respect for spiritual tebol bilong Jehovah bae muvim iumi for lisin gud long program and no story long narawan, kaikai, or wakabaot nating. Jehovah provaedem spiritual kaikai wea iumi barava needim distaem thru long faithful and wise slave class. (Matt. 24:45) Iumi shud no missim eni part bilong program hia. Parents shud sidaon witim olketa pikinini and helpem olketa for kasem gud samting from disfala program.—Deut. 31:12.
7. Wanem nao iumi shud duim saed long kaikai for lunch, and why nao olsem?
7 Bae hem gud tumas for iumi tekem kaikai bilong iumi for lunch mekem iumi no go luk aotem kaikai long taem for spel. Long samfala convention, olketa reportim hao plande leit for kam bak long assembly hall bihaen spel long midolday, and samfala nating kam bak for aftanun session. Bae hem gud sapos iumi evriwan mek sure iumi sidaon and redi for olketa aftanun session bilong convention disfala year! (Heb. 13:17) Disfala arrangement givim nambawan chance for enjoyim wei for kaban witim olketa brata and hem mekem kamap wan mind and peace wea honorim Jehovah.—Ps. 133:1.
8, 9. Olketa wanem chance nao iumi garem for praisem Jehovah long taem for convention?
8 Enitaem Witnessing: Taem iumi go and kam from ples bilong convention, iumi garem staka chance for iusim mouth bilong iumi for praisem Jehovah. (Heb. 13:15) Nomata wanem nao iumi duim, iumi laek luk aotem eni chance for witness. Mind and heart bilong iumi bae fulap witim olketa nambawan spiritual samting wea iumi herem long convention. Iumi laek storyim olketa samting hia long eniwan wea iumi meetim.—1 Pet. 3:15.
9 Iumi barava luk forward long datfala chance for blessim Jehovah “midolwan long staka pipol wea hipap tugeta.” (Ps. 26:12) Iumi evriwan laek for hipap for praisem Jehovah long “Obeyim God” Distrik Convention.
[Box long page 5]
Olketa Reminder for Distrik Convention
◼ Taem Bilong Program: Long thrifala day hia, program bae start long 9:30 a.m. Tu-thri minute bifor session start, chairman bae sidaon long stage taem Kingdom music hem gohed. Long datfala taem iumi evriwan shud sidaon finis, mekem no eni samting spoelem taem wea program hem start. Program bae finis long 5:05 p.m. long Friday and Saturday, and Sunday hem bae finis long 4:10 p.m.
◼ Markem Ples for Sidaon: Iu savve markem nomoa ples for sidaon for olketa wea kam witim iu long sem trak or iufala stap tugeta long wanfala haos.
◼ Donation: Hem kostim staka selen for arrangem distrik convention. Iumi savve showimaot iumi tinghae long diswan taem iumi willing for givim donation for waka evriwea long world long Kingdom Hall or long taem bilong convention.
◼ Kaikai for Lunch: Plis tekem kam kaikai winim wei for lusim ples bilong convention and go luk aotem kaikai long taem for spel. No tekem kam glass container or alcohol.
◼ Recording: Eni recorder shud no join long electric or saond system. Iu savve iusim olketa samting hia witim battery, bat no disturbim olketa narawan.
◼ Tek Piksa: Sapos iu tek piksa no iusim flash.
◼ Olketa Pager and Mobile Phone: Iusim long wei wea bae no disturbim olketa narawan.
◼ Accident and Emergency: Sapos eniwan needim help saed long medical, plis lukim wanfala attendant wea bae stretawe talem First Aid Department, mekem olketa wea garem savve saed long diswan lukluk long hem and givim help wea fitim.