Gohed for Weit and Hope Long Jehovah
1. Wanem nao theme bilong convention, and why nao diswan hem fitim?
1 Isaiah hem raet olsem: ‘Jehovah hem wanfala God wea judge. Hapi nao evriwan wea gohed for weit and hope long hem.’ (Isa. 30:18b) Plande taem Bible storyim wei wea God judgem and distroem olketa enemy bilong hem and sevem olketa faithful servant bilong hem. Wanem nao diswan teachim olketa worshiper bilong Jehovah distaem? Wanem nao iumi savve duim distaem mekem iumi redy for “bigfala day bilong Jehovah wea fit for mekem man fraet”? (Joel 2:31, 32) Distrik Convention bilong iumi for disfala year wea garem theme, “Salvation Hem Klosap!” bae muvim iumi for ting raonem olketa kwestin hia and for lukluk gud long iumiseleva. Hem bae helpem iumi gohed for weit and hope long Jehovah.
2. Hao nao iumi savve showimaot iumi tinghae long distrik convention bilong iumi?
2 Waswe, iu mekem arrangement finis for attendim evri day bilong convention, mekem iu kasem gud samting from datwan? Olsem example, waswe, iu askem boss bilong iu for taem off for attendim convention? No tingse iu savve askem boss klosap long taem bilong convention and hem bae letem iu for taem off. Prea abaotem diswan. Then, askem boss bilong iu for taem off. (Neh. 2:4, 5) Olsem tu, iumi shud no delay for mekem arrangement saed long transport, ples for stap, and olketa nara samting wea important. Wei for plan gud olsem hem showimaot iumi barava tinghae long spiritual kaikai wea kam from Jehovah. Olketa elder shud luksavve long olketa wea needim help for attendim convention, especially olketa olo long kongregeson.—Gal. 6:10.
3. Olketa wanem fasin nao pipol bilong Jehovah shud showimaot long ples bilong convention?
3 Gudfala Fasin Honorim God: Taem iumi hipap witim plande brata long olketa convention, gudfala fasin bilong iumi savve givim witness long community. Wanem nao diswan minim for iumi? Nomata wanem iumi duim long ples bilong convention, olketa Christian fasin bilong iumi olsem long-safaring, kwaet fasin, fasin for kontrolem seleva, and balance fasin, shud encouragem pipol wea iumi deal witim. (Gal. 5:22, 23; Phil. 4:5) Iumi evriwan shud showimaot kaen love wea “hem no duim fasin wea no fitim, hem no lukaotem samting for hemseleva nomoa, [and] hem no savve kros.” Nomata sapos olketa hard samting hem kamap, hem important for iumi “duim evri samting long wei wea givim glory long God.”—1 Cor. 10:31; 13:5.
4. Hao nao parents savve helpem olketa pikinini bilong olketa for showimaot fasin wea givim praise long Jehovah?
4 Bihaen wanfala convention, manager bilong wanfala hotel hem barava tinghae long fasin and lukluk bilong olketa young wan bilong iumi and hem sei hem bae hapi for “Olketa Jehovah’s Witness stap olowe long hotel bilong hem.” Diswan barava mekem iumi hapi! Hem showimaot hao iufala parents barava trainim and lukaftarem gud olketa pikinini bilong iufala. Bat hem no wise for parents letem olketa pikinini for stap seleva long haos wea iufala stap for convention and no eniwan lukaftarem olketa. Samwan shud evritaem lukaftarem olketa pikinini. (Prov. 29:15) Gudfala fasin bilong olketa pikinini bae givim praise long Jehovah and bae mekem heart bilong hem hapi!—Prov. 27:11.
5. Hao nao iumi savve honorim Jehovah saed long kaleko and lukluk bilong iumi?
5 Kaleko and Lukluk wea Showimaot Respect: Iumi evriwan savve duim samting for givim witness long convention long wei for stap klia long kaen kaleko and lukluk wea stael tumas, ova tumas, no showimaot respect, or wea no fitim. Diswan hem important tu long taem iumi travel go long ples bilong convention and taem iumi go bak, taem iumi help for redyim ples for convention, and taem iumi attendim olketa session. From iumi olketa servant bilong God, first samting wea iumi tingim hem nem bilong Jehovah and hao pipol ting long hem, no samting wea iumiseleva laekem or want for duim. Hem responsibility bilong olketa famili hed for mek sure lukluk bilong famili bilong olketa showimaot respect and stretfala tingting evritaem.—1 Tim. 2:9.
6. Why nao lukluk bilong iumi bihaen olketa session bilong convention shud showimaot respect olsem taem convention gohed?
6 Lukluk bilong iumi mas evritaem showimaot respect, nomata sapos iumi enjoyim hapitaem, or taem iumi go long olketa stoa, and ples for kaikai. Wei for werem convention badge card savve mekem olketa chance kamap for witness long pipol.—2 Cor. 6:3, 4.
7. Hao nao iumi savve help for mekem disfala convention hem samting wea evriwan enjoyim and wea followim order? (Lukim “Olketa Reminder for Distrik Convention.”)
7 Isaiah talem disfala profesi: “Jehovah bae tingim and gohed weitim taem wea hem savve showimaot favor long iufala, and bae showimaot mercy long iufala.” (Isa. 30:18a) Wei for tinghae long mercy and kaeness bilong Jehovah wea iumi no fit for kasem shud muvim iumi for honorim hem thru long fasin and lukluk bilong iumi taem iumi hipap tugeta long olketa convention bilong iumi. Iumi laekem disfala “Salvation Hem Klosap!” Distrik Convention mas givim glory long God bilong iumi and helpem iumi gohed for weit and hope long hem!
[Box on page 6]
Olketa Reminder for Distrik Convention
◼ Taem Bilong Program: Long thrifala day hia, program bae start long 9:30 a.m. Tu-thri minute bifor session start, chairman bae sidaon long stage taem Kingdom music hem gohed. Long datfala taem iumi evriwan shud sidaon, mekem evriwan redy taem program hem start. Program bae finis long 5:15 p.m. long Friday, long 5:05 p.m long Saturday, and long 4:10 p.m long Sunday.
◼ Markem Ples for Sidaon: Iu savve markem nomoa olketa chair for olketa wea kam witim iu long convention or olketa wea iufala stap tugeta long sem haos.
◼ Kaikai for Lunch: Plis tekem kam kaikai winim wei for lusim ples bilong convention and go lukaotem kaikai long taem for spel. No tekem kam glass container or alcohol.
◼ Donation: Hem kostim staka selen for arrangem wanfala distrik convention. Iumi savve showimaot iumi tinghae long diswan taem iumi willing for givim donation for waka evriwea long world long Kingdom Hall bilong iumi or long taem bilong convention.
◼ Accident and Emergency: Sapos eniwan needim help saed long medical, plis lukim wanfala attendant wea bae stretawe talem First Aid, mekem olketa wea garem savve saed long diswan lukluk long hem and givim help wea fitim.
◼ Recording: No eni recorder shud join long saond system or electric. Iu savve iusim olketa samting witim battery, bat no disturbim olketa narawan.
◼ Tek Piksa: Sapos iu tek piksa, plis no iusim flash.