Distrik Convention—Wanfala Taem for Hapi for Worship
1. Long wanem wei nao olketa festival bilong olketa Israelite hem semsem long olketa distrik convention bilong iumi?
1 Joseph, Mary, olketa pikinini bilong tufala, and olketa narawan evritaem savve go attendim olketa festival long Jerusalem evri year. Long olketa hipap hia, Mary and Joseph and olketa narawan wea worshipim Jehovah tu, leavim olketa samting wea olketa savve duim evriday, and tingim nomoa olketa spiritual samting. Olketa festival hia, mekem olketa for ting raonem and story abaotem olketa gudfala wei bilong Jehovah and olketa Law bilong hem. Iumi tu savve enjoyim taem for worshipim Jehovah long distrik convention bilong iumi wea bae kamap.
2. Wanem nao iumi shud duim for redi for distrik convention wea bae kamap?
2 Need for Prepare: From Nazareth go kasem Jerusalem, famili bilong Jesus mas wakabaot for samting olsem 200 kilometer for go and kam. Nomata iumi no savve haomas brata and sista nao Jesus garem, iumi savve tingim big waka wea Joseph and Mary mas duim. Waswe, iu plan finis and redi gud for attendim thrifala day long distrik convention wea bae kamap? Diswan minim for askem day-off from waka or story witim teacher bilong pikinini bilong iu hao hem bae no skul long olketa day hia for attendim convention. Waswe, iu arrangem finis ples for stap? Waswe, iu trae for helpem samwan long kongregeson wea garem spesol need for attendim convention?—1 John 3:17, 18.
3. Hao nao festival bilong olketa Israelite mekem chance kamap for associate and encouragem narawan?
3 Taem for Encouragem Narawan: Long festival bilong olketa Jew, hem chance for olketa associate and encouragem evriwan! Famili bilong Jesus barava luk forward for associate witim olketa fren bilong olketa wea olketa no lukim for lelebet longtaem. Olketa enjoyim tu chance for garem olketa niu fren midolwan long olketa Jew and olketa wea followim Jew wea stap long Jerusalem or olketa wea go and kam.
4. Wanem nao iumi savve duim for showimaot iumi wan mind witim olketa Christian brata and sista?
4 Wei for iumi savve encouragem narawan hem wanfala reason why wakaman wea faithful and wise arrangem for iumi kam tugeta for herem olketa tok long olketa convention, and no long olketa magasin. (Heb. 10:24, 25) Dastawe, hem gud for mekem plan for kam early long thrifala day long convention, for enjoyim association witim olketa narawan bifor chairman talem music bae start and for evriwan kam sidaon. Iumi shud tekem kam lelebet kaikai for lunch mekem iumi savve stap long ples bilong convention and story witim olketa narawan. Wei wea iumi wan mind witim olketa Christian brata and sista hem wanfala present from Jehovah wea iumi shud tinghae long hem.—Mic. 2:12.
5. Wanem nao bae helpem iumi for barava kasem gud samting from program?
5 Taem for Lane: Start long taem Jesus hem young, hem kasem gud samting for lane abaotem Dadi bilong hem long heven from olketa festival hia. (Luke 2:41-49) Wanem nao bae helpem iumi and famili bilong iumi for barava kasem gud samting from olketa tok wea bae kamap? Taem program gohed, sidaon kwaet and lisin gud. No onem mobile phone or olketa nara samting olsem for disturbim iu or olketa narawan. Luk long brata wea givim tok and raetem olketa shortfala note. Hem gud for famili sidaon tugeta for mek sure olketa pikinini tu lisin. Long evening, markem taem for story raonem olketa point wea iufala enjoyim.
6. Wanem nao iumi shud evritaem tingim abaotem kaleko and lukluk bilong iumi?
6 Kaleko and Lukluk: Olketa bisnisman from olketa nara kantri wea followim sem road, luksavve long famili bilong Jesus and olketa nara Jew wea go and kam long festival, bikos long kaleko and blue string wea stap raonem botom long kaleko bilong olketa. (Num. 15:37-41) Nomata olketa Christian distaem no werem spesol kaleko, pipol savve long iumi from kaleko wea iumi werem showimaot respect and iumi luk klin. Iumi shud mek sure lukluk bilong iumi hem fitim taem iumi go and kam long convention, and taem iumi stap long ples wea convention kamap. Nomata sapos iumi laek werem difren kaleko bihaen long program, lukluk bilong iumi mas showimaot respect and werem convention badge. Long wei olsem, iumi bae luk difren from olketa wea no Witness and mekem olketa for tinghae long iumi.
7. Why nao hem gud for iumi volunteer for duim waka long convention?
7 Olketa Volunteer: Olketa needim staka volunteer for mekem convention gohed gud. Waswe, iu savve sapotim? (Ps. 110:3) Waka wea iumi duim long convention hem part long holy service wea iumi duim and hem givim gudfala witness. Manager bilong wanfala ples wea olketa holem convention long hem barava sapraes for lukim olketa volunteer klinim datfala building and hem sei: “Mi laek thankiu long iufala for nambawan hipap wea firstaem bilong mi for lukim. Mi herem evritaem pipol storyim hao Olketa Jehovah’s Witness spesol, bikos evritaem olketa klinim gud disfala ples bihaen olketa lusim. Iufala and organization bilong iufala mekem disfala ples hem gud for community and iufala kaen tumas, and hem lelebet hard for faendem kaen pipol olsem.”
8. Wanem chance for witness nao kamap long ples bilong convention?
8 Chance for Witness: Staka long ples wea convention kamap bae lukim iumi werem gud kaleko, gudfala lukluk, and werem convention badge. Datwan bae mekem olketa laek savve moa abaotem iumi, wea givim chance for iumi story abaotem convention. Wanfala boy wea foa year tekem long restaurent wanfala buk wea just release long convention and showim long waitress. Diswan givim chance for dadi and mami bilong hem for invaetem datfala woman long convention.
9. Wanem nao iumi savve duim for tinghae long olketa spiritual samting wea Jehovah givim olsem famili bilong Jesus?
9 Olketa Jew bifor wea laek for savve moa abaotem Jehovah luk forward long olketa festival bilong olketa. (Deut. 16:15) Famili bilong Jesus hapi for leavim samfala samting mekem olketa attendim olketa festival and kasem olketa gud samting. Iumi tu tinghae long olketa distrik convention bilong iumi, and iumi tingim datwan hem present from Dadi bilong iumi long heven wea kaen tumas. (Jas. 1:17) Iumi tu mas redi distaem for enjoyim nambawan taem for worshipim Jehovah!