Famili Schedule—Famili Study
1 Barava nambawan present wea wanfala Christian dadi and mami savve givim long olketa pikinini nao hem love for Jehovah wea olketa tu garem. Wanfala important taem for iu savve duim diswan hem “taem iu sidaon long haos” for duim famili Bible study wea kamap evri week. (Deut. 6:5-7) Nomata sapos iutufala Witness or wanfala long iutufala garem difren lotu, or iu singol dadi or mami, iu savve helpem olketa pikinini for fren gud witim iu and Jehovah long wei for duim famili study evritaem.
2 Startim Famili Study: Fasfala samting for duim hem for mekem hem wei bilong iufala for duim famili study tugeta. Sapos iu no sure long wanem taem for duim famili study, storyim diswan witim famili. (Prov. 15:22) Sapos iu garem olketa smol pikinini, maet hem gud for no mekem study hem long tumas, bat for duim winim wanfala taem insaed week. Disaedem wanem schedule nao bae fitim famili. Markem taem for disfala study long famili schedule, and disaed strong for followim evribit.
3 Wanem nao bae iufala studyim? Samfala savve prepare for Kongregeson Buk Study or Wastaoa Study. Samfala studyim information wea fitim young pipol. Wanfala dadi wea garem young son and dota sei: “Wanfala samting olketa pikinini laek tumas for duim evri week hem nao for actim story wea insaed Bible Story Buk Bilong Mi. Wei wea diswan muvim olketa pikinini and olketa minim hem barava moa important winim wei for trae studyim staka paragraf.”
4 Study Evri Week: Iumi shud no miss for duim famili study and hem shud samting evriwan long famili luk forward for duim. Sapos eni samting wea man no expectim hem kamap, iu savve changem diswan go long nara day and taem. Samfala taem maet iu need tu for changem wanem for storyim. Bat eni change wea kamap shud no barava changem famili study schedule wea set finis. Wanfala dadi savve raetem niu taem for study long wanfala pis pepa and putim long ples wea evriwan long famili savve lukim. Kaen wei olsem for mek sure famili study gohed evritaem, hem nambawan! Taem iu gohed for trainim olketa pikinini “long discipline and wei for stretem tingting wea kam from Jehovah,” iu showimaot iu lovem olketa pikinini bilong iu and Dadi bilong iumi long heven.—Eph. 6:4.