Samfala Idea wea Savve Helpem Iu for Duim Study Evritaem
HAO, iu faendem hem no isi for duim personal study evritaem and for enjoyim datwan? Maet iumi evriwan savve feel olsem. Bat tingim olketa samting wea iumi savve duim evriday, for example wei for swim. For man swim, hem need for duim samting and hem savve tek taem, bat afta, bae hem feel fresh! Bible comparem wei for study witim wata, hem sei: “Wata wea [man] iusim for mekem hem klin nao hem toktok bilong God.” (Eph. 5:26) Bae iumi storyim samfala idea wea savve help.
Mekem schedule. Personal Bible study hem wanfala lo “olketa samting wea barava important” wea wanfala Christian shud no ting smol lo hem. (Phil. 1:10) For helpem iu followim schedule, hem gud for putim datfala schedule lo ples wea isi for iu lukim, olsem lo notice board or lo door blo fridge. Or maet hem gud for setem alarm lo phone for remindim iu bifor taem blo iu for study.
Change fitim situation blo iu. Hao, iu samwan wea savve concentrate for study for longtaem or for short taem? Iuseleva luksavve wat hem best for iu. Changem hao iu study for fitim situation blo iu. If hem kasem taem for study bat iu no feel laek for duim, hao sapos iu disaed for study just for ten minutes? Nomata iu study for short taem nomoa, iu bae kasem staka gud samting. And taem iu start for study, maet bae iu feel laek for continue for duim datwan.—Phil. 2:13.
Bifor iu start, chusim topic. Taem iu sidaon for study and then just lukaotem wat for studyim, maet iu bae no “iusim gud taem” blo iu. (Eph. 5:16) Hao if iu raetem olketa article or topic wea iu laek for study abaotem and keepim datwan? Taem iu tingim wanfala kwestin, raetem daon datwan. And lo end blo each study session, addim go moa samfala idea lo list blo iu for studyim.
Mas flexible. Trae for flexible witim schedule blo iu, maet lo hao iu markem taem for study or wat kaen topic for chusim. No wari tumas abaotem wat taem, hao long, or wat nao for studyim, bat important samting hem for duim personal study evritaem.
Iumi savve kasem staka gud samting taem iumi garem gudfala schedule for study evritaem. Hem mekem iumi for fren klos witim Jehovah, iumi lane for duim samting wea wise, and hem bae encouragem and strongim iumi.—Josh. 1:8.