Mekem Interest Grow Witim Magasin Route
1. Hao nao iumi savve iusim magasin route for mekem grow interest bilong pipol?
1 Staka pipol iumi meetim long ministry hapi for iumi visitim olketa and hapi for acceptim literature bat olketa hol bak for studyim Bible. Wanfala wei for mekem interest bilong olketa grow hem for duim magasin route. Taem man tekem magasin, raetem nem and address, date iu visit, which magasin hem tekem, scripture iufala storyim, and eni samting wea iu lukim man hia interest long hem. Taem iu kasem olketa niu magasin luk aotem point wea olketa long magasin route bae interest long hem and storyim diswan taem iu visitim olketa. (1 Cor. 9:19-23) Gogo, samting olketa readim maet mekem olketa barava interest and laek for savve long samfala nara samting moa.
2. Why nao hem important for pipol luk aotem Jehovah distaem, and wanem nao eni nara samting iumi savve duim for helpem olketa?
2 Bat, iumi luksavve hao staka pipol bae no kamap servant bilong Jehovah sapos olketa readim nomoa olketa magasin. From hem barava important for pipol luk aotem Jehovah distaem, wanem nao eni nara samting iumi savve duim for helpem olketa? (Zeph. 2:2, 3; Rev. 14:6, 7) Iumi savve mekem interest bilong olketa grow taem iumi chusim scripture wea fitim long each taem iumi go for givim olketa magasin.
3. (a) Hao nao iumi savve redim olketa scripture wea iumi savve storyim wanfala long olketa each taem iumi visitim man? (b) Wanem subject nao pipol long territory bilong iu interest tumas for story abaotem?
3 Story Raonem Wanfala Scripture: Tingim need bilong each wan long magasin route bilong iu. Redim olketa scripture wea iu laek for story raonem witim each wan, and sharem wanfala long olketa scripture hia each taem iu visitim olketa. (Phil. 2:4) Olsem example, sapos man iu visitim sorre from samwan wea hem lovem hem dae, maet iu duim samfala return visit long hem for storyim wanem Bible talem abaotem pipol wea dae and hope for resurrection. Iu savve iusim information long Reasoning buk anda long heding “Death” and “Resurrection” for redim wanfala scripture for storyim. Maet long olketa nara taem wea bae iu visit moa iufala savve storyim hao sik, wei for olo and dae bae finis evribit. Goal hem for faendem subject wea datfala man interest long hem and isisi showim hem wanem Bible talem abaotem datwan.
4. Why nao hem important for helpem pipol minim samting iumi readim from Bible, and hao nao iumi savve duim datwan?
4 Helpem Olketa for Minim: Nomata hem gud for story long simpol wei and for no story for longtaem, iu need for duim nara samting moa winim wei for readim nomoa scripture wea iu chusim. Satan satem mind bilong pipol from gud nius. (2 Cor. 4:3, 4) Nomata olketa wea savve long Bible needim help for minim. (Acts 8:30, 31) Dastawe, iusim lelebet taem for explainim and givim example abaotem datfala scripture, long sem wei wea iu duim tok long Theocratic Ministry Skul. (Acts 17:3) Mek sure olketa wea iumi visitim luksavve hao samting Bible talem savve barava helpem olketa.
5. Hao nao wanfala magasin route savve kamap wanfala Bible study?
5 Sapos man iumi visitim hem hapi long samting hem lanem, gogo maet iumi savve storyim tu-thri scripture witim hem each taem iumi visit. Luk aotem eni chance for showim hem Kasem brochure or Savvy buk. Long wei olsem gogo wanfala magasin route bae kamap wanfala Bible study.