Kamap Gud Long Ministry—Garem Olketa Magasin Route

Why Hem Important: Staka pipol wea interest for readim olketa magasin bilong iumi no laek for studyim Bible witim iumi. Maet olketa no laek for changem religion bilong olketa, or maet olketa tingse olketa no garem taem for study. Bat taem olketa evritaem readim olketa magasin maet gogo olketa barava tinghae long Bible. (1 Pet. 2:2) Maet olketa readim samting wea kasem heart bilong olketa, or maet samting happen long olketa wea changem tingting bilong olketa. Sapos iumi evritaem go bak long olketa and story for lelebet taem, iumi bae isisi savve long tingting bilong olketa abaotem olketa samting and start for fren witim olketa. Gogo, iumi savve startim Bible study.

Wanem for Duim:

Evri month go givim olketa niu Wastaoa and Awake! magasin long man wea interest. Iu savve go long nara taem for storyim wanfala article insaed long magasin wea iu givim long hem or offerim pablikeson wea iumi iusim long datfala month. Evritaem iu go bak long hem, raetem wanem iu duim.—Lukim January 2014 Kingdom Ministry Bilong Iumi, p. 3.
Prepare gud firstaem. No givim olketa magasin nomoa long magasin route, bat story witim hem and start for fren witim hem mekem hem interest long truth.
Lukaotem chance for startim study. Sapos magasin route laek for savve wanem Bible talem abaotem wanfala subject, givim hem pablikeson for studyim Bible and iusim datwan for storyim subject hia. Bifor iu lusim hem, askem nara kwestin wea join witim datfala subject for iutufala storyim long narataem. Nomata story hem short nomoa, sapos evritaem iutufala iusim Bible or pablikeson for storyim wanfala subject, datwan hem wanfala Bible study. Waswe, iu offerim Gud Nius brochure and showim hem hao for duim Bible study? Waswe, iu showim hem olketa video hia, Why Nao Hem Gud for Studyim Bible? and Hao Nao Mifala Conductim Wanfala Bible Study? Nomata firstaem hem no laek for study, maet samting hem change. Iu savve askem hem moa sapos hem laek for study.

Samting for Duim Disfala Month:

Raetem list long olketa wea interest for tekem olketa magasin evritaem. Givim olketa magasin for datfala month and talem olketa taem niu magasin kam bae iu givim long olketa.