Iumi Savve Startim Bible Study Witim Olketa Magasin Route
1. For longtaem finis, why nao organization bilong Jehovah encouragem olketa pablisa for garem magasin route?
1 Staka pipol no interest for iumi studyim Bible witim olketa, bat olketa laek for readim olketa magasin bilong iumi. So for longtaem finis organization bilong Jehovah encouragem olketa pablisa for garem magasin route. Staka taem from pipol evritaem readim olketa magasin bilong iumi, datwan savve mekem olketa for barava laekem toktok bilong God. (1 Pet. 2:2) Gogo maet olketa readim samting wea mekem olketa laek for studyim Bible.
2. Wanem nao iumi savve duim for mekem olketa magasin route bilong iumi for interest?
2 “Watarem” Olketa Seed Bilong Truth: Winim wei for go givim olketa magasin nomoa, hem gud for story witim haosholder and trae for savve long hem. Diswan bae helpem iu for savve long living bilong hem, samting wea hem interest long hem, and wanem hem bilivim, and datwan bae helpem iu for luksavve long wanem for storyim. (Prov. 16:23) Iumi mas prepare firstaem. Sapos hem fitim, storyim lelebet wanfala point and scripture wea stap long olketa magasin. Taem iumi duim olsem, iumi watarem olketa seed bilong truth wea stap long heart bilong hem. (1 Cor. 3:6) Evritaem iu go visitim hem, hem gud for raetem date, buk wea iu givim, and subject and scripture wea iu storyim long hem.
3. Wanem taem nao iumi savve go bak long olketa magasin route bilong iumi?
3 Wanem Taem Nao Iu Savve Go Bak? Iu shud go bak wan taem long month for givim olketa niu magasin long olketa magasin route bilong iu. Nomata olsem, sapos hem fitim iu and haosholder hem interest, iu savve visitim hem tu-thri taem long month. Olsem example, wan or tufala week bihaen iu givim olketa magasin long hem, maet iu savve kam bak and sei, “Mi kam for lelebet taem nomoa for showim iu wanfala point long magasin wea mi givim long iu last taem.” Diswan bae mekem hem laek for readim datfala article. Sapos hem readim finis, iu savve askem hem wanem nao tingting bilong hem abaotem datfala article and iu savve storyim lelebet witim hem. Or sapos hem laekem tumas for readim olketa magasin bilong iumi, maet iu savve go bak and offerim hem wanfala tract, brochure, or buk wea iumi givimaot long datfala month.
4. Wanem nao iumi savve duim samfala taem for luksavve sapos olketa magasin route bilong iumi maet willing for studyim Bible?
4 No weitim haosholder for askem iu for studyim Bible witim hem, bat hem gud for iu nao savve askem hem. Maet iu askem hem for study bifor bat hem no laekem. Nomata olsem, iu savve showim olketa article wea garem title “Ansa for Olketa Bible Kwestin” long olketa Wastaoa magasin and lukim sapos hem willing for storyim datwan witim iu. Bat sapos iu no startim study, iu savve gohed for tekem olketa niu magasin for hem.