Disfala Niu Wei for Duim Pablik Witnessing Helpem Staka Pipol
1. Wanem nao olketa kongregeson wea garem samfala ples long territory bilong olketa wea staka pipol savve wakabaot long hem duim distaem?
1 Distaem staka kongregeson wea garem samfala ples long territory bilong olketa wea staka pipol savve wakabaot long hem iusim olketa tebol or trolley for duim pablik witnessing. Sapos olketa iusim trolley, wan or tufala pablisa nao shud standap or sidaon saed long datwan. Bat sapos olketa iusim wanfala tebol, tufala pablisa nao mas lukaftarem datwan. Olketa wea lukaftarem trolley or tebol mas kaen long pipol, smile, and story gud witim olketa. Sapos wanfala man hem kam for lukluk long olketa buk, maet wanfala pablisa savve story olsem long hem, “Waswe, iu laek savve wanem nao Bible talem abaotem disfala subject?” Wan or tufala nara pablisa savve duim enitaem witnessing klosap long datfala ples.
2. Storyim wanfala experience wea showimaot disfala pablik witnessing savve helpem pipol.
2 Disfala wei for duim pablik witnessing mekem staka pipol interest for studyim Bible. Wanfala student long university disaed for duim assignment bilong hem abaotem Olketa Jehovah’s Witness, bat hem no savve wea nao hem bae meetim olketa mekem hem savve storyim witim olketa. Long week bihaen hem lukim Olketa Jehovah’s Witness duim disfala pablik witnessing long university bilong hem. From datwan hem start for studyim Bible, gogo hem baptaes, and distaem hem tu duim disfala pablik witnessing.
3. Wanem nao tingting bilong samfala pablisa abaotem disfala wei for duim pablik witnessing?
3 Wanfala sista wea duim disfala pablik witnessing hem sei: “Samfala kam long tebol for tekem olketa niu magasin. Samfala narawan wea kam no savve eni samting abaotem Olketa Jehovah’s Witness. Diskaen wei for preach hem barava gudfala wei for helpem staka pipol for savve long Jehovah.” Nara sista hem sei, “Hem gudfala wei for preach long pipol bikos olketa nao kam long iumi, nomata tu olketa wea no laek for story witim iumi taem iumi preach.”
4. Why nao hem gud for duim pablik witnessing long sem taem and ples evri week?
4 Hem gud for duim pablik witnessing evri week long sem ples, and long olketa sem day and taem. Wei for duim olsem bae helpem pipol getius for lukim datwan and gogo olketa bae no fraet for kam and askem kwestin or for tekem olketa pablikeson. Waswe, kongregeson bilong iu duim pablik witnessing? Sapos olsem, maet iu laek for traem disfala gudfala waka for “talem pipol long evri ples abaotem Kingdom bilong God.”—Luke 9:60.