Hao for Startim Study Long Wanem Bible Teachim Buk
Plande long iumi bae hapi tumas for conductim Bible study, bat problem nao hem for startim wanfala study. Disfala niu buk Wanem Nao Really Samting wea Bible Teachim? savve helpem iumi for duim datwan. Introduction long page 3-7 hem for helpem iumi for storyim Bible witim haosholder. Olketa pablisa wea garem lelebet savve long ministry tu bae lukim hao hem isi nomoa for iusim disfala buk for startim olketa study.
◼ Maet iu savve traem disfala idea taem iu iusim page 3:
Bihaen iu storyim nius or problem wea pipol long territory bilong iu savve abaotem, openem buk long page 3 and readim olketa kwestin wea stap long raeting wea moa blak, and invaetem haosholder for givim koment. Then openem buk long page 4-5.
◼ Or maet iu laek for storyim samting long page 4-5:
Iu savve sei, “Bae hem gud tumas sapos olketa samting long piksa hia hem really happen!” Or maet iu askem hem, “Which wan long olketa promis hia nao iu laekem hem for happen?” Lisin gud long ansa bilong hem.
Sapos haosholder showimaot hem barava interest long wanfala scripture, showim hem samting wea Bible teachim abaotem datfala subject long olketa paragraf insaed buk wea storyim datfala scripture. (Lukim box long disfala page bilong insert.) Storyim datfala information long sem wei wea iu conductim Bible study. Iu savve duim diswan insaed samting olsem faev or ten minute long firstaem wea iu meetim haosholder.
◼ Nara idea hem for iusim page 6 and askem haosholder for talemaot tingting bilong hem:
Showim long haosholder olketa kwestin wea stap long botom bilong page, and askem hem, “Waswe, enitaem iu ting raonem olketa kwestin hia?” Sapos hem showimaot interest long wanfala kwestin hia, openem buk long olketa paragraf wea ansarem datfala kwestin. (Lukim box long disfala page bilong insert.) Taem iu storyim information tugeta, iu conductim nao wanfala Bible study.
◼ Maet iu savve iusim page 7 for showim long haosholder hao for duim Bible study:
Readim first thrifala sentence long datfala page, and then openem buk long chapter 3 and iusim paragraf 1-3 for showim hao for duim study. Markem taem for go bak for storyim ansa for olketa kwestin long paragraf 3.
◼ Hao for markem taem for go bak:
Taem iu finisim datfala first study, markem taem for go bak for story moa. Maet iu sei olsem: “Insaed tu-thri minute nomoa, iumi lanem samting wea Bible teachim abaotem wanfala important subject. Next taem, iumi savve storyim [talem kwestin wea iu bae storyim]. Waswe, mi savve kam long semtaem next week?”
Nomata day bilong Jehovah hem klosap for kam, Jehovah gohed for trainim iumi for duim disfala waka. (Matt. 28:19, 20; 2 Tim. 3:17) Iumi laek for iusim gud disfala nambawan niu tul for startim olketa Bible study.
[Box long page 3]
Storyim Moa Olketa Scripture Long Page 4-5
◻ Revelation 21:4 (pp. 27-8, par. 1-3)
◻ Isaiah 33:24; 35:5, 6 (p. 36, par. 22)
◻ John 5:28, 29 (pp. 72-3, par. 17-19)
◻ Psalm 72:16 (p. 34, par. 19)
Ansa for Olketa Kwestin Long Page 6
◻ Why nao iumi safa? (pp. 108-9, par. 6-8)
◻ Hao nao iumi savve deal witim olketa wari long laef? (pp. 184-5, par. 1-3)
◻ Wanem nao iumi savve duim for mekem famili moa hapi? (p. 143, par. 20)
◻ Wanem nao happen long iumi taem iumi dae? (pp. 58-9, par. 5-6)
◻ Waswe, bae iumi lukim moa olketa famili member and fren wea dae finis? (pp. 72-3, par. 17-19)
◻ Hao nao iumi savve sure God bae duim samting wea hem promisim for future? (p. 25, par. 17)