Kamap Gud Long Ministry—Offerim Wanem Bible Teachim Buk

Why Hem Important: Disfala Wanem Bible Teachim buk hem main buk wea iumi iusim for studyim Bible witim pipol. Bat bifor iumi savve iusim datfala buk for study witim samwan, iumi mas offerim firstaem long hem. So iumi evriwan mas savve hao for offerim Wanem Bible Teachim buk long ministry. (Prov. 22:29) Staka difren wei for offerim datfala buk hem stap, and olketa pablisa savve iusim eni idea wea hem isi for olketa.

Wanem for Duim:

Askem kwestin wea bae mekem haosholder interest, and then showim hem wanfala chapter insaed long buk wea ansarem datfala kwestin. Or iu savve iusim eni kwestin wea stap long start bilong wanfala chapter. Bihaen iu herem tingting bilong haosholder, readim wanfala scripture wea fitim wanem iutufala storyim. Then readim wanfala paragraf wea storyim datfala subject and maet for lelebet taem iutufala savve story abaotem datwan.
Narafala wei for offerim buk hia hem for iusim olketa piksa and olketa kwestin wea stap long page 3-6 for mekem haosholder interest. And then, showim hem chapter insaed long buk wea storyim ansa wea kam from Bible. Olsem example, maet iu storyim wanfala nogud samting wea iu herem long nius and storyim hao staka pipol laek for savve long ansa bilong olketa kwestin wea stap long page 3. Or iu savve sei iu visitim pipol for storyim olketa gud samting wea bae kamap long future. Then, showim hem olketa piksa long page 4-5 and askem hem, “Which wan long olketa promis hia nao iu laek for lukim hem kamap tru?” Narafala samting wea iu savve duim tu hem for sei iu visitim pipol for helpem olketa for savve long ansa bilong olketa important kwestin long laef. Then showim haosholder sixfala kwestin long page 6, and askem hem which wan nao hem barava interest for savve long ansa bilong hem.
Askem stret haosholder sapos hem laek for studyim Bible. Maet iu savve sei: “Mifala showim long pipol disfala buk wea savve helpem man for studyim Bible. Waswe, iu lukim finis disfala buk? [Weit for hem ansa.] Sapos hem olraet witim iu, mi laek for showim iu hao for iusim disfala buk for studyim Bible.”

Samting for Duim Disfala Month:

Long famili worship bilong iu, practicem hao for offerim Wanem Bible Teachim buk.
Taem iu long ministry, storyim long olketa nara pablisa idea wea bae iu iusim for offerim datfala buk. (Prov. 27:17) Changem idea wea iu iusim sapos iu luksavve pipol no interest.