Startim Bible Study Long Month Bilong October!
1. Wanem nao offer for October?
1 Offer for October hem olketa Wastaoa and Awake! magasin. For go bak lukim man wea interest, hem gud for iumi iusim disfala tract Waswe, Iu Laek for Savve Long Tru Samting? and trae for startim Bible study. Hao nao bae iumi duim diswan taem iumi duim return visit?
2. Hao nao iumi savve iusim Savve Long Tru Samting tract for startim Bible study taem iu duim return visit long samwan wea tekem olketa magasin?
2 Hao for Iusim Disfala Tract: Maet iumi savve sei: “Olketa magasin wea mi givim iu hem encouragem evri difren kaen pipol and religion for savve gud long Bible. [Givim disfala tract Savve Long Tru Samting long haosholder and showim long hem olketa kwestin long front page.] Long hia hem garem samfala interesting kwestin wea Bible savve ansarem. Waswe, iu enitaem askem olketa kwestin hia?” Bihaen iu herem tingting bilong haosholder, storyim ansa abaotem wanfala long olketa kwestin bilong hem and readim wanfala scripture wea stap. Then, explainim long hem hao diswan hem wanfala example long wanem Bible teachim, and givim hem wanfala Wanem Bible Teachim buk. Bihaen datwan, iumi savve storyim first tu-thri paragraf long chapter wea hem chusim from page wea listim olketa chapter title. Or iumi savve storyim samfala information moa from buk abaotem datfala subject wea iumi storyim long tract. Iumi savve iusim samfala reference long hia:
● Waswe, God tingim iumi tu? (pp. 10-11, par. 6-10)
● Waswe, olketa war and wei for safa bae finis? (pp. 12-13, par. 12-13)
● Man wea dae finis hem hao? (pp. 59-60, par. 7-8)
● Waswe, man wea dae finis savve laef bak? (p. 71, par. 13-15)
● Hao nao mi savve prea for God herem mi? (pp. 166-167, par. 5-8)
● Hao nao mi savve barava hapi? (p. 9, par. 4-5)
3. Hao nao iumi savve changem story bilong iumi for fitim haosholder?
3 Sapos long firstfala return visit hem no fitim for startim and showim hao for duim study long Wanem Bible Teachim buk, iumi savve markem taem for go bak and gohed long datfala story. Hem depend long interest bilong haosholder, bat maet iumi need for go bak tu-thri taem for storyim olketa kwestin from tract, then bihaen iumi savve iusim Wanem Bible Teachim buk. Hem bae gud tumas taem iumi iusim disfala tract long October for startim Bible study and helpem olketa wea hambol for “savve long samting wea tru.”—John 8:31, 32.