Spesol Waka Long October 16 Go Kasem November 12!
1 “Klosap Nao False Religion Bae Finis!” Diswan nao title bilong Kingdom Nius No. 37, wea bae iumi givimaot evriwea long world start long next month. Long first tufala week long October, iumi bae offerim olketa Wastaoa and Awake! magasin. Start long Monday, October 16, go kasem Sunday, November 12, iumi bae barava busy for givimaot Kingdom Nius No. 37. Long olketa weekend, iumi bae givimaot tract hia witim olketa magasin.
2 Olketa wea Savve Tekpart: Evriwan wea strong for preachim gud nius bae laek for share evribit for sapotim disfala spesol waka. Samfala savve kamap auxiliary pioneer. Waswe, iu garem pikinini or samfala Bible study wea muv ahed long spiritual wei? Helpem olketa for go story witim olketa elder for savve sapos olketa fit for kamap anbaptaes pablisa. Olketa elder savve encouragem olketa wea inactive mekem olketa savve tekpart long preaching waka moa, maet long wei for olketa waka witim samfala strong pablisa long kongregeson.
3 Branch office sendem finis Kingdom Nius No. 37 long evri kongregeson, mekem olketa pablisa and olketa pioneer savve tekem samting olsem 50 copy each for iusim. Olketa wea interest bat no kamap pablisa yet, savve tekem faevfala copy each for givim long olketa famili and fren bilong olketa. Evri pablisa mas raetem daon haomas tract nao olketa offerim, mekem olketa savve raetem bihaen long field service report bilong olketa long end bilong October and November. Secretary bae addim total bilong evri tract wea kongregeson givimaot, and sendem go long branch office long end bilong each month. Olketa Kingdom Nius wea stap bihaen waka hia hem finis, olketa savve iusim long eni nara part long ministry.
4 Wanem for Talem: For iu savve story long staka pipol, hem gud for no story longtaem tumas. Maet iu savve sei: “Mi share for givimaot disfala important message wea kamap evriwea long world for helpem pipol. Diswan hem free copy bilong iu. Plis iu readim.” Mek sure for keepim record bilong evriwan wea interest.
5 Hao for Duim Full Territory Bilong Iufala: Winim wei for givimaot Kingdom Nius long street waka, tingting strong for kavarem staka long olketa bisnis and haos tu haos territory bilong iufala. Raetem olketa haos wea pipol no stap, and trae for go bak long wanfala difren taem or day. Start long Monday, November 6, iu savve leavim wanfala copy long haos wea pipol no stap long hem. Sapos olketa elder luksavve territory hem big tumas and kongregeson hard for duim full territory insaed tufala week hia, then maet olketa elder savve disaedem for olketa brata and sista for putim Kingdom Nius long haos bilong pipol wea no stap, long taem wea disfala spesol waka hem start go kasem taem hem finis.
6 Datfala taem wea “Bigfala Babylon” bae distroe, hem klosap tumas. Pipol mas kamaot from Bigfala Babylon bifor hem bae distroe evribit. (Rev. 14:8; 18:8) Plan distaem for share evribit long disfala spesol waka evriwea long world for mekem evri man savve hao klosap nao false religion bae finis!