Campaign for Givim Invitation for Memorial Bae Start Long March 1
1. Wanem taem nao campaign for givim invitation for Memorial bae start, and why nao bae hem gohed for samfala day moa?
1 Iumi bae startim campaign for givim invitation for Memorial long Friday, March 1. Memorial bae kamap long March 26, so datwan minim campaign bae gohed for samfala day moa winim olketa nara year. Sapos kongregeson garem big territory, datwan bae givim chance long staka pipol moa for kasem invitation.
2. Wanem nao arrangement for kasem olketa invitation and for duim full territory?
2 Hao for Organize: Olketa elder bae talem hao for duim full territory and sapos iumi shud leavim invitation long haos wea no eniwan stap. Sapos kongregeson duim full territory and samfala invitation pepa stap yet, olketa savve givimaot taem olketa duim street witnessing. Service overseer bae mek sure inaf invitation wea olketa raetem finis taem and ples for Memorial bae stap long bukrum for olketa pablisa tekem. Bat hem bae mek sure samfala invitation stap long bukrum for each week bilong campaign. Iumi mas tekem nomoa inaf invitation fitim wanfala week.
3. Wanem nao iumi shud tingim taem iumi givimaot invitation pepa?
3 Wanem for Talem: Hem gud for no story longtaem mekem iumi savve givimaot invitation long staka pipol moa. Page 4 garem idea long hao for offerim invitation. Iumi savve changem for fitim pipol long territory bilong iumi. Bat sapos haosholder hem kaen or hem askem samfala kwestin, hem gud for story witim hem. Long weekend, iumi savve offerim olketa magasin tu sapos hem fitim. Long March 2, iumi bae givimaot invitation and no offerim Bible study.
4. Why nao iumi shud duim best bilong iumi for join insaed disfala campaign?
4 Iumi hope staka pipol bae kam long Memorial. Brata wea givim tok bae explainim hu nao Jesus. (1 Cor. 11:26) Hem bae storyim gud samting wea iumi kasem from dae bilong hem. (Rome 6:23) And hem bae storyim why hem important for tingim Jesus. (John 17:3) Iumi laek duim best bilong iumi for join insaed disfala campaign!